Ez 39

Full text search

Ez 39
Ez 39.1
וְאַתָּה בֶנ־אָדָם הִנָּבֵא עַל־גֺּוג
וְאָמַרְתָּ כֹּה אָמַר אֲדֹנָי יְהוִה
הִנְנִי אֵלֶיךָ גֺּוג נְשִׂיא רֹאשׁ
מֶשֶׁך וְתֻבָל׃
Ez 39.2
וְשֹׁבַבְתִּיךָ וְשִׁשֵּׁאתִיךָ וְהַעֲלִיתִיךָ
מִיַּרְכְּתֵי צָפוֺן וַהֲבִאוֺתִךָ עַל־הָרֵי
יִשְׂרָאֵל׃
Ez 39.3
וְהִכֵּיתִי קַשְׁתְּךָ מִיַּד שְׂמֹאולֶךָ
וְחִצֶּיךָ מִיַּד יְמִינְךָ אַפִּיל׃
Ez 39.4
עַל־הָרֵי יִשְׂרָאֵל תִּפּוֺל אַתָּה
וְכָל־אֲגַפֶּיךָ וְעַמִּים אֲשֶׁר אִתָּך
לְעֵיט צִפּוֺר כָּל־כָּנָף וְחַיַּת
הַשָּׂדֶה נְתַתִּיךָ לְאָכְלָה׃
Ez 39.5
עַל־פְּנֵי הַשָּׂדֶה תִּפּוֺל כִּי
אֲנִי דִבַּרְתִּי נְאֻם אֲדֹנָי יְהוִה׃
Ez 39.6
וְשִׁלַּחְתִּי־אֵשׁ בְּמָגֺוג וּבְיֺשְׁבֵי
הָאִיִּים לָבֶטַח וְיָדְעוּ כִּי־אֲנִי
יְהוָה׃
Ez 39.7
וְאֶת־שֵׁם קָדְשִׁי אוֺדִיעַ בְּתוֺך
עַמִּי יִשְׂרָאֵל וְלֹא־אַחֵל אֶת־שֵׁמ־קָדְשִׁי
עוֺד וְיָדְעוּ הַגֺּויִם כִּי־אֲנִי
יְהוָה קָדוֺשׁ בְּיִשְׂרָאֵל׃
Ez 39.8
הִנֵּה בָאָה וְנִהְיָתָה נְאֻם אֲדֹנָי
יְהוִה הוּא הַיֺּום אֲשֶׁר דִּבַּרְתִּי׃
Ez 39.9
וְיָצְאוּ יֺשְׁבֵי עָרֵי יִשְׂרָאֵל
וּבִעֲרוּ וְהִשִּׂיקוּ בְּנֶשֶׁק וּמָגֵן
וְצִנָּה בְּקֶשֶׁת וּבְחִצִּים וּבְמַקֵּל
יָד וּבְרֹמַח וּבִעֲרוּ בָהֶם אֵשׁ
שֶׁבַע שָׁנִים׃
Ez 39.10
וְלֹא־יִשְׂאוּ עֵצִים מִנ־הַשָּׂדֶה
וְלֹא יַחְטְבוּ מִנ־הַיְּעָרִים כִּי
בַנֶּשֶׁק יְבַעֲרוּ־אֵשׁ וְשָׁלְלוּ אֶת־שֹׁלְלֵיהֶם
וּבָזְזוּ אֶת־בֹּזְזֵיהֶ נְאֻם אֲדֹנָי
יְהוִה׃ ס
Ez 39.11
וְהָיָה בַיֺּום הַהוּא אֶתֵּן לְגֺוג
מְקוֺמ־שָׁם קֶבֶר בְּיִשְׂרָאֵל גֵּי
הָעֹבְרִים קִדְמַת הַיָּם וְחֹסֶמֶת
הִיא אֶת־הָעֹבְרִים וְקָבְרוּ שָׁם
אֶת־גֺּוג וְאֶת־כָּל־הֲמוֺנֺה 2 הֲמוֺנֺו
וְקָרְאוּ גֵּיא הֲמוֺן גֺּוג׃
Ez 39.12
וּקְבָרוּם בֵּית יִשְׂרָאֵל לְמַעַן
טַהֵר אֶת־הָאָרֶץ שִׁבְעָה חֳדָשִׁים׃
Ez 39.13
וְקָבְרוּ כָּל־עַם הָאָרֶץ וְהָיָה
לָהֶם לְשֵׁם יֺום הִכָּבְדִי נְאֻם
אֲדֹנָי יְהוִה׃
Ez 39.14
וְאַנְשֵׁי תָמִיד יַבְדִּילוּ עֹבְרִים
בָּאָרֶץ מְקַבְּרִים אֶת־הָעֹבְרִים
אֶת־הַנֺּותָרִים עַל־פְּנֵי הָאָרֶץ
לְטַהֲרָהּ מִקְצֵה שִׁבְעָה־חֳדָשִׁם
יַחְקֹרוּ׃
Ez 39.15
וְעָבְרוּ הָעֹבְרִים בָּאָרֶץ וְרָאָה
עֶצֶם אָדָם וּבָנָה אֶצְלוֺ צִיּוּן
עַד קָבְרוּ אֹתוֺ הַמְקַבְּרִים אֶל־גֵּיא
הֲמוֺן גֺּוג׃
Ez 39.16
וְגַם שֶׁמ־עִיר הֲמוֺנָה וְטִהֲרוּ
הָאָרֶץ׃ ס
Ez 39.17
וְאַתָּה בֶנ־אָדָם כֹּה־אָמַר אֲדֹנָי
יְהֹוִה אֱמֹר לְצִפּוֺר כָּל־כָּנָף
וּלְכֹל חַיַּת הַשָּׂדֶה הִקָּבְצוּ
וָבֹאוּ הֵאָסְפוּ מִסָּבִיב עַל־זִבְחִי
אֲשֶׁר אֲנִי זֺבֵחַ לָכֶם זֶבַח
גָּדוֺל עַל הָרֵי יִשְׂרָאֵל וַאֲכַלְתֶּם
בָּשָׂר וּשְׁתִיתֶם דָּם׃
Ez 39.18
בְּשַׂר גִּבּוֺרִים תֹּאכֵלוּ וְדַמ־נְשִׂיאֵי
הָאָרֶץ תִּשְׁתּוּ אֵילִים כָּרִים
וְעַתּוּדִים פָּרִים מְרִיאֵי בָשָׁן
כֻּלָּם׃
Ez 39.19
וַאֲכַלְתֶּמ־חֵלֶב לְשָׂבְעָה וּשְׁתִיתֶם
דָּם לְשִׁכָּרוֺן מִזִּבְחִי אֲשֶׁר־זָבַחְתִּי
לָכֶם׃
Ez 39.20
וּשְׂבַעְתֶּם עַל־שֻׁלְחָנִי סוּס
וָרֶכֶב גִּבּוֺר וְכָל־אִישׁ מִלְחָמָה
נְאֻם אֲדֹנָי יְהוִה׃
Ez 39.21
וְנָתַתִּי אֶת־כְּבוֺדִי בַּגֺּויִם
וְרָאוּ כָל־הַגֺּויִם אֶת־מִשְׁפָּטִי
אֲשֶׁר עָשִׂיתִי וְאֶת־יָדִי אֲשֶׁר־שַׂמְתִּי
בָהֶם׃
Ez 39.22
וְיָדְעוּ בֵּית יִשְׂרָאֵל כִּי אֲנִי
יְהוָה אֱלֹהֵיהֶם מִנ־הַיֺּום הַהוּא
וָהָלְאָה׃
Ez 39.23
וְיָדְעוּ הַגֺּויִם כִּי בַעֲוֺנָם
גָּלוּ בֵית־יִשְׂרָאֵל עַל אֲשֶׁר
מָעֲלוּ־בִי וָאַסְתִּר פָּנַי מֵהֶם
וָאֶתְּנֵם בְּיַד צָרֵיהֶם וַיִּפְּלוּ
בַחֶרֶב כֻּלָּם׃
Ez 39.24
כְּטֻמְאָתָם וּכְפִשְׁעֵיהֶם עָשִׂיתִי
אֹתָם וָאַסְתִּר פָּנַי מֵהֶם׃ ס
Ez 39.25
לָכֵן כֹּה אָמַר אֲדֹנָי יְהוִה
עַתָּה אָשִׁיב אֶת־שְׁבִית 2 שְׁבוּת
יַעֲקֹב וְרִחַמְתִּי כָּל־בֵּית יִשְׂרָאֵל
וְקִנֵּאתִי לְשֵׁם קָדְשִׁי׃
Ez 39.26
וְנָשׂוּ אֶת־כְּלִמָּתָם וְאֶת־כָּל־מַעֲלָם
אֲשֶׁר מָעֲלוּ־בִי בְּשִׁבְתָּם עַל־אַדְמָתָם
לָבֶטַח וְאֵין מַחֲרִיד׃
Ez 39.27
בְּשׁוֺבְבִי אוֺתָם מִנ־הָעַמִּים
וְקִבַּצְתִּי אֹתָם מֵאַרְצוֺת אֹיְבֵיהֶם
וְנִקְדַּשְׁתִּי בָם לְעֵינֵי הַגֺּויִם
רַבִּים׃
Ez 39.28
וְיָדְעוּ כִּי אֲנִי יְהוָה אֱלֹהֵיהֶם
בְּהַגְלוֺתִי אֹתָם אֶל־הַגֺּויִם
וְכִנַּסְתִּים עַל־אַדְמָתָם וְלֹא־אוֺתִיר
עוֺד מֵהֶם שָׁם׃
Ez 39.29
וְלֹא־אַסְתִּיר עוֺד פָּנַי מֵהֶם
אֲשֶׁר שָׁפַכְתִּי אֶת־רוּחִי עַל־בֵּית
יִשְׂרָאֵל נְאֻם אֲדֹנָי יְהוִה׃
ף

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages