2Mach 11

Teljes szövegű keresés

2Mach 11
2Mach 11.1
sed parvo post tempore Lysias procurator regis et propinquus ac negotiorum praepositus graviter ferens de his quae acciderant
2Mach 11.2
congregatis octoginta milibus et equitatu universo veniebat adversus Iudaeos existimans se civitatem quidem captam gentibus habitaculum facturum
2Mach 11.3
templum vero in pecuniae quaestu sicut cetera delubra gentium habiturum et per singulos annos venale sacerdotium
2Mach 11.4
nusquam recogitans Dei potestatem sed mente effrenatus in multitudine peditum et in milibus equitum et in octoginta elefantis confidebat
2Mach 11.5
ingressus autem Iudaeam et adpropians Bethsurae quod erat in angusto loco ab Hierosolyma intervallo quinque stadiorum illud praesidium expugnabat
2Mach 11.6
ut autem Macchabeus et qui cum eo erant cognoverunt expugnari praesidia cum fletu et lacrimis rogabant Dominum et omnis turba simul ut bonum angelum mitteret ad salutem Israhel
2Mach 11.7
et ipse primus Macchabeus sumptis armis ceteros adhortatus est simul secum periculum subire et ferre auxilium fratribus suis
2Mach 11.8
cumque pariter prompto animo procederent Hierosolymis apparuit praecedens eos eques in veste candida armis aureis hastam vibrans
2Mach 11.9
tum simul omnes benedixerunt misericordem Dominum et convaluerunt animis non solum homines sed et bestias ferocissimas et muros ferreos parati penetrare
2Mach 11.10
ibant igitur prompti de caelo habentes adiutorem et miserantem eos Dominum
2Mach 11.11
leonum autem impetu inruentes hostibus prostraverunt ex eis undecim milia peditum et equites mille sescentos
2Mach 11.12
universos autem in fugam verterunt plures vero ex eis vulnerati nudi evaserunt sed et ipse Lysias turpiter fugiens evasit
2Mach 11.13
et quia non insensatus erat secum ipse reputans factam erga se diminutionem et intellegens invictos esse Hebraeos Dei auxilio nitentes misit ad eos
2Mach 11.14
promisitque consensurum se omnibus quae iusta sunt et regem conpulsurum amicum fieri
2Mach 11.15
annuit autem Macchabeus precibus Lysiae in omnibus utilitati consulens et quaecumque Macchabeus scripsit Lysiae de Iudaeis ea rex concessit
2Mach 11.16
nam erant scriptae Iudaeis epistulae a Lysia quidem hunc modum continentes Lysias populo Iudaeorum salutem
2Mach 11.17
Iohannes et Abessalom qui missi sunt a vobis tradentes scripta postulabant ut ea quae per illos significabantur implerem
2Mach 11.18
quaecumque igitur regi potuerunt perferri exposui et quae res permittebat concessit
2Mach 11.19
si igitur in negotiis fidem conservaveritis etiam deinceps honorum vobis causa esse temptabo
2Mach 11.20
de ceteris autem per singula verbo mandavi et istis et his qui a me missi sunt conloqui vobiscum
2Mach 11.21
bene valete anno centesimo quadragesimo octavo dioscori die mensis vicesima et quarta
2Mach 11.22
regis autem epistula ista continebat rex Antiochus Lysiae fratri salutem
2Mach 11.23
patre nostro inter deos translato nos volentes eos qui sunt in regno nostro sine tumultu agere et rebus suis adhibere diligentiam
2Mach 11.24
audivimus Iudaeos non consensisse patri ut transferrentur ad ritum Graecorum sed tenere velle suum institutum ac propterea postulare concedi sibi legitima sua
2Mach 11.25
volentes igitur hanc quoque gentem quietam esse statuentes iudicavimus templum restitui illis ut agerent secundum maiorum suorum consuetudinem
2Mach 11.26
bene igitur feceris si miseris ad eos et dextram dederis ut cognita nostra voluntate bono animo sint et utilitatibus propriis deserviant
2Mach 11.27
ad Iudaeos autem regis epistula talis erat rex Antiochus senatui Iudaeorum et ceteris Iudaeis salutem
2Mach 11.28
si valetis sic estis ut volumus sed et ipsi bene valemus
2Mach 11.29
adiit nos Menelaus dicens velle vos descendere ad vestros qui sunt apud nos
2Mach 11.30
his igitur qui commeant usque ad diem tricesimum mensis xandici damus dextras securitatis
2Mach 11.31
ut Iudaei utantur cibis et legibus suis sicut et prius et nemo eorum ullo modo molestiam patiatur de his quae per ignorantiam gesta sunt
2Mach 11.32
misi autem et Menelaum qui vos adloquatur
2Mach 11.33
valete anno centesimo quadragesimo octavo xandici mensis quintadecima
2Mach 11.34
miserunt autem etiam Romani epistulam ita se habentem Quintus Memmius et Titus Manilius legati Romanorum populo Iudaeorum salutem
2Mach 11.35
de his quae Lysias cognatus regis concessit vobis et nos concessimus
2Mach 11.36
de quibus autem iudicavit referendum confestim aliquem mittite diligentius inter vos conferentes ut decernamus sicut congruit vobis nos enim Antiochiam accedimus
2Mach 11.37
ideoque festinate scribere ut nos quoque sciamus cuius estis voluntatis
2Mach 11.38
bene valete anno centesimo quadragesimo octavo quintadecima die mensis xandici

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages