Lc 18

Full text search

Lc 18
Lc 18.1
dicebat autem et parabolam ad illos quoniam oportet semper orare et non deficere
Lc 18.2
dicens iudex quidam erat in quadam civitate qui Deum non timebat et hominem non verebatur
Lc 18.3
vidua autem quaedam erat in civitate illa et veniebat ad eum dicens vindica me de adversario meo
Lc 18.4
et nolebat per multum tempus post haec autem dixit intra se et si Deum non timeo nec hominem revereor
Lc 18.5
tamen quia molesta est mihi haec vidua vindicabo illam ne in novissimo veniens suggillet me
Lc 18.6
ait autem Dominus audite quid iudex iniquitatis dicit
Lc 18.7
Deus autem non faciet vindictam electorum suorum clamantium ad se die ac nocte et patientiam habebit in illis
Lc 18.8
dico vobis quia cito faciet vindictam illorum verumtamen Filius hominis veniens putas inveniet fidem in terra
Lc 18.9
dixit autem et ad quosdam qui in se confidebant tamquam iusti et aspernabantur ceteros parabolam istam
Lc 18.10
duo homines ascenderunt in templum ut orarent unus Pharisaeus et alter publicanus
Lc 18.11
Pharisaeus stans haec apud se orabat Deus gratias ago tibi quia non sum sicut ceteri hominum raptores iniusti adulteri vel ut etiam hic publicanus
Lc 18.12
ieiuno bis in sabbato decimas do omnium quae possideo
Lc 18.13
et publicanus a longe stans nolebat nec oculos ad caelum levare sed percutiebat pectus suum dicens Deus propitius esto mihi peccatori
Lc 18.14
dico vobis descendit hic iustificatus in domum suam ab illo quia omnis qui se exaltat humiliabitur et qui se humiliat exaltabitur
Lc 18.15
adferebant autem ad illum et infantes ut eos tangeret quod cum viderent discipuli increpabant illos
Lc 18.16
Iesus autem convocans illos dixit sinite pueros venire ad me et nolite eos vetare talium est enim regnum Dei
Lc 18.17
amen dico vobis quicumque non acceperit regnum Dei sicut puer non intrabit in illud
Lc 18.18
et interrogavit eum quidam princeps dicens magister bone quid faciens vitam aeternam possidebo
Lc 18.19
dixit autem ei Iesus quid me dicis bonum nemo bonus nisi solus Deus
Lc 18.20
mandata nosti non occides non moechaberis non furtum facies non falsum testimonium dices honora patrem tuum et matrem
Lc 18.21
qui ait haec omnia custodivi a iuventute mea
Lc 18.22
quo audito Iesus ait ei adhuc unum tibi deest omnia quaecumque habes vende et da pauperibus et habebis thesaurum in caelo et veni sequere me
Lc 18.23
his ille auditis contristatus est quia dives erat valde
Lc 18.24
videns autem illum Iesus tristem factum dixit quam difficile qui pecunias habent in regnum Dei intrabunt
Lc 18.25
facilius est enim camelum per foramen acus transire quam divitem intrare in regnum Dei
Lc 18.26
et dixerunt qui audiebant et quis potest salvus fieri
Lc 18.27
ait illis quae inpossibilia sunt apud homines possibilia sunt apud Deum
Lc 18.28
ait autem Petrus ecce nos dimisimus omnia et secuti sumus te
Lc 18.29
qui dixit eis amen dico vobis nemo est qui reliquit domum aut parentes aut fratres aut uxorem aut filios propter regnum Dei
Lc 18.30
et non recipiat multo plura in hoc tempore et in saeculo venturo vitam aeternam
Lc 18.31
adsumpsit autem Iesus duodecim et ait illis ecce ascendimus Hierosolyma et consummabuntur omnia quae scripta sunt per prophetas de Filio hominis
Lc 18.32
tradetur enim gentibus et inludetur et flagellabitur et conspuetur
Lc 18.33
et postquam flagellaverint occident eum et die tertia resurget
Lc 18.34
et ipsi nihil horum intellexerunt et erat verbum istud absconditum ab eis et non intellegebant quae dicebantur
Lc 18.35
factum est autem cum adpropinquaret Hiericho caecus quidam sedebat secus viam mendicans
Lc 18.36
et cum audiret turbam praetereuntem interrogabat quid hoc esset
Lc 18.37
dixerunt autem ei quod Iesus Nazarenus transiret
Lc 18.38
et clamavit dicens Iesu Fili David miserere mei
Lc 18.39
et qui praeibant increpabant eum ut taceret ipse vero multo magis clamabat Fili David miserere mei
Lc 18.40
stans autem Iesus iussit illum adduci ad se et cum adpropinquasset interrogavit illum
Lc 18.41
dicens quid tibi vis faciam at ille dixit Domine ut videam
Lc 18.42
et Iesus dixit illi respice fides tua te salvum fecit
Lc 18.43
et confestim vidit et sequebatur illum magnificans Deum et omnis plebs ut vidit dedit laudem Deo

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages