Ro 2

Full text search

Ro 2
Ro 2.1
propter quod inexcusabilis es o homo omnis qui iudicas in quo enim iudicas alterum te ipsum condemnas eadem enim agis qui iudicas
Ro 2.2
scimus enim quoniam iudicium Dei est secundum veritatem in eos qui talia agunt
Ro 2.3
existimas autem hoc o homo qui iudicas eos qui talia agunt et facis ea quia tu effugies iudicium Dei
Ro 2.4
an divitias bonitatis eius et patientiae et longanimitatis contemnis ignorans quoniam benignitas Dei ad paenitentiam te adducit
Ro 2.5
secundum duritiam autem tuam et inpaenitens cor thesaurizas tibi iram in die irae et revelationis iusti iudicii Dei
Ro 2.6
qui reddet unicuique secundum opera eius
Ro 2.7
his quidem qui secundum patientiam boni operis gloriam et honorem et incorruptionem quaerentibus vitam aeternam
Ro 2.8
his autem qui ex contentione et qui non adquiescunt veritati credunt autem iniquitati ira et indignatio
Ro 2.9
tribulatio et angustia in omnem animam hominis operantis malum Iudaei primum et Graeci
Ro 2.10
gloria autem et honor et pax omni operanti bonum Iudaeo primum et Graeco
Ro 2.11
non est enim personarum acceptio apud Deum
Ro 2.12
quicumque enim sine lege peccaverunt sine lege et peribunt et quicumque in lege peccaverunt per legem iudicabuntur
Ro 2.13
non enim auditores legis iusti sunt apud Deum sed factores legis iustificabuntur
Ro 2.14
cum enim gentes quae legem non habent naturaliter quae legis sunt faciunt eiusmodi legem non habentes ipsi sibi sunt lex
Ro 2.15
qui ostendunt opus legis scriptum in cordibus suis testimonium reddente illis conscientia ipsorum et inter se invicem cogitationum accusantium aut etiam defendentium
Ro 2.16
in die cum iudicabit Deus occulta hominum secundum evangelium meum per Iesum Christum
Ro 2.17
si autem tu Iudaeus cognominaris et requiescis in lege et gloriaris in Deo
Ro 2.18
et nosti voluntatem et probas utiliora instructus per legem
Ro 2.19
confidis te ipsum ducem esse caecorum lumen eorum qui in tenebris sunt
Ro 2.20
eruditorem insipientium magistrum infantium habentem formam scientiae et veritatis in lege
Ro 2.21
qui ergo alium doces te ipsum non doces qui praedicas non furandum furaris
Ro 2.22
qui dicis non moechandum moecharis qui abominaris idola sacrilegium facis
Ro 2.23
qui in lege gloriaris per praevaricationem legis Deum inhonoras
Ro 2.24
nomen enim Dei per vos blasphematur inter gentes sicut scriptum est
Ro 2.25
circumcisio quidem prodest si legem observes si autem praevaricator legis sis circumcisio tua praeputium facta est
Ro 2.26
si igitur praeputium iustitias legis custodiat nonne praeputium illius in circumcisionem reputabitur
Ro 2.27
et iudicabit quod ex natura est praeputium legem consummans te qui per litteram et circumcisionem praevaricator legis es
Ro 2.28
non enim qui in manifesto Iudaeus est neque quae in manifesto in carne circumcisio
Ro 2.29
sed qui in abscondito Iudaeus et circumcisio cordis in spiritu non littera cuius laus non ex hominibus sed ex Deo est

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages