VIII. Ottavio Baldigara javaslatai az egri építkezésekhez, 1578 december

Teljes szövegű keresés

VIII.
Ottavio Baldigara javaslatai az egri építkezésekhez,
1578 december506
506 ÖStA KA HKR Akt. 1578 December No. 108. Exp. fol. 1–9.
1. Octauio Waltigare Bit vnnderthenigist, Nachdem Euer Majestät bschlossen haben vber das gebew Erla, das Euer Majestät das Modell mit Jrer hannd vnnd sigill Wollte anchrefftigen, auch in den nachgschribnen Articln, so uil deren Euer Majestät gefellig, ein lateinische Jnsruction Verfertigen lassen.
2. Wenn es Euer Majestät gefellig, Jme Waldigare die gnad Zuthuen, das noch ain verstanndigen Paumaister mit Jme gen Erla gschickht wurde, mit wellchem Er gedachte fessten müge Aufrichten Zu besserer seiner verantwortung vnnd damit Euer Majestät desto besser gedient werde.
3. Es wierd Auch guet sein, das Euer Majestät ordnung geben, wieuil gelts Euer Majestät Aller Jar Auf diß gebew geben wellen, damit es wol von stat gehe, Auch verordnung thun, an welchen ort vnnd Zu waite Zeit es Zu hannden des Capitles von Erla erlegt soll werden, von dem der Zallmaister alle wochen die gebürnus Zuemphahu hette. [bek. mellett: erlegt soll werden]
4. Eur Majestät die wollen befelhen, das die heuser wegs brochen werden Ausserhalb der fessten, wo man die neuen Pasteien vnnd graben mueß machen, vnnd mit der Zeit Alle die heuser, die da sein, Aufs wenigist Auf 60 Clafftern weit, 105darZue Alle kheller einraiffen, die man schedlich befinden wird, das dardurch die fessten vnnder graben vnnd derselbigen schaden eruolgen möcht.
5. Eur Majestät wöllen bewilligen, das die Pasteien gegen der statt an den streich weren herauß aufs wenigist 15 Claffter brait baut werde, wie sollches an den hindern dreien pasteien gegen der statt Jm Modell Zusehen ist, mit khlainen punctl Ver Zaichnet. [mellette: stet bei Eur Majestät verschluß, mugen Jn ... ]
6. Das vom Anfang der streichwer biß An das Jnner Eckh, da die Zwo Cortina müesten Zusamen khomen, Zu dem Punct E. im Part Abriß, Aufs wenigist 18 biß in die 20 Claffter sei, wie man wierdt befinnden, das es an Ain Ort mer, als an dem Andern Von notten ist, damit man gueten Plaz Zu dem gschütz hab. [mellette: stet auch bei Jr Majestät]
7. Eur Majestät wollen bewilligen, wenn man die fessten Außsteckht, das mann mit dem gebew sich Aintweder bösser hinein oder herauß begeben müge nach glegenhait, wie es fur das besst An gesehen Vnnd Euer Majestät Am wenigisten Vncosten bringt. [mellette: steet bei Jr Majestät]
8. Jn dem Modell Vber Erla mit A. No. 3. vnnd B. No. 4. ist mit den Zallen A.1. G.2. H.3. N.4. et E.5. VerZaichnet, wie die pasteien, Cortina vnnd Alles gebeu nach einander, seinem guetbedunckhen nach, sollte verfertigt werden. Alßo das erinndert entblest, sonnder von tag Zu tag Zu merer sterckh vnnd sicherhait Aufkhäm, wan es Euer Majestät Alß gefellig ist. [mellette: auch bei Jr Majestät]
9. Eur Majestät wollen erleuben, das die Mauren der pasteien Am fundament 2 Claffter dickh seien, Jm Abriß A., vnnd die scarpa Also gemacht, das An 6 Clafftern der höche Ain Claffter brait, die Mauer vom vnnderisten grund hinein hennckhe. Die Pfeiller oder Contraforti mit B. sollen dickh sein ain Claffter an der Mauer, ainer von dem Andern ain Claffter 3 schuech, gestellt lang 2 Claffter 3 schuech, am spitz Jnwendig 3 schuech brait. Wenn es vom grund 3 Claffter Aufgfuert ist, so soll die Mauer Jnwendig Abgschnidten werden, das si nit mer, dan ain Claffter dickh sei, vnnd dann biß auf 4 oder 5 Claffter in die höch gefuert, wie sollches an den Zwo figuren A. vnnd B. Zusehen. Das vbrig an der höch soll man von gueten Erden machen, die brust wehr von 18 biß in die 21 schuech dickh, 6 1/2 schuech hoch, mit recht Außgethaillten schießlöchern, welche man allZeit Ausfullen vnnd andern an andern Orten machen khan, wie es die Notturfft erfordert. Die Mauren, Pfeiller vnnd Alles Annderes soll man machen grössen vnd klheiner, weiter vnnd Näherer bei einannder, wie es iederes orts glegenhait selbst dargibt. [mellette: stet auch bei Jr Majestät]
10. Das auch Allenthalben herumb ein druckner gräben, Allain der Mitler Blind graben mit wasser voll sein, wie es die 2 Pastein E. vnd F. in abriß Zusehen, darein sollen gmacht werden Viereckhet grueben, Jn form eines schachs, Ain oder Anderthalben schuechs tieff, vnd wiederumb ein solhe vierekheten plaz darneben erhöcht eins, VerZaichnet ist vmb die 2 basteien E. vnnd F., damit, wen die feindt drein khumben, vnuersehens drinen fallen müessen, vnnd da es gegen dem Perg ist, da man nit wasser haben khan, da macht man ein gegen schach Jn der Mauer, 4 1/2 schuech weit vnnd 7 schuech hoch, wie es gemacht ist ann der Pasteien A.1., Zwischen dem Alten vnnd Neuen Castell, oder Aber man macht den Von außwendig, wie mit C. Zusehen, da baiden forn abgerißen sein. Also das ein khriegsman 106Jnwendig khund hin und wider gehen vnnd Auflofen, ob wo der feinndt eingraben wollt, Jme mit dem entgegen graben gwerdt werde, der Graff von Mansfeldt der ist auch der mainung vnnd acht, das man ain gegen schach machen soll an der Contra scarpa oder beim grundt des aussern tailles im graben, Wie es VerZaichnet ist mit D. Man khan auch etliche bedeckhte thurnlein oder khämerlein machen in den Eggen vnnd am grundt des grabens, darauß man mit Topelhackhen weren khund, das der feindt nit so bald hinZueschantzen in graben khumen vnnd denselben auffüllen mige, Wie sollches VerZaihnet ist in dem ganZen Modell mit A. No. 3. Von solchen Thurnlein man auch Jn der obgmeldten gegen schach khumen müge.
11. Das auch bei einer Jn den Pastein [mellette: Pastein F.] Zwai Plinde oder Verporgen Thor gemacht, die Jn den vnndern vnnd Nideristen gebeuen Am grund des grabens Jnwendig des Orechion verporgner herauß gehen, der durch ganng drinen soll brait sein 5 oder 4 1/5 schuech, das thor drei schuech brait, Also das ein knecht mit ein lanngen spieß durch khund khumen, Wie es an der Pastein mit F verZaichnet. Die muessten mit eisen bschlagen Thörn Verschlossen vnnd Jn Zeit des fridens Aufwendig mit einer eingene Maur vermauert vnd verdeckht sein.
12. Das die Orechioni an Jrem spitz oder haubt nit höcher sein, Alß die Prust Wehr von den Nideristen streich wehren, vnnd senckhen sich Allgmach der Pastein [mellette: G. Pastein] Brust wehr gleich, dem dann die Brust wehr von dem Obern Orechion auch müess gleich khumen, damit man mer stuckh drauf khund stellen, Wie solches Zusehen an der Pastein G. vnnd die weil die dickhe der Brust wehr vnnd der Casamata, Alß ein Orechion der Anndern streich wehr in der höche dasein, wurde sich nit reimen vnnd merern vncosten geben, wenn mann es der Pastein gleich hoch soll machen, das wenn der feindt die Brust wehr der obern wehr Zuescheust vnnd man mit dem gschutz sich hinder sich besser begeben vnnd von neuem baser sich verwaren mueß, so khan man vor der hech des Orechion den graben vnnd die entgegen ligende Pastein mit ein ainigen stuckh hart vertadigen oder streichen, wie sollches an der figur der Pasteien F. vnd E Zusehen. Der hern von Popendorf läst Jm sollches gfallen, hat auch Zuegeben, das es Also Zu Erla gemacht, wie dann sollches an der Pastein Zuechst am Perg im Modell vnnd An der Pastein A.1. gemacht ist worden.
13. Das die schieß löcher an den streich weren Jnwendig bei 2 schuech brait vnd hoch sein, VierEgkhet vnnd oben mit 2 gwelben vber einander versichert, Damit die püchssenmaister vnd khriegs leut, da gleich ain gwelb oder pogen Zerschossen, vmb souil sicherer drundter stehen mügen sollen. auch Also gmacht sein, das das schieß loch Znechst der Cortina die selbig gannz Cortina, auch die streich wehr den Orechion vnd desselben spitz vnnd den graben streichen, das Annder schieß loch neben des Orechion solle Aufs Aller nechst vnnd Zum wenigisten biß auf halbe Cortina gegen der entgegen ligenten Pastein biß auf den spitz derselbigen vnnd noch ein Claffter hinauß laß streichen mügen, unnd das sy Also den grundt des grabens vertädigen, so nachent es müglich, aufs wenigist von der unten gedachter Cortina gegen der entgegenligenten Pastein vnnd derselben höche. Vnnd damit die gfanngnen durch dieselben schieß löcher nit außkhommen mugen, soll man Jnwendig eisene Türl machen, die Jm Zeitt des fridens allzeit gspert 107seiet, die Jn der miten ein loch haben, damit man Zu Aller fuerfalleter not mit ein dopell hackhen hinauß schießen khan. Dann also erforderst das gräniz hauß, weil es dem feindt so nahent glegen ist. [mellette: Acht gleich wol der Kh[aiserliche] M[ajestät] da khan man gleich so woll guetter mahen die man auf vnd Zuethuen vnd verbesseren khan507]
507 Bizonytalan olvasat.
14 Das die Pasteien also gmacht, das si braite vnnd nit gspitzige Eckh haben, souil müglich, damit sy von den streich wern vnnd von der Cortina aufs wenigist der leng graden lini nach Vertädigt vnd gestrichen mögen werden.
15 Das die Aussern wendt der Pasteien khurtz sein souil müglich, damit si ein guetten Plaz haben Zu Notturfftiger stellung des gschuz, vnnd das die wenndt an den streich wern vmb souil braiter, dan also weren si vil sicherer vnd vmb ein guetes weniger khossten.
16 Er bitt auch Jme Zuerlauben, das die Casamata oder Pläz an den streich weren [mellette: E vnd F.] vnbedeckht sein, 3 oder 3 1/2 biß auf 4 Claffter, wie es die notturfft erfordert. Das vbrig soll bedeckht sein mit gwelben, ain 8. oder 9 schuech hoch, si sollen drumb so nider sein, vnd nit höher, damit die Brust wher der vnndern Casamata so hoch sei, das si die ober wer des feindts gschuz huett vnnd bedeckhen. Dieweil man das gschutz leichtlich darhinder Ziehen vnd auf allen notfall bedeckht hallten khan, auf dise weiß werden die Auswendigen wendt oder Mauren von den Pasteien khurz vnnd die Casamata haben mer plaz Zum hinder sich Ziehen. man machts mit wenigern vncossten, da man an einer Pastein ain ainigen Platz macht der allenthalben vnbedeckht, khan man da 2 Pläz oder ständt Zuerichten, die da sicher vnd bedeckht seindt vnnd darf doch die Pastein nit grösser machen, wie sollches an der figur der Pastein E. vnnd F Zusehen, vnnd ist nit ein wenig dran glegen, das man drei wern khan haben, aine uber der Anndern, dieweil des feindts gwaldt also geschaffen, das er ain 50 oder 60 Tausend man an ain Sturm khan stellen, die da mit säbeln hin an triben werden, sein Zwo wern nit gnueg khan. da man von der ain das gschutz last ab gehen, khan man Jn der Anndern so baldt nit laden vnndt dem feindt ist es nichts, da er gleich an ain sollchen Sturm ain 10 m. man verleurt, wan er nuer sein fuernemmen verricht, wie wier dessen vill Exampl gsehen haben.
17. Das an den aussern Mauern der Pasteien A 1 [mellette: H im abriß] gegen Thihamer werts vnnd an der Ander mit G 2. gegen dem khünig Stuell, wenn es von nötten ist mit dem graben so Tieff Zkumen, der graben an den Andern Pasteien ist, das im grund des grabens ain mauer aufgfuert wert, von 4 biß in 5 Claffter hoch, wie an der figur mit H Zusehen, die wierdet nutz sein, das ein khriegsman bedeckht khan sthen vnnd mit dopel häckhen dem feindt den Zuegang vnd ausfüllen des grabens khan weren. Vnnd da der feindt die Pastein gleich bscheusst, so bleiben die stain vnnd was Zueschossen herab feldt, Auf derselben Mauer ligen. Also das der feindt sich hinZue nit woll nahnen, noch die Ane laidern ersteigen mag, sollche vnndern Maur khan auch nit leicht bschossen werden, weill sie nider ist. Allain der feindt stöll sein gschutz in graben, sollcher furen von Mauren so etliche Barbacanj, vnnd die francosen Rebelini, etliche Aber fosa 108brea nennen, welliher furen von dem Alten fast gebraucht worden, damit si sich vor das hulzen Jnstrumenten vnd Maur PrechZeug, so man Am Wand [?] Zogen, versichert haben. Zu disem Zeiten ists beim eine festen ein grosser fortl, man khan auch Zwischen diser Pläner vnd der Pastein, da es von nötten, ein gegen schach machen. Jch ließ mier gfallen, das an allen Pasteien also gmacht wurd von der oberzelten vrsach wegen, man khun ein weg auch finden, das es fast alß in ain vncossten gschehen khunde, dan Zu Erla findt sich ein gueten grundt, vnd ist nit von nötten, mit der Pasteien so tief hinab Zufaren, so under allain mit derselben Maur Außwendigen, wie an der obgemelten figur mit H Zusehen. Da aber khain grund nit ist, khan man gwelbte Pögen [mellette: I.] machen, die werden bedeckht vor des feindts gschutz, mit ietz gedachter Mauer vnd der Erden, die dar Zwischen khumbt, Aber Zu ietz gemelten 2. Pastein darf man solcher Pögen nit.
18. Das Zu aine ieden Casamata ain Thor oder einfart gmacht werd [mellette: F], da man mit den gschutz khün einkhumen, Also auch ein stiegen, das der khriegsman auf den Plaz oder öbresten stand der Pasteien khumen muge, dieweil man schwärlich Zuuor khan wissen, was fur gschutz vnnd volckh man in aine festen auf ein iedlichs ort bfunden war bederf, das auch ain weg gmacht werd, von ainer Casamata Zu der Andern Aufs nahnest, vnnd mit wenigisten vncossten es müglich ist, damit man von ainer mit gschutz vnnd volckh der Anndern Zu hulf khunde khumen, vnnd die, wie es die notturfft erfordert, möge ruckhen, vnnd es Also angorndt, das man von ainer Pastein Zur Anndern Alle Cortina one hinderung müge streichen.
19. Das auch erlaubt sei, an dem Taill des Castells gegen dem Perg mit B No 4. Zaichnet, mit derZeit vnnd glegenhait mit arbait der gfangnen, one sondern vncosten den Jnwendigen graben Zwischen dem Zaun vnd der Maurn, widerumb Zu raumen vnnd ZueZurichten da man auch etliche Thurnlein oder khämerlein mach, wie oben im 10. Articl gmeldt, damit es sich in Zeit der not vmb souil besser retten müge, bei denen souil vnglegenhaiten, die sich da erfinden.
20. Eur Majestät etc. wurd wol gedient werden, da Euer Majestät etc. ein landman, der eins ansehens, Zum ein superJntententen gedachtes gebeues ordnet, wellcher vleissig wer vnd sorg hett, vnnd damit Zu khainer Zeit Am PauZeug, khalch, scheib Thruchen vnd dergleichen auch an arbaitten vnd was man sonnst darZu bedurffte mangl erschine. [mellette: ???]
21. Es ist auch von nötten, das 2 verstandige vnd vleissige vbergeher da sein, aine bei dem Maur werch, der Annder beim Erdt gebeus, die Jmmer dar Jr Auf werckhen haben, das man das recht arbait vnd mach, wie es geordnet ist, wen man an mehr orten Arbait, mueß man ein auch mer ghilfen halten. [mellette: ist bliben khan Jr nit woll geraten]
22. Wen man die Arbait von statt will dreiben, so mueß von hinen aus noch ain maister vnd mer Maurer bstellen, mich bedunckht, besser sein, das man Jm allain den vngleschten khalch gäb, vmb mit Jm vber haubt schlusß vom grabn, von stain, Sanndt, khalch vnd wasser Zum baw Zbringen, vnnd die ganzen gmeur auf sein vncossten Zmachen, souil vnd souil von einer Cubicierten Claffter, in bedenckhen, das vilmalß an wägen vnnd Arbaitern mangl erscheint, khan derselbig die in stäter vnderhaltung erhalten, souil er dern bedurfftig, so muest man auch 109mit Jm vber aines khumen vom grundt Zugraben, souil von einer Claffter, damit er sollches grabn mit seinen leuten auch Zeitlich khunde Anstellen. [mellette: laß bliben, wie es bisher gehalten werden, es laufft mit aigene ...]
23. Wierdt von nötten sein, ain stainmez der Euer Majestät etc. wapen auf die Pasteien vnd Thör außhaw, wie es Euer Majestät haben wöll. [mellette: ist schon verordnet]
24. Wenn Euer Majestät etwas von gossene Medthal wollten dar geben, so man in den grundt der Pasteien vnd Cortina legen möcht, wie es bei den Alten bschehen, deren gedechtnus durch sollch mitl hietzo Täglich vermauert wirdt. [mellette: stet bei Jr Majestät]
25. Eur Majestät etc. die wöllen das Thor der festen also machen lassen wie es neben der streich wehr An der Pastein E. verZaichnet damit Jm Zeit des khriegs, man dasselbig nit darf ausschidten, vnnd doch der feindt es von khainen ort also bschuessen vnd das die schuss hinein gehn [mellette: alle thor also ist gut]
Leztlich bitt Waldigara, Euer Majestät wöllen dise auch seine vorige vbergebne Articl ne… nit mehr, doch die das gebew Erla vnnd desselben befurderung antreffen, gnedigist erledigen, vnnd da es Euer Majestät etc. gfellig Jemandt von derselben Räthen befelhen, der Jne uber gemeldte Articl hör vnnd mit Jm daruon discurier oder brede.

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages