1Mach 8

Teljes szövegű keresés

1Mach 8
1Mach 8.1
et audivit Iudas nomen Romanorum quia sunt potentes viribus et adquiescunt ad omnia quae postulantur ab eis et quicumque accesserunt ad eos statuerunt cum eis amicitias et quia sunt potentes viribus
1Mach 8.2
audierunt proelia eorum et virtutes bonas quas faciunt in Galatia quia obtinuerunt eos et duxerunt sub tributum
1Mach 8.3
et quanta fecerunt in regione Hispaniae et quod in potestate redegerunt metalla argenti et auri quae illic sunt et possederunt omnem locum consilio suo et patientia
1Mach 8.4
locos qui longe erant valde ab eis et reges qui supervenerant illis ab extremis terrae contriverunt et percusserunt eos plaga magna ceteri autem dant eis tributum omnibus annis
1Mach 8.5
et Philippum et Persen Citiorum regem et ceteros qui adversus eos arma tulerunt contriverunt bello et obtinuerunt eos
1Mach 8.6
et Antiochum magnum regem Asiae qui eis pugnam intulerat habens centum viginti elefantos et exercitum magnum valde contritum ab eis
1Mach 8.7
et quia ceperunt eum vivum et statuerunt ei ut daret ipse et qui regnaverint post eum tributum magnum et daret obsides et constitutum
1Mach 8.8
et regionem Medorum et Lydos et Medos de optimis regionibus eorum et acceptas eas ab illis dederunt Eumeni regi
1Mach 8.9
et quia qui erant apud Elladam voluerunt ire et tollere eos et innotuit sermo his
1Mach 8.10
et miserunt ad eos ducem unum et pugnaverunt contra illos et ceciderunt ex eis multi et captivas duxerunt uxores eorum et filios et diripuerunt eos et terram eorum possederunt et destruxerunt muros eorum et in servitutem illos redegerunt usque in hunc diem
1Mach 8.11
et residua regna et insulas quae aliquando restiterant illis exterminaverunt et in potestatem redegerunt
1Mach 8.12
cum amicis autem suis et qui in ipsis requiem habebant conservaverunt amicitiam et obtinuerunt regna quae erant proxima et quae longe quia quicumque audiebant nomen eorum timebant eos
1Mach 8.13
quibus vero vellent auxilio esse ut regnarent regnabant et exaltati sunt valde
1Mach 8.14
et in omnibus istis nemo portabat diadema nec induebatur purpura ut magnificaretur in ea
1Mach 8.15
et quia curiam fecerunt sibi et cotidie consulebant trecentos viginti consilium agentes semper de multitudine ut quae digna sunt gerant
1Mach 8.16
et committunt uni homini magistratum suum per singulos annos dominari universae terrae suae et omnes oboediunt uni et non est invidia neque zelus inter eos
1Mach 8.17
et elegit Iudas Eupolemum filium Iohannis filii Iacob et Iasonem filium Eleazari et misit eos Romam constituere cum illis amicitiam et societatem
1Mach 8.18
et ut auferrent ab eis iugum Graecorum quia viderunt quod in servitutem premerent regnum Israhel
1Mach 8.19
et abierunt Romam viam multam valde et introierunt curiam et dixerunt
1Mach 8.20
Iudas Macchabeus et fratres eius et populus Iudaeorum miserunt nos ad vos statuere vobiscum societatem et pacem et conscribi nos socios et amicos vestros
1Mach 8.21
et placuit sermo in conspectu eorum
1Mach 8.22
et hoc rescriptum quod rescripserunt in tabulis aereis et miserunt Hierusalem ut esset apud eos ibi memoriale pacis et societatis
1Mach 8.23
bene sit Romanis et genti Iudaeorum in mari et in terra in aeternum gladiusque et hostis procul sit ab eis
1Mach 8.24
quod si institerit bellum Romanis prius aut omnibus sociis eorum in omni dominatione eorum
1Mach 8.25
auxilium feret gens Iudaeorum prout tempus dictaverit corde pleno
1Mach 8.26
et proeliantibus non dabunt neque subministrabunt triticum arma pecuniam naves sicut placuit Romanis et custodient mandata eorum nihil ab eis accipientes
1Mach 8.27
similiter autem et si genti Iudaeorum prius acciderit bellum adiuvabunt Romani ex animo prout eis tempus permiserit
1Mach 8.28
et adiuvantibus non dabitur triticum arma pecunia naves sicut placuit Romanis et custodiant mandata eorum absque dolo
1Mach 8.29
secundum haec verba constituerunt Romani populo Iudaeorum
1Mach 8.30
quod si post haec verba hii aut illi addere vel demere ad haec aliquid voluerint facient ex proposito suo et quaecumque addiderint vel dempserint rata erunt
1Mach 8.31
sed et de malis quae Demetrius rex fecit in eos scripsimus ei dicentes quare gravasti iugum tuum super amicos nostros et socios Iudaeos
1Mach 8.32
si ergo iterum adierint nos adversum te faciemus illis iudicium et pugnabimus tecum mari terraque

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages