כַּשֶּׁלֶג בַּקַּיִץ וְכַמָּטָר בַּקָּצִיר
כֵּן לֹא־נָאוֶה לִכְסִיל כָּבוֺד׃
כַּצִּפּוֺר לָנוּד כַּדְּרוֺר לָעוּף
כֵּן קִלְלַת חִנָּם 1 לֹא 2 לוֺ תָבֹא׃
שׁוֺט לַסּוּס מֶתֶג לַחֲמוֺר וְשֵׁבֶט
לְגֵו כְּסִילִים׃
אַל־תַּעַן כְּסִיל כְּאִוַּלְתּוֺ פֶּנ־תִּשְׁוֶה־לּוֺ
גַמ־אָתָּה׃
עֲנֵה כְסִיל כְּאִוַּלְתּוֺ פֶּנ־יִהְיֶה
חָכָם בְּעֵינָיו׃
מְקַצֶּה רַגְלַיִם חָמָס שֹׁתֶה שֹׁלֵחַ
דְּבָרִים בְּיַד־כְּסִיל׃
דַּלְיוּ שֹׁקַיִם מִפִּסֵּחַ וּמָשָׁל בְּפִי
כְסִילִים׃
כִּצְרוֺר אֶבֶן בְּמַרְגֵּמָה כֵּנ־נֺותֵן
לִכְסִיל כָּבוֺד׃
חוֺחַ עָלָה בְיַד־שִׁכּוֺר וּמָשָׁל
בְּפִי כְסִילִים׃
רַב מְחוֺלֵל־כֹּל וְשֹׂכֵר כְּסִיל
וְשֹׂכֵר עֹבְרִים׃
כְּכֶלֶב שָׁב עַל־קֵאוֺ כְּסִיל
שׁוֺנֶה בְאִוַּלְתּוֺ׃
רָאִיתָ אִישׁ חָכָם בְּעֵינָיו תִּקְוָה
לִכְסִיל מִמֶּנּוּ׃
אָמַר עָצֵל שַׁחַל בַּדָּרֶך אֲרִי
בֵּין הָרְחֹבוֺת׃
הַדֶּלֶת תִּסּוֺב עַל־צִירָהּ וְעָצֵל
עַל־מִטָּתוֺ׃
טָמַן עָצֵל יָדוֺ בַּצַּלָּחַת נִלְאָה
לַהֲשִׁיבָהּ אֶל־פִּיו׃
חָכָם עָצֵל בְּעֵינָיו מִשִּׁבְעָה
מְשִׁיבֵי טָעַם׃
מַחֲזִיק בְּאָזְנֵי־כָלֶב עֹבֵר מִתְעַבֵּר
עַל־רִיב לֹּא־לוֺ׃
כְּמִתְלַהְלֵהַּ הַיֺּרֶה זִקִּים חִצִּים
וָמָוֶת׃
כֵּנ־אִישׁ רִמָּה אֶת־רֵעֵהוּ וְאָמַר
הֲלֹא־מְשַׂחֵק אָנִי׃
בְּאֶפֶס עֵצִים תִּכְבֶּה־אֵשׁ וּבְאֵין
נִרְגָּן יִשְׁתֹּק מָדוֺן׃
פֶּחָם לְגֶחָלִים וְעֵצִים לְאֵשׁ
וְאִישׁ 1 מִדוֺנִים 2 מִדְיָנִים לְחַרְחַר־רִיב׃
ף
דִּבְרֵי נִרְגָּן כְּמִתְלַהֲמִים וְהֵם
יָרְדוּ חַדְרֵי־בָטֶן׃
כֶּסֶף סִיגִים מְצֻפֶּה עַל־חָרֶשׂ
שְׂפָתַיִם דֹּלְקִים וְלֶב־רָע׃
בִּשְׂפָתוֺ 2 בִּשְׂפָתָיו יִנָּכֵר שׂוֺנֵא
וּבְקִרְבּוֺ יָשִׁית מִרְמָה׃
כִּי־יְחַנֵּן קוֺלוֺ אַל־תַּאֲמֶנ־בּוֺ
כִּי שֶׁבַע תּוֺעֵבוֺת בְּלִבּוֺ׃
תִּכַּסֶּה שִׂנְאָה בְּמַשָּׁאוֺן תִּגָּלֶה
רָעָתוֺ בְקָהָל׃
כֹּרֶה־שַּׁחַת בָּהּ יִפֹּל וְגֺלֵל אֶבֶן
אֵלָיו תָּשׁוּב׃
לְשׁוֺנ־שֶׁקֶר יִשְׂנָא דַכָּיו וּפֶה
חָלָק יַעֲשֶׂה מִדְחֶה׃