Sap 16
Sap 16
Sap 16.1
propter hoc per his similia passi sunt digne tormenta et per multitudinem bestiarum exterminati sunt
Sap 16.2
pro quibus tormentis bene disposuisti populum tuum quibus dedisti concupiscentiam delectamenti sui novum saporem escam parans eis ortygometram
Sap 16.3
ut illi quidem concupiscentes escam propter ea quae illis ostensa et missa sunt etiam a necessaria concupiscentia averterentur hi autem in brevi inopes facti novam gustaverunt escam
Sap 16.4
oportebat enim illis quidem sine excusatione supervenire interitum exercentibus tyrannidem his autem tantum ostendere quemadmodum inimici illorum exterminabantur
Sap 16.5
etenim cum supervenit illis saeva bestiarum ira morsibus perversarum colubrarum exterminabantur
Sap 16.6
non in perpetuum permansit ira tua sed ad correptionem in brevi turbati sunt signum habentes salutis ad commemorationem mandati legis tuae
Sap 16.7
qui enim conversus est non per hoc quod videbat sanabatur sed per te omnium salvatorem
Sap 16.8
et in hoc autem ostendisti inimicis nostris quia tu es qui liberas ab omni malo
Sap 16.9
illos enim lucustarum et muscarum occiderunt morsus et non est inventa sanitas animae illorum quia digni erant ab huiusmodi exterminari
Sap 16.10
filios autem tuos nec draconum venenatorum vicerunt dentes misericordia enim tua adveniens sanabat illos
Sap 16.11
in memoria enim sermonum tuorum examinabantur et salvabantur ne in altam incidentes oblivionem non possent tuo uti adiutorio
Sap 16.12
etenim neque herba neque malagma sanavit illos sed tuus Domine sermo qui sanat omnia
Sap 16.13
tu enim vitae et mortis habes potestatem et deducis ad portas mortis et reducis
Sap 16.14
homo autem occidit quidem per malitiam animam suam et cum exibit spiritus non revertetur nec revocabit animam quae recepta est
Sap 16.15
sed tuam manum effugere inpossibile est
Sap 16.16
negantes enim nosse te impii per fortitudinem brachii tui flagellati sunt novis aquis et grandinibus et pluviis persecutionem passi et per ignem consummati
Sap 16.17
quod enim mirabile erat in aqua quae omnia extinguit plus ignis valebat vindex est enim orbis iustorum
Sap 16.18
quodam enim tempore mansuetabatur ignis ne conburerentur quae ad impios missa erant animalia sed ut ipsi videntes scirent quoniam Dei iudicio patiuntur persecutionem
Sap 16.19
et quodam tempore in aqua super virtutem ignis ardebat ut iniquae terrae nationem exterminaret
Sap 16.20
pro quibus angelorum esca nutristi populum tuum et paratum panem e caelo praestitisti illis sine labore omne delectamentum in se habentem et omnis saporis suavitatem
Sap 16.21
substantia enim tua dulcedinem tuam quam in filios habes ostendebat et serviens uniuscuiusque voluntati ad quod quis volebat convertebatur
Sap 16.22
nix autem et glacies sustinebant vim ignis et non tabescebant ut scirent quoniam fructus inimicorum exterminabat ignis ardens in grandine et pluvia coruscans
Sap 16.23
hoc autem iterum ut nutrirentur iusti etiam suae virtutis oblitus est
Sap 16.24
creatura enim tibi factori deserviens excandescit in tormentum adversus iniustos et lenior fit ad benefaciendum pro his qui in te confidunt
Sap 16.25
propter hoc et tunc in omnia transfigurata omnium nutrici gratiae tuae deserviebant ad voluntatem horum qui a te desiderati sunt
Sap 16.26
ut scirent filii tui quos dilexisti Domine quoniam non nativitatis fructus pascunt homines sed sermo tuus hos qui in te crediderint conservat
Sap 16.27
quod enim ab igni non poterat exterminari statim ab exiguo radio solis calefactum tabescebat
Sap 16.28
ut notum omnibus esset quoniam oportet praevenire solem ad benedictionem tuam et ad orientem lucis tibi adorare
Sap 16.29
ingrati enim fides tamquam hibernalis glacies tabescit et disperiet tamquam aqua supervacua
