1Mach 4

Teljes szövegű keresés

1Mach 4
1Mach 4.1
et adsumpsit Gorgias quinque milia virorum et mille equites electos et moverunt castra nocte
1Mach 4.2
ut adplicarent ad castra Iudaeorum et percuterent eos subito et filii qui erant ex arce erant illi duces
1Mach 4.3
et audivit Iudas et surrexit ipse et potentes percutere virtutem exercituum regis quae erat in Ammaum
1Mach 4.4
adhuc enim dispersus erat exercitus a castris
1Mach 4.5
et venit Gorgias in castra Iudae noctu et neminem invenit et quaerebant eos in montibus quoniam dixit fugiunt hii a nobis
1Mach 4.6
et cum dies factus esset apparuit Iudas in campo cum tribus milibus virorum tantum quia tegumenta et gladios non habebant
1Mach 4.7
et viderunt castra gentium valida et loricatos et equitatus in circuitu eorum et hii docti proelium
1Mach 4.8
et ait Iudas viris qui secum erant ne timueritis multitudinem eorum et impetum eorum ne formidetis
1Mach 4.9
mementote qualiter salvi facti sunt patres nostri in mari Rubro cum sequeretur eos Pharao cum exercitu
1Mach 4.10
et nunc clamemus in caelum et miserebitur nostri et testamenti patrum nostrorum et conteret exercitum istum ante faciem nostram hodie
1Mach 4.11
et scient omnes gentes quia est qui redimat et liberet Israhel
1Mach 4.12
et levaverunt alienigenae oculos suos et viderunt eos venientes ex adverso
1Mach 4.13
et exierunt de castris in proelium et tuba cecinerunt hii qui fuerant cum Iuda
1Mach 4.14
et congressi sunt et contritae sunt gentes et fugerunt in campum
1Mach 4.15
novissimi autem ceciderunt gladio et persecuti sunt eos usque Gesoron et usque in campos Idumeae et Azoti et Iamniae et ceciderunt ex illis ad tria milia virorum
1Mach 4.16
et reversus est Iudas et exercitus eius sequens eum
1Mach 4.17
et dixit ad populum non concupiscatis spolia quia bellum contra nos est
1Mach 4.18
et Gorgias et exercitus eius in monte prope nos sed state contra inimicos nostros et expugnate eos et post hoc sumetis spolia
1Mach 4.19
et adhuc loquente Iuda haec apparuit pars quaedam prospiciens de monte
1Mach 4.20
et vidit quod in fugam conversi sunt et succensa sunt castra fumus enim qui videbatur declarabat quod factum est
1Mach 4.21
quibus illi conspectis timuerunt valde aspicientes simul et Iudam et exercitum in campo paratum ad proelium
1Mach 4.22
et fugerunt omnes in campo alienigenarum
1Mach 4.23
et Iudas reversus est ad spolia castrorum et acceperunt aurum multum et argentum et hyacinthum et purpuram marinam et opes magnas
1Mach 4.24
et conversi hymnum canebant et benedicebant in caelum quoniam bonum est quoniam in saeculum misericordia eius
1Mach 4.25
et facta est salus magna in Israhel in illa die
1Mach 4.26
quicumque autem alienigenarum evaserunt venerunt et nuntiaverunt Lysiae universa quae acciderant
1Mach 4.27
quibus auditis ille consternatus est animo deficiebat quod non qualia voluit talia contigerunt in Israhel et qualia mandavit rex
1Mach 4.28
et sequenti anno congregavit electorum virorum sexaginta milia et equitum quinque milia ut debellaret eos
1Mach 4.29
et venerunt in Iudaeam et castra posuerunt in Bethoron et occurrit illis Iudas cum decem milibus viris
1Mach 4.30
et viderunt exercitum fortem et oravit et dixit benedictus es salvator Israhel qui contrivisti impetum potentis in manu servi tui David et tradidisti castra alienigenarum in manus Ionathae filii Saul et armigeri eius
1Mach 4.31
conclude exercitum istum in manu populi tui Israhel et confundantur in exercitu suo et equitibus
1Mach 4.32
da illis formidinem et tabefac audaciam virtutis eorum et commoveantur contritione sua
1Mach 4.33
deice eos gladio diligentium te et conlaudent te omnes qui noverunt nomen tuum in hymnis
1Mach 4.34
et commiserunt et ceciderunt de exercitu Lysiae quinque milia virorum
1Mach 4.35
videns autem Lysias suorum fugam et Iudaeorum audaciam et quod parati sunt aut vivere aut mori fortiter abiit Antiochiam et elegit milites ut multiplicatus rursus veniret in Iudaeam
1Mach 4.36
dixit autem Iudas et fratres eius ecce contriti sunt inimici nostri ascendamus nunc mundare sancta et renovare
1Mach 4.37
et congregatus est omnis exercitus et ascenderunt in montem Sion
1Mach 4.38
et viderunt sanctificationem desertam et altare profanatum et portas exustas et in atriis virgulta nata sicut in saltu vel montibus et pastoforia diruta
1Mach 4.39
sciderunt vestimenta sua et planxerunt planctu magno et inposuerunt cinerem
1Mach 4.40
et ceciderunt in faciem super terram et exclamaverunt tubis signorum et clamaverunt in caelum
1Mach 4.41
tunc ordinavit Iudas viros ut pugnarent adversus eos qui erant in arce donec emundarent sancta
1Mach 4.42
et elegit sacerdotes sine macula voluntatem habentes in lege Dei
1Mach 4.43
et mundaverunt sancta et tulerunt lapides contaminationis in locum inmundum
1Mach 4.44
et cogitavit de altare holocaustorum quod profanatum erat quid de eo faceret
1Mach 4.45
et incidit illi consilium bonum ut destrueret illud ne forte esset illis in obprobrium quia contaminaverunt illud gentes et demoliti sunt illud
1Mach 4.46
et reposuerunt lapides in monte domus in loco apto quoadusque veniret propheta et responderet de eis
1Mach 4.47
et acceperunt lapides integros secundum legem et aedificaverunt altare novum secundum illud quod fuit prius
1Mach 4.48
et aedificaverunt sancta et quae intra domum intrinsecus et aedem et atria sanctificaverunt
1Mach 4.49
et fecerunt vasa sancta nova et intulerunt candelabrum et altare incensorum et mensam in templum
1Mach 4.50
et incensum posuerunt super altare et accenderunt lucernas quae super candelabrum erant et lucebant in templo
1Mach 4.51
et posuerunt super mensam panes et adpenderunt vela et consummaverunt omnia opera quae fecerunt
1Mach 4.52
et ante matutinum surrexerunt quinta et vicesima mensis noni hic mensis casleu centesimi quadragesimi octavi anni
1Mach 4.53
et obtulerunt sacrificium secundum legem super altare holocaustorum novum quod fecerunt
1Mach 4.54
secundum tempus et secundum diem in qua contaminaverunt illud gentes in ipsa renovatum est in canticis et citharis et cinyris et cymbalis
1Mach 4.55
et cecidit omnis populus et adoraverunt et benedixerunt in caelum ei qui prosperavit eis
1Mach 4.56
et fecerunt dedicationem altaris diebus octo et obtulerunt holocausta cum laetitia et salutaria laudis
1Mach 4.57
et ornaverunt faciem templi coronis aureis et scutulis et dedicaverunt portas et pastoforia et inposuerunt eis ianuas
1Mach 4.58
et facta est laetitia in populo magna valde et aversum est obprobrium gentium
1Mach 4.59
et statuit Iudas et fratres eius et universa ecclesia Israhel ut agatur dies dedicationis altaris in temporibus suis ab anno in annum per dies octo a quinta et vicesima mensis casleu cum laetitia et gaudio
1Mach 4.60
et aedificaverunt in tempore illo montem Sion et per circuitum muros altos et turres firmas nequando venirent gentes et conculcarent eam sicut antea fecerunt
1Mach 4.61
et conlocavit illic exercitum ut servarent eam et munivit eam ad custodiendam Bethsuram ut haberet populus munitionem contra faciem Idumeae

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages