Jo 11

Full text search

Jo 11
Jo 11.1
erat autem quidam languens Lazarus a Bethania de castello Mariae et Marthae sororis eius
Jo 11.2
Maria autem erat quae unxit Dominum unguento et extersit pedes eius capillis suis cuius frater Lazarus infirmabatur
Jo 11.3
miserunt ergo sorores ad eum dicentes Domine ecce quem amas infirmatur
Jo 11.4
audiens autem Iesus dixit eis infirmitas haec non est ad mortem sed pro gloria Dei ut glorificetur Filius Dei per eam
Jo 11.5
diligebat autem Iesus Martham et sororem eius Mariam et Lazarum
Jo 11.6
ut ergo audivit quia infirmabatur tunc quidem mansit in eodem loco duobus diebus
Jo 11.7
deinde post haec dicit discipulis suis eamus in Iudaeam iterum
Jo 11.8
dicunt ei discipuli rabbi nunc quaerebant te Iudaei lapidare et iterum vadis illuc
Jo 11.9
respondit Iesus nonne duodecim horae sunt diei si quis ambulaverit in die non offendit quia lucem huius mundi videt
Jo 11.10
si autem ambulaverit nocte offendit quia lux non est in eo
Jo 11.11
haec ait et post hoc dicit eis Lazarus amicus noster dormit sed vado ut a somno exsuscitem eum
Jo 11.12
dixerunt ergo discipuli eius Domine si dormit salvus erit
Jo 11.13
dixerat autem Iesus de morte eius illi autem putaverunt quia de dormitione somni diceret
Jo 11.14
tunc ergo dixit eis Iesus manifeste Lazarus mortuus est
Jo 11.15
et gaudeo propter vos ut credatis quoniam non eram ibi sed eamus ad eum
Jo 11.16
dixit ergo Thomas qui dicitur Didymus ad condiscipulos eamus et nos ut moriamur cum eo
Jo 11.17
venit itaque Iesus et invenit eum quattuor dies iam in monumento habentem
Jo 11.18
erat autem Bethania iuxta Hierosolyma quasi stadiis quindecim
Jo 11.19
multi autem ex Iudaeis venerant ad Martham et Mariam ut consolarentur eas de fratre suo
Jo 11.20
Martha ergo ut audivit quia Iesus venit occurrit illi Maria autem domi sedebat
Jo 11.21
dixit ergo Martha ad Iesum Domine si fuisses hic frater meus non fuisset mortuus
Jo 11.22
sed et nunc scio quia quaecumque poposceris a Deo dabit tibi Deus
Jo 11.23
dicit illi Iesus resurget frater tuus
Jo 11.24
dicit ei Martha scio quia resurget in resurrectione in novissima die
Jo 11.25
dixit ei Iesus ego sum resurrectio et vita qui credit in me et si mortuus fuerit vivet
Jo 11.26
et omnis qui vivit et credit in me non morietur in aeternum credis hoc
Jo 11.27
ait illi utique Domine ego credidi quia tu es Christus Filius Dei qui in mundum venisti
Jo 11.28
et cum haec dixisset abiit et vocavit Mariam sororem suam silentio dicens magister adest et vocat te
Jo 11.29
illa ut audivit surgit cito et venit ad eum
Jo 11.30
nondum enim venerat Iesus in castellum sed erat adhuc in illo loco ubi occurrerat ei Martha
Jo 11.31
Iudaei igitur qui erant cum ea in domo et consolabantur eam cum vidissent Mariam quia cito surrexit et exiit secuti sunt eam dicentes quia vadit ad monumentum ut ploret ibi
Jo 11.32
Maria ergo cum venisset ubi erat Iesus videns eum cecidit ad pedes eius et dixit ei Domine si fuisses hic non esset mortuus frater meus
Jo 11.33
Iesus ergo ut vidit eam plorantem et Iudaeos qui venerant cum ea plorantes fremuit spiritu et turbavit se ipsum
Jo 11.34
et dixit ubi posuistis eum dicunt ei Domine veni et vide
Jo 11.35
et lacrimatus est Iesus
Jo 11.36
dixerunt ergo Iudaei ecce quomodo amabat eum
Jo 11.37
quidam autem dixerunt ex ipsis non poterat hic qui aperuit oculos caeci facere ut et hic non moreretur
Jo 11.38
Iesus ergo rursum fremens in semet ipso venit ad monumentum erat autem spelunca et lapis superpositus erat ei
Jo 11.39
ait Iesus tollite lapidem dicit ei Martha soror eius qui mortuus fuerat Domine iam fetet quadriduanus enim est
Jo 11.40
dicit ei Iesus nonne dixi tibi quoniam si credideris videbis gloriam Dei
Jo 11.41
tulerunt ergo lapidem Iesus autem elevatis sursum oculis dixit Pater gratias ago tibi quoniam audisti me
Jo 11.42
ego autem sciebam quia semper me audis sed propter populum qui circumstat dixi ut credant quia tu me misisti
Jo 11.43
haec cum dixisset voce magna clamavit Lazare veni foras
Jo 11.44
et statim prodiit qui fuerat mortuus ligatus pedes et manus institis et facies illius sudario erat ligata dicit Iesus eis solvite eum et sinite abire
Jo 11.45
multi ergo ex Iudaeis qui venerant ad Mariam et viderant quae fecit crediderunt in eum
Jo 11.46
quidam autem ex ipsis abierunt ad Pharisaeos et dixerunt eis quae fecit Iesus
Jo 11.47
collegerunt ergo pontifices et Pharisaei concilium et dicebant quid facimus quia hic homo multa signa facit
Jo 11.48
si dimittimus eum sic omnes credent in eum et venient Romani et tollent nostrum et locum et gentem
Jo 11.49
unus autem ex ipsis Caiaphas cum esset pontifex anni illius dixit eis vos nescitis quicquam
Jo 11.50
nec cogitatis quia expedit nobis ut unus moriatur homo pro populo et non tota gens pereat
Jo 11.51
hoc autem a semet ipso non dixit sed cum esset pontifex anni illius prophetavit quia Iesus moriturus erat pro gente
Jo 11.52
et non tantum pro gente sed et ut filios Dei qui erant dispersi congregaret in unum
Jo 11.53
ab illo ergo die cogitaverunt ut interficerent eum
Jo 11.54
Iesus ergo iam non in palam ambulabat apud Iudaeos sed abiit in regionem iuxta desertum in civitatem quae dicitur Efrem et ibi morabatur cum discipulis
Jo 11.55
proximum autem erat pascha Iudaeorum et ascenderunt multi Hierosolyma de regione ante pascha ut sanctificarent se ipsos
Jo 11.56
quaerebant ergo Iesum et conloquebantur ad invicem in templo stantes quid putatis quia non veniat ad diem festum
Jo 11.57
dederant autem pontifices et Pharisaei mandatum ut si quis cognoverit ubi sit indicet ut adprehendant eum

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages