Liturgica
Liturgica
EDD.: Ed.pr. p.S3v-T4r. Karácsonyi – Borovszky p.146-152.
Sequitur benedictio episcopalis super novum ferrum ad manifestandum verum iudicium preparatum.
Oratio.
Benedic, domine pater, omnipotens ęterne Deus, per invocationem sanctissimi nominis tui et per adventum unigeniti filii tui, domini nostri Iesu Christi atque per donum Spiritus Sancti ad manifestandum verum iudicium tuum hoc genus metalli, ut sit sanctificatum et consecratum, ut omni dęmonum falsitate procul remota fidelibus tuis veritas veri iudicii tui manifesta fiat. Per dominum nostrum, Iesum etc.
Oratio.
Deus Abraam, Deus Ysak et Deus Iacob, Deus omnium bene viventium, Deus, origo et manifestatio omnis iustitiae, qui solus est iustus iudex, fortis et patiens, dignare exaudire nos famulos tuos orantes ad te pro benedictione huius ferri. Unde rogamus te Domine, iudicem universorum, ut mittere digneris sanctam et veram benedictionem tuam super hoc ferrum, ut sit refrigerium illud portantibus et habentibus iustitiam et credentibus in tuam iustitiam et fortitudinem. Et sit ignis ardens iniquis et facientibus iniqua et sperantibus in iniustitia sua et pompa diabolica. Converte domine incredulitatem iniustorum per virtutem et benedictionem tuam et per invocationem Sanctae Trinitatis, Patris et Filii et Spiritus Sancti. Et mitte in hoc ferrum vim virtutis ac veritatis tuę, ut in eo semper per misericordiam et veritatem tuam verissima iustitia, quę tibi soli cognita est, fidelibus tuis ad emendationem iniquorum manifestissime declaretur, de quacunque questione ratio fuerit agitata, et nullam potestatem habeat diabolica virtus veritatem tuam aut occultare aut depravare, sed sit servis tuis in monimentum fidei ad credulitatem divinę maiestatis tuę, ad certificationem misericordie ac verissimę tuae veritatis. Per Dominum.
Tunc aspergatur ferrum aqua benedicta et dicat episcopus.
Benedictio Dei Patris et Filii et Spiritus Sancti descendat super hoc ferrum ad discernendum iudicium Dei. Amen.
Sequitur benedictio ad locum, ubi ignem accendere et consecrare debent.
Benedic, Domine, per invocationem sancti nominis tui hunc locum ad manifestandum verum iudicium, ut omni demonum falsitate procul remota, fidelibus tuis veritas iudicii tui manifesta fiat. Per Cristum dominum nostrum. Amen.
Benedictio ignis.
Domine Sancte Pater, omnipotens aeterne Deus, benedic hunc ignem, quem in nomine filii tui, domini nostri Iesu Christi, et Spiritus Sancti benedicimus et sanctificamus. Qui vivis et regnas.
Sequitur missa iudicii candentis ferri.
Introitus
Iustus es, Domine, et rectum iudicium tuum, fac cum servo tuo secundum misericordiam tuam. Versus: Beati inmaculati in via, qui ambulant in lege Domini. Gloria patri etc.
Oratio.
Actiones nostras, quęsumus domine, et aspirando pręveni et adiuvando prosequere, ut cuncta operatio, omnis oratio et a te semper incipiat et per te cepta finiatur. Per Dominum etc.
Lectio Esaię Prophetę.
In diebus illis locutus est Esaias propheta dicens: Querite Dominum, dum inveniri potest, invocate eum, dum prope est. Derelinquat impius viam suam et vir iniquus cogitationes suas et revertatur ad Dominum nostrum, quoniam multus est ad ignoscendum.
Graduale.
Custodi me, Domine, ut pupillam oculi, sub umbra alarum tuarum protege me. Versus: De vultu tuo iudicium meum prodeat, oculi tui videant ęquitatem.
Alleluia. Deus iudex iustus, fortis et patiens, nunquid irascetur per singulos dies. Alleluia.
Evangelium secundum Marcum.
In illo tempore respiciens Iesus in discipulos suos ait illis: Habete fidem Dei. Amen dico vobis, quia quicunque dixerit huic monti, tollere et mittere in mare, et non hęsitaverit in corde suo, sed crediderit, quia quodcunque dixerit, fiat, fiet ei. Propterea dico vobis, omnia quęcunque orantes petitis, credite, quia accipietis et fient vobis.
Offertorium.
De profundis clamavi ad te Domine, Domine exaudi vocem meam.
Secreta.
Omnipotens sempiterne Deus, qui non sacrificiorum ambitione placaris, sed studio piae devotionis intendis, da famulis tuis fidem rectam, spem inconcussam et cor mundum, ut fides hęc tibi dona conciliet et humilitas commendet. Per etc.
Communium.
Amen dico vobis, quicquid orantes petitis, credite, quia accipietis et fiet vobis.
Tunc communicet sacerdos criminatum seu accusatum his verbis.
Corpus Domini nostri, Iesu Christi sit tibi hodie ad comprobationem veri iudicii. Amen.
Oratio post communionem.
Fideles tuos, Deus, perpetua dona confirment, et vota nostra, quę pręveniendo aspiras, eciam adiuvando prosequere. Per Dominum etc.
Peracta missa pergat sacerdos cum cruce et aqua benedicta et plebe ad locum, ubi probatio fieri debet. Imprimis dicantur septem psalmi poenitentiales cum letania, in qua interserantur hi duo versiculi.
Ut iustitię non dominetur iniquitas, sed subdetur nunc et semper falsitas veritati tuae. Responsorium: Te rogamus, audi nos. Ut verum iudicium hodie nobis manifestare digneris. Responsorium: Te rogamus. Agnus Dei. Christe, audi nos. Christe, exaudi nos. Kyrie eleison. Christe. Kyrie.
Postea dicantur orationes ad ferrum.
Benedic, Domine, sancte pater, per invocationem sanctissimi nominis tui et per adventum unigeniti filii tui, domini nostri, Iesu Christi atque per donum Spiritus Sancti ad manifestandum verum iudicium tuum hoc genus metalli, ut sit sanctificatum et consecratum ad manifestandum verum iudicium tuum, ut omni daemonum falsitate procul remota fidelibus tuis veritas veri iudicii tui manifesta fiat, per eum, qui venturus est iudicare vivos et mortuos et seculum per ignem. Amen.
Alia oratio.
Deus, iudex iustus, qui autor pacis es et iudicas aequitatem, te suppliciter exoramus, ut hoc ferrum ignitum ad iustam examinationem cuiuslibet dubietatis faciendam benedicere et sanctificare digneris. Ita, ut si innocens sit homo iste de praenominata causa, unde purgatio quęrenda est, hoc ferrum ignitum cum manu acceperit, illęsus appareat, et si culpabilis sit, iustissima sit ad hoc virtus tua, ut in eo veritas declaretur, quatenus iustitiae non dominetur iniquitas, sed subdatur semper falsitas veritati. Per Christum.
Alia oratio.
Omnipotens Deus, te suppliciter rogamus pro huius negotii examinatione, quam modo inter nos ventilamus, ut iustitię non dominetur iniquitas, sed subdetur semper falsitas veritati, et si hanc praesentem examinationem aliquis per aliquod maleficium aut per herbas tegere et impedire voluerit, tua sancta dextera, iustissime iudex, evacuare digneris. Per Dominum nostrum.
Tunc aspergatur ferrum aqua benedicta.
Benedictio Dei, Patris et Filii et Spiritus Sancti descendat super hoc ferrum ad manifestandum verum iudicium. Amen.
Oratio.
Omnipotens sempiterne Deus, qui tua iudicia incommutabili dispositione iustus ubique iudex discernis, tu clemens in hoc tuo iudicio ad invocationem sancti tui nominis, quod a te fidelium intentio deplorat, tua iustissima examinatione declara. Per Dominum.
Alia oratio.
Deus iudex iustus, fortis et patiens, qui sedes super thronum et iudicas aequitatem, quoniam iustus es et rectum iudicium tuum, Deus, qui Susannam de falso crimine liberasti et tres pueros Sydrak, Misach et Abdenago de camino ignis ardentis per sanctum angelum tuum illęsos eduxisti, quique per adventum unigeniti tui filii, domini nostri Iesu Christi mundum salvasti et per eius passionem humanum genus redemisti, Deus, pacis amator et auctor, qui respicis terram et facis eam tremere, respice, quęsumus, ad fidem et preces supplicum tuorum, qui quęrimonie suae causas ad tui iudicii examinationem deferunt, et super hoc ferrum igne candens ad dissolvendas eorum lites, gratiam tuae benedictionis infunde, ut per illius ministerium et iustitia patefacta clarescat et iniquitas victa succumbat. Tuam ergo omnipotentiam, Domine, supplices deprecamur et mente devota fideliter imploramus, ut sicut olim supra memorati pueri de succensa fornace illaesi tua sunt dextera liberati, ita quicunque innocens de hoc crimine, unde nunc iudicium agitur, in hoc ferrum igne candens manum miserit, sanam inde atque illaesam tua adiutus invicta potentia reducat, nec habeat ignis virtutem laedendi in eius corpore, quem de consensu huius facinoris conscientia non accusat in mente. Ita eciam, dominator Domine, quicunque culpabilis incrassante diabolo cor habens induratum maiestatem tuam tentare et male sibi conscius hoc ferrum ad tui iudicii examinationem paratum manu sua attingere praesumserit aut per aliqua maleficia vel herbas diabolicas se tueri et crimen suum celare fidemque credentium illudere tentaverit, tua, Domine, quaesumus, invicta veritas per virtutem sanctę crucis tuę, quam apponimus, hoc totum evacuet et manifesto ustionis signo occulti facinoris crimen detegat, ut reus hic per poenitentiam correctus in futuri iudicii tui examine a culpa inveniatur penitus absolutus. Per Dominum etc.
Postea communicet eum sacerdos his verbis.
Interdico tibi, o homo, coram omnibus astantibus per Patrem et Filium et Spiritum Sanctum et per tremendum diem iudicii, per ministerium baptismatis et per venerationem omnium sanctorum, ut si de hac re culpabilis es, aut fecisti, aut scivisti, aut baiulasti, aut consensisti, aut propter actam culpam denominatam sciens factoribus iuvisti, ut ecclesiam non introeas, Cristianę societati non miscearis, si reatum nolueris confiteri admissum, antequam iudicio examineris publico.
Tunc interrogetur sceleratus a sacerdote his verbis.
Frater, es iustus ab hoc crimine, de quo accusaris? Respondeat. Iustus sum. Interrogetur. Mundus? Respondeat. Mundus sum.
Tandem accusatus accipiat ferrum ignitum hęc verba sequentia dicendo.
Per illud corpus Domini nostri Iesu Christi, quod hodie sumpsi, non confidens in ullum maleficium, nec in virtutibus herbarum accipio hoc ferrum.
Finis.
Impressum Colosvarini per G. H. Anno salutis humanae 1550.
){kind=link}
){kind=link}