1Mach 2
1Mach 2
1Mach 2.1
in illis diebus surrexit Matthathias filius Iohannis filii Simeonis sacerdos ex filiis Ioarim ab Hierusalem et consedit in monte Modin
1Mach 2.2
et habebat filios quinque Iohannan qui cognominabatur Gaddis
1Mach 2.3
et Simeon qui cognominabatur Thasi
1Mach 2.4
et Iudas qui vocabatur Macchabeus
1Mach 2.5
et Eleazarus qui cognominabatur Abaron et Ionathas qui cognominabatur Apphus
1Mach 2.6
hii viderunt mala quae fiebant in populo Iuda et in Hierusalem
1Mach 2.7
et dixit Matthathias vae mihi ut quid natus sum videre contritionem populi mei et contritionem civitatis sanctae et sedere illic cum datur in manibus inimicorum
1Mach 2.8
sancta in manu extraneorum facta sunt templum eius sicut homo ignobilis
1Mach 2.9
vasa gloriae eius captiva abducta sunt trucidati sunt iuvenes eius in plateis et iuvenes eius ceciderunt gladio inimicorum
1Mach 2.10
quae gens non hereditavit regnum eius et non obtinuit spolia eius
1Mach 2.11
omnis conpositio eius ablata est quae erat libera facta est ancilla
1Mach 2.12
et ecce sancta nostra et pulchritudo nostra et claritas nostra desolata est et coinquinaverunt eam gentes
1Mach 2.13
quo ergo nobis adhuc vivere
1Mach 2.14
et scidit Matthathias et filii eius vestimenta sua et operuerunt se ciliciis et planxerunt valde
1Mach 2.15
et venerunt illuc qui missi erant a rege Antiocho ut cogerent eos qui confugerant in civitate Modin immolare et accendere et a lege Dei discedere
1Mach 2.16
et multi de populo Israhel consentientes accesserunt ad eos sed Matthathias et filii eius constanter steterunt
1Mach 2.17
et respondentes qui missi erant ab Antiocho dixerunt Matthathiae princeps et clarissimus et magnus es in hac civitate et ornatus filiis et fratribus
1Mach 2.18
ergo accede prior et fac iussum regis sicut fecerunt omnes gentes et viri Iuda et qui remanserunt in Hierusalem et eris tu et filii tui inter amicos regis et amplificatus argento et auro et muneribus multis
1Mach 2.19
et respondit Matthathias et dixit magna voce et si omnes gentes regi Antiocho oboediunt ut discedat unusquisque a servitute patrum suorum et consentiunt mandatis eius
1Mach 2.20
ego et filii mei et fratres mei oboediemus legi patrum nostrorum
1Mach 2.21
propitius sit nobis Deus non est nobis utile relinquere legem et iustitias Dei
1Mach 2.22
non audibimus verba regis Antiochi nec sacrificabimus transgredientes legis nostrae mandata ut eamus altera via
1Mach 2.23
et ut cessavit loqui verba haec accessit quidam Iudaeus in omnium oculis sacrificare idolis super aram in civitate Modin secundum iussum regis
1Mach 2.24
et vidit Matthathias et doluit et contremuerunt renes eius et ascendit furor eius secundum iudicium legis et insiliens trucidavit eum super aram
1Mach 2.25
sed et virum quem miserat rex Antiochus qui cogebat immolari occidit in ipso tempore et aram destruxit
1Mach 2.26
et zelatus est legem sicut fecit Finees Zambri filio Salomi
1Mach 2.27
et exclamavit Matthathias voce magna dicens omnis qui zelum habet legis statuens testamentum exeat post me
1Mach 2.28
et fugit ipse et filii eius in montes et reliquerunt quaecumque habebant in civitate
1Mach 2.29
tunc descenderunt multi quaerentes iudicium et iustitiam in desertum
1Mach 2.30
ut sederent ibi ipsi et filii eorum et mulieres eorum et pecora eorum quoniam induraverunt super eos mala
1Mach 2.31
et renuntiatum est viris regis et exercitui qui erat in Hierusalem civitate David quoniam discessissent viri quidam qui dissipaverunt mandatum regis in loca occulta in deserto et abissent post illos multi
1Mach 2.32
et statim perrexerunt ad eos et constituerunt adversus eos proelium in die sabbatorum
1Mach 2.33
et dixerunt ad eos resistitis et nunc adhuc exite et facite secundum verbum regis et vivetis
1Mach 2.34
et dixerunt non exibimus neque faciemus verbum regis ut polluamus diem sabbatorum
1Mach 2.35
et concitaverunt adversus eos proelium
1Mach 2.36
et non responderunt eis nec oppilaverunt loca occulta
1Mach 2.37
dicentes moriamur omnes in simplicitate nostra et testes erunt super nos caelum et terra quod iniuste perditis nos
1Mach 2.38
et intulerunt eis bellum sabbatis et mortui sunt ipsi et uxores eorum et filii eorum et pecora eorum usque ad mille animas hominum
1Mach 2.39
et cognovit Matthathias et amici eius et luctum habuerunt super eos valde
1Mach 2.40
et dixit vir proximo suo si omnes fecerimus sicut fratres nostri fecerunt et non pugnaverimus adversus gentes pro animabus nostris et iustificationibus nostris citius disperdent nos a terra
1Mach 2.41
et cogitaverunt in illa die dicentes omnis homo quicumque venerit ad nos in bello die sabbatorum pugnemus adversus eum et non moriemur omnes sicut mortui sunt fratres nostri in occultis
1Mach 2.42
tunc congregata est ad eos synagoga Asideorum fortis viribus ex Israhel omnis voluntarius in lege
1Mach 2.43
et omnes qui fugiebant a malis additi sunt ad eos et facti sunt illis ad firmamentum
1Mach 2.44
et collegerunt exercitum et percusserunt peccatores in ira sua et viros iniquos in indignatione sua et ceteri fugerunt ad nationes ut evaderent
1Mach 2.45
et circuivit Matthathias et amici eius et destruxerunt aras
1Mach 2.46
et circumciderunt pueros incircumcisos quotquot invenerunt in finibus Israhel in fortitudine
1Mach 2.47
et persecuti sunt filios superbiae et prosperatum est opus in manu eorum
1Mach 2.48
et obtinuerunt legem de manibus gentium et de manibus regum et non dederunt cornu peccatori
1Mach 2.49
et adpropinquaverunt dies Matthathiae moriendi et dixit filiis suis nunc confortata est superbia et castigatio et tempus eversionis et ira indignationis
1Mach 2.50
nunc ergo o filii aemulatores estote legis et date animas vestras pro testamento patrum
1Mach 2.51
et mementote operum patrum quae fecerunt in generationibus suis et accipietis gloriam magnam et nomen aeternum
1Mach 2.52
Abraham nonne in temptatione inventus est fidelis et reputatum est ei ad iustitiam
1Mach 2.53
Ioseph in tempore angustiae suae custodivit mandatum et factus est dominus Aegypti
1Mach 2.54
Finees pater noster zelando zelum Dei accepit testamentum sacerdotii aeterni
1Mach 2.55
Iesus dum implet verbum factus est dux Israhel
1Mach 2.56
Chaleb dum testificatur in ecclesia accepit hereditatem
1Mach 2.57
David in sua misericordia consecutus est sedem regni in saecula
1Mach 2.58
Helias dum zelat zelum legis receptus est in caelum
1Mach 2.59
Ananias Azarias Misahel credentes liberati sunt de flamma
1Mach 2.60
Danihel in sua simplicitate liberatus est de ore leonum
1Mach 2.61
et ita cogitate per generationem et generationem quia omnes qui sperant in eum non infirmantur
1Mach 2.62
et a verbis viri peccatoris non timueritis quia gloria eius stercus et vermis est
1Mach 2.63
hodie extollitur et cras non invenietur quia conversus est in terram suam et cogitatio eius periet
1Mach 2.64
vos ergo filii confortamini et viriliter agite in lege quia in ipsa gloriosi eritis
1Mach 2.65
et ecce Simeon frater vester scio quod vir consilii est ipsum audite semper et ipse vobis erit pater
1Mach 2.66
et Iudas Macchabeus fortis viribus a iuventute sua sit vobis princeps militiae et ipse aget bellum populi
1Mach 2.67
et vos adducetis ad vos omnes factores legis et vindicate vindictam populi vestri
1Mach 2.68
et retribuite retributionem gentibus et intendite in praeceptum legis
1Mach 2.69
et benedixit eos et adpositus est ad patres suos
1Mach 2.70
et defunctus est centesimo et quadragesimo et sexto anno et sepultus est a filiis suis in sepulchris patrum suorum in Modin et planxerunt eum omnis Israhel planctu magno
