Lc 1

Full text search

Lc 1
Lc 1.1
quoniam quidem multi conati sunt ordinare narrationem quae in nobis conpletae sunt rerum
Lc 1.2
sicut tradiderunt nobis qui ab initio ipsi viderunt et ministri fuerunt sermonis
Lc 1.3
visum est et mihi adsecuto a principio omnibus diligenter ex ordine tibi scribere optime Theophile
Lc 1.4
ut cognoscas eorum verborum de quibus eruditus es veritatem
Lc 1.5
fuit in diebus Herodis regis Iudaeae sacerdos quidam nomine Zaccharias de vice Abia et uxor illi de filiabus Aaron et nomen eius Elisabeth
Lc 1.6
erant autem iusti ambo ante Deum incedentes in omnibus mandatis et iustificationibus Domini sine querella
Lc 1.7
et non erat illis filius eo quod esset Elisabeth sterilis et ambo processissent in diebus suis
Lc 1.8
factum est autem cum sacerdotio fungeretur in ordine vicis suae ante Deum
Lc 1.9
secundum consuetudinem sacerdotii sorte exiit ut incensum poneret ingressus in templum Domini
Lc 1.10
et omnis multitudo erat populi orans foris hora incensi
Lc 1.11
apparuit autem illi angelus Domini stans a dextris altaris incensi
Lc 1.12
et Zaccharias turbatus est videns et timor inruit super eum
Lc 1.13
ait autem ad illum angelus ne timeas Zaccharia quoniam exaudita est deprecatio tua et uxor tua Elisabeth pariet tibi filium et vocabis nomen eius Iohannem
Lc 1.14
et erit gaudium tibi et exultatio et multi in nativitate eius gaudebunt
Lc 1.15
erit enim magnus coram Domino et vinum et sicera non bibet et Spiritu Sancto replebitur adhuc ex utero matris suae
Lc 1.16
et multos filiorum Israhel convertet ad Dominum Deum ipsorum
Lc 1.17
et ipse praecedet ante illum in spiritu et virtute Heliae ut convertat corda patrum in filios et incredibiles ad prudentiam iustorum parare Domino plebem perfectam
Lc 1.18
et dixit Zaccharias ad angelum unde hoc sciam ego enim sum senex et uxor mea processit in diebus suis
Lc 1.19
et respondens angelus dixit ei ego sum Gabrihel qui adsto ante Deum et missus sum loqui ad te et haec tibi evangelizare
Lc 1.20
et ecce eris tacens et non poteris loqui usque in diem quo haec fiant pro eo quod non credidisti verbis meis quae implebuntur in tempore suo
Lc 1.21
et erat plebs expectans Zacchariam et mirabantur quod tardaret ipse in templo
Lc 1.22
egressus autem non poterat loqui ad illos et cognoverunt quod visionem vidisset in templo et ipse erat innuens illis et permansit mutus
Lc 1.23
et factum est ut impleti sunt dies officii eius abiit in domum suam
Lc 1.24
post hos autem dies concepit Elisabeth uxor eius et occultabat se mensibus quinque dicens
Lc 1.25
quia sic mihi fecit Dominus in diebus quibus respexit auferre obprobrium meum inter homines
Lc 1.26
in mense autem sexto missus est angelus Gabrihel a Deo in civitatem Galilaeae cui nomen Nazareth
Lc 1.27
ad virginem desponsatam viro cui nomen erat Ioseph de domo David et nomen virginis Maria
Lc 1.28
et ingressus angelus ad eam dixit have gratia plena Dominus tecum benedicta tu in mulieribus
Lc 1.29
quae cum vidisset turbata est in sermone eius et cogitabat qualis esset ista salutatio
Lc 1.30
et ait angelus ei ne timeas Maria invenisti enim gratiam apud Deum
Lc 1.31
ecce concipies in utero et paries filium et vocabis nomen eius Iesum
Lc 1.32
hic erit magnus et Filius Altissimi vocabitur et dabit illi Dominus Deus sedem David patris eius
Lc 1.33
et regnabit in domo Iacob in aeternum et regni eius non erit finis
Lc 1.34
dixit autem Maria ad angelum quomodo fiet istud quoniam virum non cognosco
Lc 1.35
et respondens angelus dixit ei Spiritus Sanctus superveniet in te et virtus Altissimi obumbrabit tibi ideoque et quod nascetur sanctum vocabitur Filius Dei
Lc 1.36
et ecce Elisabeth cognata tua et ipsa concepit filium in senecta sua et hic mensis est sextus illi quae vocatur sterilis
Lc 1.37
quia non erit inpossibile apud Deum omne verbum
Lc 1.38
dixit autem Maria ecce ancilla Domini fiat mihi secundum verbum tuum et discessit ab illa angelus
Lc 1.39
exsurgens autem Maria in diebus illis abiit in montana cum festinatione in civitatem Iuda
Lc 1.40
et intravit in domum Zacchariae et salutavit Elisabeth
Lc 1.41
et factum est ut audivit salutationem Mariae Elisabeth exultavit infans in utero eius et repleta est Spiritu Sancto Elisabeth
Lc 1.42
et exclamavit voce magna et dixit benedicta tu inter mulieres et benedictus fructus ventris tui
Lc 1.43
et unde hoc mihi ut veniat mater Domini mei ad me
Lc 1.44
ecce enim ut facta est vox salutationis tuae in auribus meis exultavit in gaudio infans in utero meo
Lc 1.45
et beata quae credidit quoniam perficientur ea quae dicta sunt ei a Domino
Lc 1.46
et ait Maria magnificat anima mea Dominum
Lc 1.47
et exultavit spiritus meus in Deo salutari meo
Lc 1.48
quia respexit humilitatem ancillae suae ecce enim ex hoc beatam me dicent omnes generationes
Lc 1.49
quia fecit mihi magna qui potens est et sanctum nomen eius
Lc 1.50
et misericordia eius in progenies et progenies timentibus eum
Lc 1.51
fecit potentiam in brachio suo dispersit superbos mente cordis sui
Lc 1.52
deposuit potentes de sede et exaltavit humiles
Lc 1.53
esurientes implevit bonis et divites dimisit inanes
Lc 1.54
suscepit Israhel puerum suum memorari misericordiae
Lc 1.55
sicut locutus est ad patres nostros Abraham et semini eius in saecula
Lc 1.56
mansit autem Maria cum illa quasi mensibus tribus et reversa est in domum suam
Lc 1.57
Elisabeth autem impletum est tempus pariendi et peperit filium
Lc 1.58
et audierunt vicini et cognati eius quia magnificavit Dominus misericordiam suam cum illa et congratulabantur ei
Lc 1.59
et factum est in die octavo venerunt circumcidere puerum et vocabant eum nomine patris eius Zacchariam
Lc 1.60
et respondens mater eius dixit nequaquam sed vocabitur Iohannes
Lc 1.61
et dixerunt ad illam quia nemo est in cognatione tua qui vocetur hoc nomine
Lc 1.62
innuebant autem patri eius quem vellet vocari eum
Lc 1.63
et postulans pugillarem scripsit dicens Iohannes est nomen eius et mirati sunt universi
Lc 1.64
apertum est autem ilico os eius et lingua eius et loquebatur benedicens Deum
Lc 1.65
et factus est timor super omnes vicinos eorum et super omnia montana Iudaeae divulgabantur omnia verba haec
Lc 1.66
et posuerunt omnes qui audierant in corde suo dicentes quid putas puer iste erit etenim manus Domini erat cum illo
Lc 1.67
et Zaccharias pater eius impletus est Spiritu Sancto et prophetavit dicens
Lc 1.68
benedictus Deus Israhel quia visitavit et fecit redemptionem plebi suae
Lc 1.69
et erexit cornu salutis nobis in domo David pueri sui
Lc 1.70
sicut locutus est per os sanctorum qui a saeculo sunt prophetarum eius
Lc 1.71
salutem ex inimicis nostris et de manu omnium qui oderunt nos
Lc 1.72
ad faciendam misericordiam cum patribus nostris et memorari testamenti sui sancti
Lc 1.73
iusiurandum quod iuravit ad Abraham patrem nostrum
Lc 1.74
daturum se nobis ut sine timore de manu inimicorum nostrorum liberati serviamus illi
Lc 1.75
in sanctitate et iustitia coram ipso omnibus diebus nostris
Lc 1.76
et tu puer propheta Altissimi vocaberis praeibis enim ante faciem Domini parare vias eius
Lc 1.77
ad dandam scientiam salutis plebi eius in remissionem peccatorum eorum
Lc 1.78
per viscera misericordiae Dei nostri in quibus visitavit nos oriens ex alto
Lc 1.79
inluminare his qui in tenebris et in umbra mortis sedent ad dirigendos pedes nostros in viam pacis
Lc 1.80
puer autem crescebat et confortabatur spiritu et erat in deserto usque in diem ostensionis suae ad Israhel

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages