2Mach 1
2Mach 1
2Mach 1.1
fratribus qui sunt per Aegyptum Iudaeis salutem dicunt fratres qui sunt in Hierosolymis Iudaei et qui in regione Iudaeae et pacem bonam
2Mach 1.2
benefaciat vobis Deus et meminerit testamenti sui quod est ad Abraham et Isaac et Iacob servorum suorum fidelium
2Mach 1.3
et det vobis cor omnibus ut colatis eum et faciatis eius voluntatem corde magno et animo volente
2Mach 1.4
adaperiat cor vestrum in lege sua et in praeceptis eius et faciat pacem
2Mach 1.5
exaudiat orationes vestras et reconcilietur vobis nec vos deserat in tempore malo
2Mach 1.6
et nunc hic sumus orantes pro vobis
2Mach 1.7
regnante Demetrio anno centesimo sexagesimo nono nos Iudaei scripsimus vobis in tribulatione et impetu qui supervenit nobis in istis annis ex quo recessit Iason a sancta terra et a regno
2Mach 1.8
portam succenderunt et effuderunt sanguinem innocentem et oravimus ad Dominum et exauditi sumus et obtulimus sacrificium et similaginem et accendimus lucernas et proposuimus panes
2Mach 1.9
et nunc frequentate dies scenophegiae mensis casleu
2Mach 1.10
anno centesimo octogesimo octavo populus qui est Hierosolymis et in Iudaea senatusque et Iudas Aristobolo magistro Ptolomei regis qui est de genere christorum sacerdotum et his qui in Aegypto sunt Iudaeis salutem et sanitatem
2Mach 1.11
de magnis periculis a Deo liberati magnifice gratias ipsi utpote qui adversus talem regem dimicavimus
2Mach 1.12
ipse enim ebullire fecit de Perside eos qui pugnaverunt contra nos
2Mach 1.13
nam cum in Perside esset dux ipse et cum ipso inmensus exercitus cecidit in templo Naneae consilio deceptus sacerdotis Naneae
2Mach 1.14
ut enim cum ea habitaturus venit ad locum Antiochus et amici eius et ut acciperet pecunias multas dotis nomine
2Mach 1.15
cumque proposuissent eas sacerdotes Naneae et ipse cum paucis ingressus esset intra ambitum fani clauserunt templum
2Mach 1.16
cum intrasset Antiochus apertoque occulto aditu templi mittentes lapides percusserunt ducem et qui cum eo erant et diviserunt membratim et capitibus amputatis foras proiecerunt
2Mach 1.17
per omnia benedictus Deus qui tradidit impios
2Mach 1.18
facturi igitur quinta et vicesima mensis casleu purificationem templi necessarium duximus significare vobis ut vos quoque agatis diem scenophegiae et diem ignis qui datus est quando Neemias aedificato templo et altari obtulit sacrificia
2Mach 1.19
nam cum in Persidem ducerentur patres nostri sacerdotes qui tunc Dei cultores erant acceptum ignem de altario occulte absconderunt in valle ubi erat puteus altus siccus et in eo contutati sunt eum ita ut omnibus ignotus esset locus
2Mach 1.20
cum praeterissent autem multi anni et placuit Deo ut mitteretur Neemias a rege Persidis nepotes sacerdotum illorum qui absconderant misit ad requirendum ignem et sicut narraverunt nobis non invenerunt ignem sed aquam crassam
2Mach 1.21
et iussit eos haurire et adferre sibi et sacrificia quae inposita erant iussit sacerdos Neemias aspargi aqua ipsa et ligna et quae erant superposita
2Mach 1.22
utque hoc factum est et tempus adfuit quo sol refulsit qui prius erat in nubilo accensus est ignis magnus ita ut omnes mirarentur
2Mach 1.23
orationem autem faciebant omnes sacerdotes dum consummaretur sacrificium Ionatha inchoante ceteris autem respondentibus
2Mach 1.24
et Neemiae erat oratio hunc habens modum Domine Deus omnium creator terribilis et fortis iustus et misericors qui solus es rex bonus
2Mach 1.25
solus praestans solus iustus et omnipotens et aeternus qui liberas Israhel de omni malo qui fecisti patres electos et sanctificasti eos
2Mach 1.26
accipe sacrificium pro universo populo tuo Israhel et custodi partem tuam et sanctifica
2Mach 1.27
congrega dispersionem nostram libera eos qui serviunt gentibus contemptos et abominatos respice ut sciant gentes quod tu es Deus noster
2Mach 1.28
adflige opprimentes et contumeliam facientes in superbia
2Mach 1.29
constitue populum tuum in loco sancto tuo sicut dixit Moses
2Mach 1.30
sacerdotes autem psallebant hymnos usquequo consumptum esset sacrificium
2Mach 1.31
cum autem consummatum fuisset sacrificium ex residua aqua Neemias iussit lapides maiores perfundi
2Mach 1.32
quod ut factum est flamma ex eis accensa est sed ex lumine quod refulsit ab altari consumpta est
2Mach 1.33
ut vero manifestata essent haec renuntiatum est regi Persarum quod in loco in quo ignem absconderant hii qui translati erant sacerdotes aqua apparuit de qua Neemias et qui cum eo erant purificaverunt sacrificia
2Mach 1.34
considerans autem rex et rem diligenter examinans fecit ei templum
2Mach 1.35
et si quibus donaverat rex multa bona accipiebat ex hoc et tribuebat
2Mach 1.36
appellavit autem Neemias hoc Nepthar quod interpretatur purificatio vocatur autem apud plures Nephi
Arcanum Newspapers
See what the newspapers have said about this subject in the last 250 years!
Show me
