Sap 3
Sap 3
Sap 3.1
iustorum autem animae in manu Dei sunt et non tanget illos tormentum mortis
Sap 3.2
visi sunt in oculis insipientium mori et aestimata est adflictio exitus illorum
Sap 3.3
et quod a nobis est iter exterminii illi autem sunt in pace
Sap 3.4
et si coram hominibus tormenta passi sunt spes illorum inmortalitate plena est
Sap 3.5
et in paucis vexati in multis bene disponentur quoniam Deus tentavit illos et invenit illos dignos se
Sap 3.6
tamquam aurum in fornace probavit illos et quasi holocausta hostiam accepit illos et in tempore erit respectus illorum
Sap 3.7
fulgebunt et tamquam scintillae in harundineto discurrent
Sap 3.8
iudicabunt nationes et dominabuntur populis et regnabit Dominus illorum in perpetuum
Sap 3.9
qui confidunt in illum intellegent veritatem et fideles in dilectione adquiescent illi quoniam donum et pax est electis illius
Sap 3.10
impii autem secundum quae cogitaverunt correptionem habebunt qui neglexerunt iustum et a Domino recesserunt
Sap 3.11
sapientiam enim et disciplinam qui abicit infelix est et vacua est spes illorum et labores sine fructu et inhabitabilia opera illorum sunt
Sap 3.12
mulieres eorum insensatae sunt et nequissimi filii eorum
Sap 3.13
maledicta creatura illorum quoniam felix sterilis incoinquinata quae non scivit torum in delicto habebit fructum in respectione animarum
Sap 3.14
et spado qui non operatus est per manus suas iniquitatem nec cogitavit adversus Deum nequissima dabitur enim illi fidei donum electum et sors in templo Domini acceptissima
Sap 3.15
bonorum enim laborum gloriosus est fructus et quae non concidat radix sapientiae
Sap 3.16
filii autem adulterorum inconsummati erunt et ab iniquo toro semen exterminabitur
Sap 3.17
et si quidem longae vitae erunt in nihilum conputabuntur et sine honore erit novissima senectus illorum
Sap 3.18
et si celerius defuncti fuerint non habebunt spem nec in die agnitionis adlocutionem
Sap 3.19
nationis enim iniquae dirae sunt consummationes
