2Mach 10

Teljes szövegű keresés

2Mach 10
2Mach 10.1
Macchabeus autem et qui cum illo erant Domino se protegente templum quidem et civitatem recepit
2Mach 10.2
aras autem quas alienigenae per plateas extruxerant itemque delubra demolitus est
2Mach 10.3
et purgato templo aliud altare fecerunt et de ignitis lapidibus igne concepto obtulerunt sacrificia post biennium et incensum et lucernas et panes propositionis posuerunt
2Mach 10.4
quibus gestis rogabant Dominum prostrati in terram ne amplius malis talibus inciderent sed et si quando peccassent ut ab ipso mitius corriperentur et non blasphemis ac barbaris hominibus traderentur
2Mach 10.5
qua die autem templum ab alienigenis pollutum fuerat contigit eadem die purgationem fieri vicesima et quinta mensis qui fuit casleu
2Mach 10.6
et cum laetitia diebus octo egerunt in modum tabernaculorum recordantes quod ante modicum temporis diem sollemnem tabernaculorum in montibus more bestiarum egerant
2Mach 10.7
propter quod tyrsos et ramos virides et palmas praeferebant ei qui prosperavit mundari locum suum
2Mach 10.8
et decreverunt communi praecepto et decreto universae genti Iudaeorum omnibus annis agere dies istos
2Mach 10.9
et Antiochi quidem qui appellatus est Nobilis vitae excessus ita se habuit
2Mach 10.10
nunc autem de Eupatore Antiochi filio impii quae gesta sunt narrabimus breviantes mala quae in bellis gesta sunt
2Mach 10.11
hic suscepto regno constituit super negotia regni Lysiam quendam Foenicis et Syriae militiae principem
2Mach 10.12
nam Ptolomeus qui dicebatur Macer iusti tenax erga Iudaeos esse instituit et praecipue propter iniquitatem quae facta erat in eos et pacifice agere cum eis
2Mach 10.13
sed ob hoc accusatus ab amicis apud Eupatorem cum frequenter proditor audiret eo quod Cyprum creditus a Filometore Nobilem translatus etiam ab eo recessisset veneno vitam finivit
2Mach 10.14
Gorgias autem cum esset dux locorum adsumptis advenis frequenter Iudaeos debellabat
2Mach 10.15
Iudaei vero qui tenebant oportunas munitiones fugatos ab Hierosolymis suscipiebant et bellare temptabant
2Mach 10.16
hii vero qui erant cum Macchabeo per orationes Dominum rogantes ut esset sibi adiutor impetum fecerunt in munitiones Idumeorum
2Mach 10.17
multaque vi insistentes loca obtinuerunt occurrentes interemerunt et omnes simul non minus a viginti milibus trucidaverunt
2Mach 10.18
quidam autem cum confugissent in duas turres valde munitas omnem adparatum ad repugnandum habentes
2Mach 10.19
Macchabeus ad eorum expugnationem relicto Simone et Ioseppho item Macchabeo eisque qui cum ipsis erant satis multis ipse ad eas quae amplius perurguebant pugnas conversus est
2Mach 10.20
hii vero qui cum Simone erant cupiditate ducti a quibusdam qui in turribus erant suasi sunt pecunia et septuaginta milibus didragmis acceptis dimiserunt quosdam effugere
2Mach 10.21
cum autem Macchabeo nuntiatum esset quod factum est congregatis principibus populi accusavit quod pecunia fratres vendidissent adversariis eorum dimissis
2Mach 10.22
hos igitur proditores factos interfecit et confestim duas turres occupavit
2Mach 10.23
armis autem ac manibus omnia prospere agendo in duabus munitionibus plus quam viginti milia peremit
2Mach 10.24
Timotheus qui prius a Iudaeis fuerat superatus convocato exercitu peregrinae multitudinis et congregato exercitu asiano advenit quasi armis Iudaeam capturus
2Mach 10.25
Macchabeus autem et qui cum ipso erant adpropiante illo deprecabantur Deum caput terra aspergentes lumbosque ciliciis praecincti
2Mach 10.26
ad altaris crepidinem provoluti ut sibi propitius inimicis autem eorum esset inimicus et adversaretur sicut lex dicit
2Mach 10.27
et ita post orationem sumptis armis longius de civitate procedentes et proximi hostibus effecti resederunt
2Mach 10.28
primo autem solis ortu utrique commiserunt isti quidem victoriae et prosperitatis sponsorem cum virtute Dominum habentes illi autem ducem belli animum habebant
2Mach 10.29
sed cum vehemens pugna esset apparuerunt adversariis de caelo viri quinque in equis frenis aureis decori ducatum Iudaeis praestantes
2Mach 10.30
ex quibus duo Macchabeum medium habentes armis suis circumseptum incolomem conservabant in adversarios autem tela et fulmina iaciebant ex quo et caecitate confusi et repleti perturbatione cadebant
2Mach 10.31
interfecti sunt autem viginti milia quingenti et equites sescenti
2Mach 10.32
Timotheus autem confugit in Gazara praesidium munitum cui praeerat Caereas
2Mach 10.33
Macchabeus autem et qui cum eo erant laetantes obsederunt praesidium diebus quattuor
2Mach 10.34
at hii qui in turres erant loci firmitate confisi super modum maledicebant et sermones nefandos iactabant
2Mach 10.35
sed cum dies quinta inlucesceret viginti iuvenes ex his qui cum Macchabeo erant accensi animis propter blasphemiam viriliter accesserunt ad murum et feroci animo incedentes ascendebant
2Mach 10.36
sed et alii similiter ascendentes turres portasque succendere adgressi atque ipsos maledicos vivos concremare
2Mach 10.37
per continuum autem biduum praesidio vastato Timotheum occultantem se in quodam reppertum loco peremerunt et fratrem illius Caerean et Apollofanem occiderunt
2Mach 10.38
quibus gestis in hymnis et confessionibus benedicebant Dominum qui magna fecit cum Israhel et victoriam illi dedit

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages