Jes 61

Full text search

Jes 61
Jes 61.1
רוּחַ אֲדֹנָי יְהוִה עָלָי יַעַן
מָשַׁח יְהוָה אֹתִי לְבַשֵּׂר עֲנָוִים
שְׁלָחַנִי לַחֲבֹשׁ לְנִשְׁבְּרֵי־לֵב
לִקְרֹא לִשְׁבוּיִם דְּרוֺר וְלַאֲסוּרִים
פְּקַח־קוֺחַ׃
Jes 61.2
לִקְרֹא שְׁנַת־רָצוֺן לַיהוָה וְיֺום
נָקָם לֵאלֹהֵינוּ לְנַחֵם כָּל־אֲבֵלִים׃
Jes 61.3
לָשׂוּם לַאֲבֵלֵי צִיֺּון לָתֵת לָהֶם
פְּאֵר תַּחַת אֵפֶר שֶׁמֶן שָׂשׂוֺן
תַּחַת אֵבֶל מַעֲטֵה תְהִלָּה תַּחַת
רוּחַ כֵּהָה וְקֹרָא לָהֶם אֵילֵי
הַצֶּדֶק מַטַּע יְהוָה לְהִתְפָּאֵר׃
Jes 61.4
וּבָנוּ חָרְבוֺת עוֺלָם שֹׁמְמוֺת
רִאשֹׁנִים יְקוֺמֵמוּ וְחִדְּשׁוּ
עָרֵי חֹרֶב שֹׁמְמוֺת דּוֺר וָדוֺר׃
Jes 61.5
וְעָמְדוּ זָרִים וְרָעוּ צֹאנְכֶם
וּבְנֵי נֵכָר אִכָּרֵיכֶם וְכֹרְמֵיכֶם׃
Jes 61.6
וְאַתֶּם כֹּהֲנֵי יְהוָה תִּקָּרֵאוּ
מְשָׁרְתֵי אֱלֹהֵינוּ יֵאָמֵר לָכֶם
חֵיל גֺּויִם תֹּאכֵלוּ וּבִכְבוֺדָם
תִּתְיַמָּרוּ׃
Jes 61.7
תַּחַת בָּשְׁתְּכֶם מִשְׁנֶה וּכְלִמָּה
יָרֹנּוּ חֶלְקָם לָכֵן בְּאַרְצָם
מִשְׁנֶה יִירָשׁוּ שִׂמְחַת עוֺלָם
תִּהְיֶה לָהֶם׃
Jes 61.8
כִּי אֲנִי יְהוָה אֹהֵב מִשְׁפָּט
שֹׂנֵא גָזֵל בְּעוֺלָה וְנָתַתִּי
פְעֻלָּתָם בֶּאֱמֶת וּבְרִית עוֺלָם
אֶכְרוֺת לָהֶם׃
Jes 61.9
וְנֺודַע בַּגֺּויִם זַרְעָם וְצֶאֱצָאֵיהֶם
בְּתוֺך הָעַמִּים כָּל־רֹאֵיהֶם
יַכִּירוּם כִּי הֵם זֶרַע בֵּרַך
יְהוָה׃ ס
Jes 61.10
שׂוֺשׂ אָשִׂישׂ בַּיהוָה תָּגֵל נַפְשִׁי
בֵּאלֹהַי כִּי הִלְבִּישַׁנִי בִּגְדֵי־יֶשַׁע
מְעִיל צְדָקָה יְעָטָנִי כֶּחָתָן
יְכַהֵן פְּאֵר וְכַכַּלָּה תַּעְדֶּה כֵלֶיהָ׃
Jes 61.11
כִּי כָאָרֶץ תּוֺצִיא צִמְחָהּ וּכְגַנָּה
זֵרוּעֶיהָ תַצְמִיחַ כֵּן אֲדֹנָי
יְהוִה יַצְמִיחַ צְדָקָה וּתְהִלָּה
נֶגֶד כָּל־הַגֺּויִם׃

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages