Eccl 23

Teljes szövegű keresés

Eccl 23
Eccl 23.1
Domine pater et dominator vitae meae non relinquas me ne sinas me cadere in illis
Eccl 23.2
quis superponet in me in cogitatu meo flagella et in corde meo doctrinam sapientiae ut ignorationibus eorum non parcant mihi et non pareant delicta illorum
Eccl 23.3
et adincrescant ignorantiae meae et multiplicentur delicta mea et peccata mea abundent et incidam in conspectu adversariorum et gaudeat inimicus meus
Eccl 23.4
Domine pater et Deus vitae meae ne derelinquas me in cogitatu illorum
Eccl 23.5
extollentiam oculorum meorum ne dederis mihi et omne desiderium averte a me
Eccl 23.6
aufer a me ventris concupiscentias et concubitus concupiscentiae ne adprehendant me et animae inreverenti et infrunitae ne tradas me
Eccl 23.7
doctrina oris doctrinam oris audite filii et qui custodierit illam non periet in labiis suis nec scandalizabitur in operibus nequissimis
Eccl 23.8
in vanitate sua adprehendetur peccator et superbus et maledicus scandalizabitur in illo
Eccl 23.9
iurationi non adsuescat os tuum multus enim casus in illa
Eccl 23.10
nominatio vero Dei non sit adsidua in ore tuo et nominibus sanctorum non admiscearis quoniam non eris inmunis ab eis
Eccl 23.11
sicut enim servus interrogatus adsidue a livore non minuetur sic omnis iurans et nominans in toto a peccato non purgabitur
Eccl 23.12
vir multum iurans implebitur iniquitate et non discedet a domo illius plaga
Eccl 23.13
et si frustraverit delictum ipsius super ipsum erit et si dissimulaverit delinquet dupliciter
Eccl 23.14
et si in vacuum iuraverit non iustificabitur replebitur enim retributione domus illius
Eccl 23.15
est et alia loquella contraria morti non inveniatur in hereditate Iacob
Eccl 23.16
etenim a misericordibus omnia haec auferentur et in delictis non volutabunt
Eccl 23.17
indisciplinose non adsuescat os tuum est enim in illa verbum peccati
Eccl 23.18
memento patris et matris tuae in medio enim magnatorum consistis
Eccl 23.19
ne forte obliviscatur te in conspectu illorum et adsiduitate tua infatuatus inproperium patiaris et maluisses non nasci et diem nativitatis tuae maledicas
Eccl 23.20
homo adsuetus in verbis inproperii in omnibus diebus suis non erudietur
Eccl 23.21
duo genera abundant in peccatis et tertium adducit iram et perditionem
Eccl 23.22
anima calida quasi ignis ardens non extinguetur donec aliquid gluttiat
Eccl 23.23
et homo nequam in ore carnis suae non desinet donec incendat ignem
Eccl 23.24
homini fornicario omnis panis dulcis non cessabit transgrediens a lecto suo
Eccl 23.25
omnis homo qui transgreditur lectum suum contemnens in animam suam et dicens quis me videt
Eccl 23.26
tenebrae circumdant me et parietes cooperiunt me et nemo circumspicit me quem vereor delictorum meorum non memorabitur Altissimus
Eccl 23.27
et non intelleget quoniam omnia videt oculus illius quoniam expellit a se timorem Dei huiusmodi hominis timor et oculi hominum timentes illum
Eccl 23.28
et non cognovit quoniam oculi Domini multo plus lucidiores super solem circumspicientes omnes vias hominum et profundum abyssi et hominum corda intuentes in absconsas partes
Eccl 23.29
Domino enim Deo antequam crearentur omnia sunt agnita sic et post perfectum respicit omnia
Eccl 23.30
hic in plateis civitatis vindicabitur quasi pullus equinus fugabitur et ubi non speravit adprehendetur
Eccl 23.31
et erit dedecus omnibus quod non intellexerit timorem Dei
Eccl 23.32
sic et mulier omnis relinquens virum suum et statuens hereditatem ex alieno matrimonio
Eccl 23.33
primo enim in lege Altissimi incredibilis fuit et secundo virum suum dereliquit tertio in adulterio fornicata est et ex alio viro filios statuit sibi
Eccl 23.34
haec in ecclesiam adducetur et in filios eius respicietur
Eccl 23.35
non tradent filii eius radices et rami eius non dabunt fructum
Eccl 23.36
derelinquent in maledictum memoriam illius et dedecus illius non delebitur
Eccl 23.37
et agnoscent qui derelicti sunt quoniam nihil melius quam timor Dei et nihil dulcius quam respicere in mandatis Domini
Eccl 23.38
et gloria magna est sequi Dominum longitudo enim dierum adsumetur ab eo

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik. Alapítója és tulajdonosa, Biszak Sándor.

Rólunk Kapcsolat Sajtószoba

Languages