Sap 10
Sap 10
Sap 10.1
haec illum qui primus finctus est patrem orbis terrarum cum solus esset creatus custodivit
Sap 10.2
et eduxit illum a delicto suo et dedit illi virtutem continendi omnia
Sap 10.3
ab hac ut recessit iniustus in ira sua per iram homicidii fraternitatis deperiit
Sap 10.4
propter quem cum aqua deleret terram iterum sanavit sapientia per contemptibile lignum iustum gubernans
Sap 10.5
haec et in consensu nequitiae cum se nationes contulissent scivit iustum et servavit sine querella Deo et in filii misericordia fortem custodivit
Sap 10.6
haec iustum a pereuntibus impiis liberavit fugientem descendentem ignem in Pentapoli
Sap 10.7
cuius in testimonium nequitiae fumigabunda constat deserta terra et incerto tempore fructus habentes arbores et incredibilis animae memoria stans figmentum salis
Sap 10.8
sapientiam enim praetereuntes non tantum in hoc lapsi sunt ut ignorarent bona sed et insipientiae suae reliquerunt hominibus memoriam ut in his quae peccaverunt nec latere potuissent
Sap 10.9
sapientia autem hos qui se observant a doloribus liberavit
Sap 10.10
haec profugum irae fratris iustum deduxit per vias rectas et ostendit illi regnum Dei et dedit illi scientiam sanctorum honestavit illum in laboribus et conplevit labores illius
Sap 10.11
in fraude circumvenientium illum adfuit et honestum illum fecit
Sap 10.12
custodivit illum ab inimicis et a seductoribus tutavit eum et certamen forte dedit illi ut vinceret ut sciret quoniam omnium potentior est sapientia
Sap 10.13
haec venditum iustum non dereliquit sed a peccatoribus liberavit illum descendit cum illo in foveam
Sap 10.14
et in vinculis non dereliquit illum donec adferret illi sceptrum regni et potentiam adversus eos qui eum deprimebant et mendaces ostendit qui maculaverunt ipsum et dedit illi claritatem aeternam
Sap 10.15
haec populum iustum et semen sine querella liberavit a nationibus quae illum conprimebant
Sap 10.16
intravit in animam servi Domini et stetit contra reges horrendos in portentis et signis
Sap 10.17
et reddidit iustis mercedem laborum suorum et deduxit illos in via mirabili et fuit illis in velamento diei et in luce stellarum nocte
Sap 10.18
transtulit illos mare Rubrum et transvexit illos per aquam nimiam
Sap 10.19
inimicos autem illorum demersit in mare et ab altitudine inferorum eduxit illos ideo iusti tulerunt spolia impiorum
Sap 10.20
et decantaverunt Domine nomen sanctum tuum et victricem manum tuam laudaverunt pariter
Sap 10.21
quoniam sapientia aperuit os mutorum et linguas infantium fecit dissertas
