Eccl 27
Eccl 27
Eccl 27.1
propter inopiam multi deliquerunt et qui quaerit locupletari avertit oculum suum
Eccl 27.2
si in medio conpaginis lapidum palus figitur sic et inter medium venditionis et emptionis angustabitur peccatis
Eccl 27.3
conteretur delictum
Eccl 27.4
si non in timore Domini tenueris instanter cito subvertetur domus tua
Eccl 27.5
si in pertusura cribri remanebit stercus sic aporia hominis in cogitatu illius
Eccl 27.6
vasa figuli probat fornax et homines iustos temptatio tribulationis
Eccl 27.7
sicut rusticatio de ligno ostendit fructum illius sic verbum excogitatum hominis cordis
Eccl 27.8
ante sermonem non conlaudes virum haec enim temptatio est hominum
Eccl 27.9
si sequaris iustitiam adprehendes illam et indues quasi poderem honoris et inhabitabis cum ea et proteget te in sempiternum et in die agnitionis invenies firmamentum
Eccl 27.10
volatilia ad sibi similia conveniunt et veritas ad eos qui operantur illam revertetur
Eccl 27.11
leo venationi insidiatur semper sic peccata operantibus iniquitates
Eccl 27.12
homo sanctus in sapientia manet sicut sol nam stultus sicut luna inmutatur
Eccl 27.13
in medio insensatorum serva verbum tempori in medio autem cogitantium adsiduus esto
Eccl 27.14
narratio peccantium odiosa et risus illorum delictis peccati
Eccl 27.15
loquella multum iurans horripilationem capiti statuet et inreverentia ipsius obturatio aurium
Eccl 27.16
effusio sanguinis in rixa superborum et maledictio illorum auditus gravis
Eccl 27.17
qui denudat arcana amici perdet fidem et non inveniet amicum ad animum suum
Eccl 27.18
dilige proximum et coniungere fide cum illo
Eccl 27.19
quod si denudaveris absconsa illius non persequeris post eum
Eccl 27.20
sicut enim homo qui perdit amicum suum sic qui perdit amicitiam proximi sui
Eccl 27.21
et sicut qui dimittit avem de manu sua sic reliquisti proximum tuum et non eum capies
Eccl 27.22
non illum sequaris quoniam longe abest effugit enim quasi caprea de laqueo quoniam vulnerata est
Eccl 27.23
conligare et maledicti est concordatio
Eccl 27.24
denudare autem amici mysteria desperatio est
Eccl 27.25
annuens oculo fabricat iniqua et nemo eum abiciet
Eccl 27.26
in conspectu oculorum tuorum condulcabit os tuum et super sermones tuos admirabitur novissime autem pervertet os suum et in verbis tuis dabit scandalum
Eccl 27.27
multa audivi et non coaequavi ei et Dominus odiet illum
Eccl 27.28
qui in altum mittit lapidem super caput eius cadet et plaga dolosi dividet vulnera
Eccl 27.29
et qui foveam fodit in illam decidet et qui statuit lapidem proximo offendet in eo et qui laqueum alio peribit in illo
Eccl 27.30
facienti nequissimum super ipsum devolvetur et non agnoscet unde adveniat illi
Eccl 27.31
inlusio et inproperium superborum et vindicta sicut leo insidiabitur illi
Eccl 27.32
laqueo peribunt qui oblectantur casu iustorum dolor autem consumet illos antequam moriantur
Eccl 27.33
ira et furor utraque execrabilia et vir peccator continens erit illorum
