Sap 19
Sap 19
Sap 19.1
impiis autem usque in novissimum sine misericordia ira supervenit praesciebat enim et futura illorum
Sap 19.2
quoniam ipsi cum reversi essent ut se ducerent et cum magna sollicitudine praemisissent illos consequebantur illos paenitentia acti
Sap 19.3
adhuc enim inter manus habentes luctus et deplorantes ad monumenta mortuorum aliam sibi adsumpserunt cogitationem inscientiae et quos rogantes proiecerunt hos tamquam fugitivos persequebantur
Sap 19.4
ducebat enim illos ad hunc finem digna necessitas et horum quae acciderant memorationem amittebant
Sap 19.5
ut eam quae deerat tormentis replerent punitionem et populus quidem tuus mirabiliter transiret illi autem novam mortem invenirent
Sap 19.6
omnis enim creatura ad suum genus ab initio refigurabatur deserviens tuis praeceptis ut pueri tui custodirentur inlaesi
Sap 19.7
nam nubis castra eorum adumbrabat et ex aqua quae ante erat terra arida apparuit et ex mari Rubro via sine inpedimento et campus germinans de profundo nimio
Sap 19.8
per quem omnis natio transivit quae tegebatur tua manu videntes mirabilia monstra
Sap 19.9
tamquam equi enim depaverunt et tamquam agni exultaverunt magnificantes te Domine qui liberasti illos
Sap 19.10
memores enim erant adhuc eorum quae in incolatu illorum facta fuerant quemadmodum pro natione animalium eduxit terra muscas et pro piscibus eructavit fluvius multitudinem ranarum
Sap 19.11
novissime autem viderunt novam creaturam avium cum abducti concupiscentia postulaverunt escam epulationis
Sap 19.12
in adlocutione enim desiderii ascendit illis de mari ortygometra et vexationes peccatoribus supervenerunt non sine illis quae ante facta erant argumentis per vim fluminum iuste enim patiebantur secundum suas nequitias
Sap 19.13
etenim detestabiliorem inhospitalitatem instituerunt alii quidem ignotos non recipiebant advenas alii autem bonos hospites in servitutem accipiebant
Sap 19.14
et non solum hoc sed et alius quis respectus erit illorum quoniam inviti recipiebant extraneos
Sap 19.15
qui autem cum laetitia receperunt hos qui eisdem usi erant iustitiis saevissimis adflixerunt doloribus
Sap 19.16
percussi sunt autem caecitate sicut illi in foribus iusti cum subitaneis cooperti essent tenebris unusquisque ostii sui transitum quaerebat
Sap 19.17
in se enim elementa dum convertuntur sicut in organo qualitatis sonus inmutatur et omnia suum sonum custodiunt unde est aestimare et ex ipso certo visu
Sap 19.18
agrestia enim in aquatica convertebantur et quaecumque erant natantia in terram transiebant
Sap 19.19
ignis in aqua valebat supra suam virtutem et aqua extinguentis naturae obliviscebatur
Sap 19.20
flammae e contrario corruptibilium animalium non vexaverunt carnes coambulantium nec dissolvebant illam quae facile dissolvitur sicut glacies bonam escam in omnibus enim Domine magnificasti populum tuum et honorasti et non despexisti in omni tempore et in omni loco adsistens eis
