Mt 19

Full text search

Mt 19
Mt 19.1
et factum est cum consummasset Iesus sermones istos migravit a Galilaea et venit in fines Iudaeae trans Iordanen
Mt 19.2
et secutae sunt eum turbae multae et curavit eos ibi
Mt 19.3
et accesserunt ad eum Pharisaei temptantes eum et dicentes si licet homini dimittere uxorem suam quacumque ex causa
Mt 19.4
qui respondens ait eis non legistis quia qui fecit ab initio masculum et feminam fecit eos
Mt 19.5
et dixit propter hoc dimittet homo patrem et matrem et adherebit uxori suae et erunt duo in carne una
Mt 19.6
itaque iam non sunt duo sed una caro quod ergo Deus coniunxit homo non separet
Mt 19.7
dicunt illi quid ergo Moses mandavit dari libellum repudii et dimittere
Mt 19.8
ait illis quoniam Moses ad duritiam cordis vestri permisit vobis dimittere uxores vestras ab initio autem non sic fuit
Mt 19.9
dico autem vobis quia quicumque dimiserit uxorem suam nisi ob fornicationem et aliam duxerit moechatur et qui dimissam duxerit moechatur
Mt 19.10
dicunt ei discipuli eius si ita est causa homini cum uxore non expedit nubere
Mt 19.11
qui dixit non omnes capiunt verbum istud sed quibus datum est
Mt 19.12
sunt enim eunuchi qui de matris utero sic nati sunt et sunt eunuchi qui facti sunt ab hominibus et sunt eunuchi qui se ipsos castraverunt propter regnum caelorum qui potest capere capiat
Mt 19.13
tunc oblati sunt ei parvuli ut manus eis inponeret et oraret discipuli autem increpabant eis
Mt 19.14
Iesus vero ait eis sinite parvulos et nolite eos prohibere ad me venire talium est enim regnum caelorum
Mt 19.15
et cum inposuisset eis manus abiit inde
Mt 19.16
et ecce unus accedens ait illi magister bone quid boni faciam ut habeam vitam aeternam
Mt 19.17
qui dixit ei quid me interrogas de bono unus est bonus Deus si autem vis ad vitam ingredi serva mandata
Mt 19.18
dicit illi quae Iesus autem dixit non homicidium facies non adulterabis non facies furtum non falsum testimonium dices
Mt 19.19
honora patrem et matrem et diliges proximum tuum sicut te ipsum
Mt 19.20
dicit illi adulescens omnia haec custodivi quid adhuc mihi deest
Mt 19.21
ait illi Iesus si vis perfectus esse vade vende quae habes et da pauperibus et habebis thesaurum in caelo et veni sequere me
Mt 19.22
cum audisset autem adulescens verbum abiit tristis erat enim habens multas possessiones
Mt 19.23
Iesus autem dixit discipulis suis amen dico vobis quia dives difficile intrabit in regnum caelorum
Mt 19.24
et iterum dico vobis facilius est camelum per foramen acus transire quam divitem intrare in regnum caelorum
Mt 19.25
auditis autem his discipuli mirabantur valde dicentes quis ergo poterit salvus esse
Mt 19.26
aspiciens autem Iesus dixit illis apud homines hoc inpossibile est apud Deum autem omnia possibilia sunt
Mt 19.27
tunc respondens Petrus dixit ei ecce nos reliquimus omnia et secuti sumus te quid ergo erit nobis
Mt 19.28
Iesus autem dixit illis amen dico vobis quod vos qui secuti estis me in regeneratione cum sederit Filius hominis in sede maiestatis suae sedebitis et vos super sedes duodecim iudicantes duodecim tribus Israhel
Mt 19.29
et omnis qui reliquit domum vel fratres aut sorores aut patrem aut matrem aut uxorem aut filios aut agros propter nomen meum centuplum accipiet et vitam aeternam possidebit
Mt 19.30
multi autem erunt primi novissimi et novissimi primi

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages