1Mach 7

Teljes szövegű keresés

1Mach 7
1Mach 7.1
anno centesimo quinquagesimo et primo exiit Demetrius Seleuci filius ab urbe Roma et ascendit cum paucis viris in civitatem maritimam et regnavit illic
1Mach 7.2
et factum est ut ingressus est in domum regni patrum suorum conprehendit exercitus Antiochum et Lysiam ut adduceret eos ad eum
1Mach 7.3
et res ei innotuit et ait nolite mihi ostendere faciem eorum
1Mach 7.4
et occidit eos exercitus et sedit Demetrius super sedem regni sui
1Mach 7.5
et venerunt ad eum viri iniqui et impii ex Israhel et Alchimus dux eorum qui volebat fieri sacerdos
1Mach 7.6
et accusaverunt populum apud regem dicentes perdidit Iudas et fratres eius amicos tuos et nos disperdit de terra nostra
1Mach 7.7
nunc ergo mitte virum cui credis et eat et videat exterminium omne quod fecit nobis et regionibus regis et puniit omnes amicos eius et adiutores eorum
1Mach 7.8
et elegit rex ex amicis suis Bacchidem qui dominabatur trans Flumen magnum in regno et fidelem regi et misit eum
1Mach 7.9
et Alchimum impium constituit in sacerdotio et mandavit ei facere ultionem in filios Israhel
1Mach 7.10
et surrexerunt et venerunt cum exercitu magno in terram Iuda et miserunt nuntios et locuti sunt ad Iudam et fratres eius verbis pacificis in dolo
1Mach 7.11
et non intenderunt sermonibus eorum viderunt enim quia venerunt cum exercitu magno
1Mach 7.12
et convenerunt ad Alchimum et Bacchidem congregatio scribarum requirere quae iusta sunt
1Mach 7.13
et primi Asidei qui erant in filiis Israhel et exquirebant ab eis pacem
1Mach 7.14
dixerunt enim homo sacerdos de semine Aaron venit non decipiet nos
1Mach 7.15
et locutus est cum eis verba pacifica et iuravit illis dicens non inferemus vobis malum neque amicis vestris
1Mach 7.16
et crediderunt ei et conprehendit ex eis sexaginta viros et occidit eos in una die secundum verbum quod scriptum est
1Mach 7.17
carnes sanctorum tuorum et sanguinem ipsorum effuderunt in circuitu Hierusalem et non erat qui sepeliret
1Mach 7.18
et incubuit timor et tremor in omnem populum quia dixerunt non est ei veritas et iudicium transgressi sunt enim constitutum et iusiurandum quod iuraverunt
1Mach 7.19
et movit Bacchides castra ab Hierusalem et adplicuit in Bethzetha et misit et conprehendit multos ex eis qui a se refugerant et quosdam de populo mactavit et in puteum magnum proiecit
1Mach 7.20
et commisit regionem Alchimo et reliquit cum eo auxilium in adiutorium ipsi et abiit Bacchides ad regem
1Mach 7.21
et satis agebat Alchimus pro principatu sacerdotii sui
1Mach 7.22
et convenerunt ad eum omnes qui perturbabant populum suum et obtinuerunt terram Iuda et fecerunt plagam magnam in Israhel
1Mach 7.23
et vidit Iudas omnia mala quae fecit Alchimus et qui cum eo erant in filios Israhel plus multo quam gentes
1Mach 7.24
et exiit in omnes fines Iudae in circuitu et fecit vindictam in viros desertores et cessaverunt ultra exire in regionem
1Mach 7.25
vidit autem Alchimus quod praevaluit Iudas et qui cum eo sunt et cognovit quia non potest sustinere eos et regressus est ad regem et accusavit eos multis criminibus
1Mach 7.26
et misit rex Nicanorem unum ex principibus suis nobilioribus qui erat inimicitias exercens contra Israhel et mandavit ei evertere populum
1Mach 7.27
et venit Nicanor in Hierusalem cum exercitu magno et misit ad Iudam et ad fratres eius cum dolo verbis pacificis
1Mach 7.28
dicens non sit pugna inter me et vos veniam cum viris paucis et videam facies vestras cum pace
1Mach 7.29
et venit ad Iudam et salutaverunt se invicem pacifice et hostes parati erant rapere Iudam
1Mach 7.30
et innotuit sermo Iudae quoniam cum dolo venerat ad eum et conterritus est ab eo et amplius noluit videre faciem eius
1Mach 7.31
et cognovit Nicanor quoniam denudatum est consilium eius et exivit obviam Iudae in pugnam iuxta Capharsalama
1Mach 7.32
et ceciderunt de Nicanoris fere quinque milia viri et fugerunt in civitatem David
1Mach 7.33
et post haec verba ascendit Nicanor in montem Sion et exierunt de sacerdotibus populi salutare eum in pace et demonstrare ei holocaustomata quae offerebantur pro rege
1Mach 7.34
et inridens sprevit eos et polluit et locutus est superbe
1Mach 7.35
et iuravit cum ira dicens nisi traditus fuerit Iudas et exercitus eius in manus meas continuo cum regressus fuero in pace succendam domum istam et exiit cum ira magna
1Mach 7.36
et intraverunt sacerdotes et steterunt ante faciem altaris et templi et flentes dixerunt
1Mach 7.37
tu elegisti domum istam Domine ad invocandum nomen tuum in ea ut esset domus orationis et obsecrationis populo tuo
1Mach 7.38
fac vindictam in homine isto et exercitu eius et cadant gladio memento blasphemias eorum et ne dederis eis ut permaneant
1Mach 7.39
et exiit Nicanor ab Hierusalem et castra adplicuit ad Bethoron et occurrit illi exercitus Syriae
1Mach 7.40
et Iudas adplicuit in Adarsa cum tribus milibus viris et oravit Iudas et dixit
1Mach 7.41
qui missi erant a rege Sennacherib Domine qui blasphemaverunt te exiit angelus et percussit ex eis centum octoginta quinque milia
1Mach 7.42
sic percute exercitum istum in conspectu nostro hodie et sciant ceteri quia male locutus est super sancta tua et iudica illum secundum malitiam illius
1Mach 7.43
et commiserunt exercitus proelium tertiadecima die mensis adar et contrita sunt castra Nicanoris et cecidit ipse primus in proelio
1Mach 7.44
ut vidit autem exercitus eius quia cecidit Nicanor proiecerunt arma sua et fugerunt
1Mach 7.45
et persecuti sunt eos viam diei unius ab Adasor usquequo veniatur Gazera et tubis cecinerunt post eos cum significationibus
1Mach 7.46
et exierunt de omnibus castellis Iudae in circuitu et ventilabant eos cornibus et convertebantur iterum ad eos et ceciderunt omnes gladio et non est relictus ex eis nec unus
1Mach 7.47
et acceperunt spolia eorum et praedam et caput Nicanoris amputaverunt et dexteram eius quam extenderat superbe et adtulerunt et suspenderunt contra Hierusalem
1Mach 7.48
et laetatus est populus valde et egerunt diem illam in laetitia magna
1Mach 7.49
et constituit agi omnibus annis diem istam tertiadecima die mensis adar
1Mach 7.50
et siluit terra Iuda dies paucos

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages