Eccl 40

Full text search

Eccl 40
Eccl 40.1
occupatio magna creata est omnibus hominibus et iugum grave super filios Adam a die exitus de ventre matris eorum usque in diem sepulturae in matrem omnium
Eccl 40.2
cogitationes eorum et timores cordis adinventio expectationis et dies finitionis
Eccl 40.3
residentes super sedem gloriosam usque ad humiliatum in terra et cinere
Eccl 40.4
ab eo qui utitur hyacintho et portat coronam usque ad eum qui operitur lino crudo furor zelus tumultus fluctuatio et timor mortis iracundia perseverans et contentio
Eccl 40.5
et in tempore refectionis in cubile somnus noctis inmutat scientiam eius
Eccl 40.6
modicum tamquam nihil in requie et ab eo in somnis quasi in die respectus
Eccl 40.7
conturbatus est in visu cordis sui tamquam qui evaserit in die belli in tempore salutis suae exsurrexit et admirans ad nullum timorem
Eccl 40.8
cum omni carne ab homine usque ad pecus et super peccatores septuplum
Eccl 40.9
ad haec mors sanguis contentio et romphea oppressiones famis et contritio et flagella
Eccl 40.10
super iniquos creata sunt haec omnia et propter illos factus est cataclysmus
Eccl 40.11
omnia quae de terra sunt in terram convertentur et aquae omnes in mare convertentur
Eccl 40.12
omne munus et iniquitas delebitur et fides in saeculum stabit
Eccl 40.13
substantiae iniustorum sicut fluvius siccabuntur et sicut tonitruum magnum in pluvia manebunt
Eccl 40.14
in aperiendo manus suas laetabitur sic praevaricatores in consummatione tabescent
Eccl 40.15
nepotes impiorum non multiplicabunt ramos et radices inmundae super cacumen petrae sonant
Eccl 40.16
viriditas super omnem aquam et ad oram fluminis ante omnem faenum evelletur
Eccl 40.17
gratia sicut paradisus in benedictionibus et misericordia in saeculo permanet
Eccl 40.18
vita sibi sufficientis operarii condulcabitur et in ea invenies thesaurum
Eccl 40.19
fili aedificatio civitatis confirmabit nomen et super haec mulier inmaculata conputatur
Eccl 40.20
vinum et musica laetificant cor et super utraque dilectio sapientiae
Eccl 40.21
tibiae et psalterium suavem faciunt melodiam et super utraque lingua suavis
Eccl 40.22
gratiam et speciem desiderabit oculus tuus et super hoc viride sationis
Eccl 40.23
amicus et sodalis in tempore convenientes et super utrosque mulier cum viro
Eccl 40.24
fratres in adiutorium in tempore tribulationis et super eos misericordia liberabit
Eccl 40.25
aurum et argentum constituet pedem et super utrumque consilium beneplacitum
Eccl 40.26
facultates et virtutes exaltant cor et super haec timor Domini
Eccl 40.27
non est in timore Domini minoratio et non est in eo inquirere adiutorium
Eccl 40.28
timor Domini sicut paradisus benedictionis et super omnem gloriam operuerunt illum
Eccl 40.29
fili in tempore vitae tuae ne indigeas melius est enim mori quam indigere
Eccl 40.30
vir respiciens in mensam alienam non est vita eius in cogitatione victus alit enim animam suam cibis alienis
Eccl 40.31
vir autem disciplinatus et eruditus custodiet se
Eccl 40.32
in ore inprudentis condulcabitur inopia et in ventre eius ignis ardebit

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages