Jes 1

Full text search

Jes 1
Jes 1.1
חֲזֺון יְשַׁעְיָהוּ בֶנ־אָמוֺץ אֲשֶׁר
חָזָה עַל־יְהוּדָה וִירוּשָׁלִָם
בִּימֵי עֻזִּיָּהוּ יֺותָם אָחָז
יְחִזְקִיָּהוּ מַלְכֵי יְהוּדָה׃
Jes 1.2
שִׁמְעוּ שָׁמַיִם וְהַאֲזִינִי אֶרֶץ
כִּי יְהוָה דִּבֵּר בָּנִים גִּדַּלְתִּי
וְרוֺמַמְתִּי וְהֵם פָּשְׁעוּ בִי׃
Jes 1.3
יָדַע שׁוֺר קֹנֵהוּ וַחֲמוֺר אֵבוּס
בְּעָלָיו יִשְׂרָאֵל לֹא יָדַע עַמִּי
לֹא הִתְבּוֺנָן׃
Jes 1.4
הוֺי גֺּוי חֹטֵא עַם כֶּבֶד עָוֺן
זֶרַע מְרֵעִים בָּנִים מַשְׁחִיתִים
עָזְבוּ אֶת־יְהוָה נִאֲצוּ אֶת־קְדוֺשׁ
יִשְׂרָאֵל נָזֺרוּ אָחוֺר׃
Jes 1.5
עַל מֶה תֻכּוּ עוֺד תּוֺסִיפוּ
סָרָה כָּל־רֹאשׁ לָחֳלִי וְכָל־לֵבָב
דַּוָּי׃
Jes 1.6
מִכַּפ־רֶגֶל וְעַד־רֹאשׁ אֵינ־בּוֺ
מְתֹם פֶּצַע וְחַבּוּרָה וּמַכָּה
טְרִיָּה לֹא־זֺרוּ וְלֹא חֻבָּשׁוּ
וְלֹא רֻכְּכָה בַּשָּׁמֶן׃
Jes 1.7
אַרְצְכֶם שְׁמָמָה עָרֵיכֶם שְׂרֻפוֺת
אֵשׁ אַדְמַתְכֶם לְנֶגְדְּכֶם זָרִים
אֹכְלִים אֹתָהּ וּשְׁמָמָה כְּמַהְפֵּכַת
זָרִים׃
Jes 1.8
וְנֺותְרָה בַת־צִיֺּון כְּסֻכָּה בְכָרֶם
כִּמְלוּנָה בְמִקְשָׁה כְּעִיר נְצוּרָה׃
Jes 1.9
לוּלֵי יְהוָה צְבָאוֺת הוֺתִיר
לָנוּ שָׂרִיד כִּמְעָט כִּסְדֹם הָיִינוּ
לַעֲמֹרָה דָּמִינוּ׃ ס
Jes 1.10
שִׁמְעוּ דְבַר־יְהוָה קְצִינֵי סְדֹם
הַאֲזִינוּ תּוֺרַת אֱלֹהֵינוּ עַם
עֲמֹרָה׃
Jes 1.11
לָמָּה־לִּי רֹב־זִבְחֵיכֶם יֺאמַר
יְהוָה שָׂבַעְתִּי עֹלוֺת אֵילִים
וְחֵלֶב מְרִיאִים וְדַם פָּרִים
וּכְבָשִׂים וְעַתּוּדִים לֹא חָפָצְתִּי׃
Jes 1.12
כִּי תָבֹאוּ לֵרָאוֺת פָּנָי מִי־בִקֵּשׁ
זֺאת מִיֶּדְכֶם רְמֹס חֲצֵרָי׃
Jes 1.13
לֹא תוֺסִיפוּ הָבִיא מִנְחַת־שָׁוְא
קְטֹרֶת תּוֺעֵבָה הִיא לִי חֹדֶשׁ
וְשַׁבָּת קְרֹא מִקְרָא לֹא־אוּכַל
אָוֶן וַעֲצָרָה׃
Jes 1.14
חָדְשֵׁיכֶם וּמוֺעֲדֵיכֶם שָׂנְאָה
נַפְשִׁי הָיוּ עָלַי לָטֹרַח נִלְאֵיתִי
נְשֹׂא׃
Jes 1.15
וּבְפָרִשְׂכֶם כַּפֵּיכֶם אַעְלִים עֵינַי
מִכֶּם גַּם כִּי־תַרְבּוּ תְפִלָּה
אֵינֶנִּי שֹׁמֵעַ יְדֵיכֶם דָּמִים
מָלֵאוּ׃
Jes 1.16
רַחֲצוּ הִזַּכּוּ הָסִירוּ רֹעַ מַעַלְלֵיכֶם
מִנֶּגֶד עֵינָי חִדְלוּ הָרֵעַ׃
Jes 1.17
לִמְדוּ הֵיטֵב דִּרְשׁוּ מִשְׁפָּט
אַשְּׁרוּ חָמוֺץ שִׁפְטוּ יָתוֺם
רִיבוּ אַלְמָנָה׃ ס
Jes 1.18
לְכוּ־נָא וְנִוָּכְחָה יֺאמַר יְהוָה
אִמ־יִהְיוּ חֲטָאֵיכֶם כַּשָּׁנִים
כַּשֶּׁלֶג יַלְבִּינוּ אִמ־יַאְדִּימוּ
כַתּוֺלָע כַּצֶּמֶר יִהְיוּ׃
Jes 1.19
אִמ־תֹּאבוּ וּשְׁמַעְתֶּם טוּב הָאָרֶץ
תֹּאכֵלוּ׃
Jes 1.20
וְאִמ־תְּמָאֲנוּ וּמְרִיתֶם חֶרֶב
תְּאֻכְּלוּ כִּי פִּי יְהוָה דִּבֵּר׃
ס
Jes 1.21
אֵיכָה הָיְתָה לְזֺונָה קִרְיָה
נֶאֱמָנָה מְלֵאֲתִי מִשְׁפָּט צֶדֶק
יָלִין בָּהּ וְעַתָּה מְרַצְּחִים׃
Jes 1.22
כַּסְפֵּך הָיָה לְסִיגִים סָבְאֵך
מָהוּל בַּמָּיִם׃
Jes 1.23
שָׂרַיִך סוֺרְרִים וְחַבְרֵי גַּנָּבִים
כֻּלּוֺ אֹהֵב שֹׁחַד וְרֹדֵף שַׁלְמֹנִים
יָתוֺם לֹא יִשְׁפֹּטוּ וְרִיב אַלְמָנָה
לֹא־יָבוֺא אֲלֵיהֶם׃ ף
Jes 1.24
לָכֵן נְאֻם הָאָדוֺן יְהוָה צְבָאוֺת
אֲבִיר יִשְׂרָאֵל הוֺי אֶנָּחֵם
מִצָּרַי וְאִנָּקְמָה מֵאוֺיְבָי׃
Jes 1.25
וְאָשִׁיבָה יָדִי עָלַיִך וְאֶצְרֹף
כַּבֹּר סִיגָיִך וְאָסִירָה כָּל־בְּדִילָיִך׃
Jes 1.26
וְאָשִׁיבָה שֹׁפְטַיִך כְּבָרִאשֹׁנָה
וְיֺעֲצַיִך כְּבַתְּחִלָּה אַחֲרֵי־כֵן
יִקָּרֵא לָך עִיר הַצֶּדֶק קִרְיָה
נֶאֱמָנָה׃
Jes 1.27
צִיֺּון בְּמִשְׁפָּט תִּפָּדֶה וְשָׁבֶיהָ
בִּצְדָקָה׃
Jes 1.28
וְשֶׁבֶר פֹּשְׁעִים וְחַטָּאִים יַחְדָּו
וְעֹזְבֵי יְהוָה יִכְלוּ׃
Jes 1.29
כִּי יֵבֹשׁוּ מֵאֵילִים אֲשֶׁר חֲמַדְתֶּם
וְתַחְפְּרוּ מֵהַגַּנֺּות אֲשֶׁר בְּחַרְתֶּם׃
Jes 1.30
כִּי תִהְיוּ כְּאֵלָה נֺבֶלֶת עָלֶהָ
וּכְגַנָּה אֲשֶׁר־מַיִם אֵין לָהּ׃
Jes 1.31
וְהָיָה הֶחָסֹן לִנְעֹרֶת וּפֹעֲלוֺ
לְנִיצוֺץ וּבָעֲרוּ שְׁנֵיהֶם יַחְדָּו
וְאֵין מְכַבֶּה׃ ס

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages