2Mach 15

Full text search

2Mach 15
2Mach 15.1
Nicanor autem ut conperit Iudam esse in locis Samariae cogitavit die sabbati cum omni impetu committere
2Mach 15.2
Iudaeis vero qui illum per necessitatem sequebantur dicentibus ne ita ferociter et barbare feceris sed honorem tribue diei sanctificationis et honora eum qui universa conspicit
2Mach 15.3
at ille infelix interrogavit si est potens in saeculo qui imperavit agi diem sabbatorum
2Mach 15.4
et respondentibus illis est Dominus vivus ipse in caelo potens qui iussit agi septimam diem
2Mach 15.5
at ille ait et ego potens sum super terram qui impero sumi arma et negotia regis impleri tamen non obtinuit ut consilium perficeret
2Mach 15.6
et Nicanor quidem cum summa superbia erectus cogitaverat commune tropeum statuere de Iuda
2Mach 15.7
Macchabeus autem confidebat semper cum omni spe auxilium sibi a Domino adfuturum
2Mach 15.8
et hortabatur suos ne formidarent ad adventum nationum sed in mente haberent adiutoria sibi facta de caelo et nunc sperarent ab Omnipotente adfuturam sibi victoriam
2Mach 15.9
et adlocutus illos de lege et prophetis admonens etiam certaminum quae fecerant prius promptiores eos constituit
2Mach 15.10
et ita animis eorum erectis simul ostendens gentium fallaciam et iuramentorum praevaricationem
2Mach 15.11
singulos autem illorum armavit non clypei et hastae munitione sed sermonibus optimis et hortationibus exposito digno fide somnio per quod universos laetificavit
2Mach 15.12
erat autem huiusmodi visus Onian qui fuerat summus sacerdos virum bonum et benignum verecundum visu modestum moribus et eloquio decorum et qui a puero in virtutibus exercitatus sit manus protendentem orare pro omni populo Iudaeorum
2Mach 15.13
post haec apparuisse et alium virum aetate et gloria mirabilem et magni decoris habitudine circa illum
2Mach 15.14
respondentem vero Onian dixisse hic est fratrum amator et populi Israhel hic est qui multum orat pro populo et universa sancta civitate Hieremias propheta Dei
2Mach 15.15
extendisse autem Hieremiam dexteram et dedisse Iudae gladium aureum dicentem
2Mach 15.16
accipe sanctum gladium munus a Deo quo deicies adversarios populi mei Israhel
2Mach 15.17
exhortati itaque Iudae sermonibus bonis valde de quibus extolli possit impetus et animi iuvenum confortari statuerunt dimicare et confligere fortiter ut virtus de negotiis iudicaret eo quod civitas et sancta et templum periclitaretur
2Mach 15.18
erat enim pro uxoribus et filiis itemque pro fratribus et cognatis minor sollicitudo maximus vero et primus pro sanctitate timor erat templi
2Mach 15.19
sed et eos qui in civitate erant non minima sollicitudo habebat pro his qui congressi erant
2Mach 15.20
et cum iam omnes sperarent iudicium futurum hostisque adesset atque exercitus esset ordinatus bestiae equitesque oportuno in loco conpositi
2Mach 15.21
considerans Macchabeus adventum multitudinis et adparatum varium armorum ac ferocitatem bestiarum extendens manum in caelum prodigia facientem Dominum invocavit qui non secundum armorum potentiam sed prout ipsi placet dat dignis victoriam
2Mach 15.22
dixit autem invocans hoc modo tu Domine misisti angelum tuum sub Ezechia rege Iudae et interfecisti de castris Sennacherim centum octoginta quinque milia
2Mach 15.23
et nunc Dominator caelorum mitte angelum tuum bonum ante nos in timore et tremore magnitudinis brachii tui
2Mach 15.24
ut metuant qui cum blasphemia veniunt adversus sanctum populum tuum et hic quidem ita peroravit
2Mach 15.25
Nicanor autem et qui cum ipso erant cum tubis et canticis admovebant
2Mach 15.26
Iudas vero et qui cum eo erant invocato Deo per orationes congressi sunt
2Mach 15.27
manu quidem pugnantes sed cordibus Dominum orantes prostraverunt non minus triginta milia praesentia Dei magnifice delectati
2Mach 15.28
cumque cessassent et cum gaudio redirent cognoverunt Nicanorem ruisse cum armis suis
2Mach 15.29
facto itaque clamore et perturbatione suscitata patria voce omnipotentem Dominum benedicebant
2Mach 15.30
praecepit autem Iudas qui per omnia corpore et animo emori pro civibus paratus erat caput Nicanoris et manum cum umero abscisam Hierosolymam perferri
2Mach 15.31
quo cum convenisset convocatis contribulibus et sacerdotibus ad altare arcersiit et eos qui in arce erant
2Mach 15.32
et ostenso capite Nicanoris et manu nefaria quam extendens contra domum sanctam omnipotentis Dei magnifice gloriatus est
2Mach 15.33
linguam etiam impii Nicanoris praecisam iussit particulatim avibus dari manum autem dementis contra templum suspendi
2Mach 15.34
omnes igitur caeli Dominum benedixerunt dicentes benedictus qui locum suum incontaminatum conservavit
2Mach 15.35
suspendit autem Nicanoris caput in summa arce evidens ut esset et manifestum sit auxilii Dei
2Mach 15.36
itaque omnes communi consilio decreverunt nullo modo diem istum absque celebritate praeterire
2Mach 15.37
habere autem celebritatem tertiadecima die mensis adar quod dicitur voce syriaca pridie Mardochei die
2Mach 15.38
igitur his erga Nicanorem gestis et ex illis temporibus ab Hebraeis civitate possessa ego quoque in his finem faciam sermonis
2Mach 15.39
et siquidem bene et ut historiae conpetit et ipse velim si autem minus digne concedendum est mihi
2Mach 15.40
sicut enim vinum semper bibere aut semper aquam contrarium est alternis autem uti delectabile ita legentibus si semper exactus sit sermo non erit gratus hic ergo erit consummatus

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages