e) Majláth Antal főispán január 6-i válasza a kancellár január 1-i felszólítására: úgy véli, hogy Kossuth be akarja csapni előfiz…
e) Majláth Antal főispán január 6-i válasza a kancellár január 1-i felszólítására: úgy véli, hogy Kossuth be akarja csapni előfizetőit.
Ex incidenti relationis Altissimo Loco de eo factae: quod in plerisque Comitatibus per constitutos collectores subscriptiones praenumerantium pro folio hebdomadali sollicite conquirantur, quod erga anticipationem menstruorum duodecim florenorum Ludovicus Kossuth e Comitatu Zempliniensi oriundus, nunc autem ad Comitia Absentium Ablegatus, super objectis Diaetalibus et rebus in Circulis et sessionibus Comitialibus qualiter actis qualibet septimana praenumerantibus suis in manuscripto suppeditare promittit, dignabatur mihi Excellentia Vestra in obsequium altissimi jussus ope gratiosissimarum sub 1/1 Januarii exaratarum Prasidialium committere: ut desuper meam exhibeam informationem, an, et quid rei hunc subsit?
Gratiosissimo jussui huic omnem ad amussim satisfacturus, Excellentiae Vestrae referre festino: Ludovicum Kossuth, Tabulae Judiciariae Comitatus Zempliniensis Assessorem, in modernis Comitiis provincia absentium Liberorum Baronum Pauli Vécsey et Pauli Fischer Ablegati munere defungi; vir hic dum quaestio de redigendo Circulari Diario verteretur, eo connisus est, ut sibi provincia redactionis deferatur, Status interim et Ordines, de anteactae vitae eius ratione penitius informati, eundem in coetum redactorum cooptandum haud censebant.
Quantum ad collectionem praenumerantium adtinet, intime mihi persuasum teneo, fatum Kossuth hac spe illa fretum sollicitasse, quod sibi redactio Diarii deferenda, atque adeo occasio etiam praebenda sit, complura huius exempla expensis nunciorum Diaetalium procurandi, prout et illud certe mihi constat, Societati Sátor-Allya-Újhelyiensi, quae sub nomine Casino venit, prout et committentibus suis, necnon aliis in limitrophis Comitatibus degentibus, et hoc nunciorum genere oblectari solitis, per eundem Kossuth protocolla, vel succintas potius relationes de Sessionibus circularibus et Regnicolaribus mitti solere, et cum de justo magis liberali sentiendi ratione iure optimo notetur, in aprico est, opus eius hoc aevo magni praetii faciendum esse. De collectione interim praenumerantium in diversis Regni Jurisdictionibus nihil certi ad meam pertigit notitiam, quodve eo minus constare mihi potest, cum hic loci praenumerantes haud conquirat. Quod tamen nec succinctae quas attigit relationes in illa mensura, prout Altissimo Loco nefors relatum est, per eundem exarari valeant, vel inde patescit, quod nonnisi quatuor scribis utatur, qui vix describendis in pluribus exemplaribus nunciis et protocollis sufficiunt. Si itaque hanc circumstantiam spectem et ad anteactae eius vitae rationem respiciam, eorum mihi probatur sententia, qui credunt fatum Kossuth artificiosam praenumerantium defraudationem praemeditari; mystici enim rei huic aliquid subesse eo minus credo, quod hic loci de aliqua scriptorum unione mihi nihil constet, nisi fortassis illorum coalitio, qui semet ad redigendum Circuli Diarium promptos declararunt pro tali haberi velit, sunt vero hi: Joannes Berta, Munkácsi et Hajnik, ex his solum posterior facilis stenographus est, circa quem tamen a societate hac avellendum congruae initae sunt rationes, partim ex eo, quod hoc pacto res Diarii Circularis magnis et insuperabilibus poene irretienda sit difficultatibus, partim vero ideo, quod iuvenis hic a benemerito sit ortus, et a singularibus animi dotibus et morum integritate optime commendetur.
Nec interim relate ad collectionem praenumerantium per Ludovicum Kossuth in aliis jurisdictionibus praetensive institutam aliquid a me desiderari patiar, substitutum vicecomitem Comitatus moderationi meae clementer crediti provocavi, ut in circumstantiam hanc omni cum circumspectione indagari faciat, meque super resultato edoceat. Qui altis etc.
Ered. OL, M. Kanc. eln. 1833: 36.
