Jer 24

Teljes szövegű keresés

Jer 24
Jer 24.1
הִרְאַנִי יְהוָה וְהִנֵּה שְׁנֵי דּוּדָאֵי
תְאֵנִים מוּעָדִים לִפְנֵי הֵיכַל
יְהוָה אַחֲרֵי הַגְלוֺת נְבוּכַדְרֶאצַּר
מֶלֶכְ־בָּבֶל אֶת־יְכָנְיָה בֶנ־יְהוֺיָקִים
מֶלֶכְ־יְהוּדָה וְאֶת־שָׂרֵי יְהוּדָה
וְאֶת־הֶחָרָשׁ וְאֶת־הַמַּסְגֵּר מִירוּשָׁלִַם
וַיְבִאֵם בָּבֶל׃
Jer 24.2
הַדּוּד אֶחָד תְּאֵנִים טֹבוֺת מְאֹד
כִּתְאֵנֵי הַבַּכֻּרוֺת וְהַדּוּד אֶחָד
תְּאֵנִים רָעוֺת מְאֹד אֲשֶׁר לֹא־תֵאָכַלְנָה
מֵרֹעַ׃ ס
Jer 24.3
וַיֺּאמֶר יְהוָה אֵלַי מָה־אַתָּה
רֹאֶה יִרְמְיָהוּ וָאֹמַר תְּאֵנִים
הַתְּאֵנִים הַטֹּבוֺת טֹבוֺת מְאֹד
וְהָרָעוֺת רָעוֺת מְאֹד אֲשֶׁר לֹא־תֵאָכַלְנָה
מֵרֹעַ׃ ף
Jer 24.4
וַיְהִי דְבַר־יְהוָה אֵלַי לֵאמֹר׃
Jer 24.5
כֹּה־אָמַר יְהוָה אֱלֹהֵי יִשְׂרָאֵל
כַּתְּאֵנִים הַטֹּבוֺת הָאֵלֶּה כֵּנ־אַכִּיר
אֶת־גָּלוּת יְהוּדָה אֲשֶׁר שִׁלַּחְתִּי
מִנ־הַמָּקוֺם הַזֶּה אֶרֶץ כַּשְׂדִּים
לְטוֺבָה׃
Jer 24.6
וְשַׂמְתִּי עֵינִי עֲלֵיהֶם לְטוֺבָה
וַהֲשִׁבֹתִים עַל־הָאָרֶץ הַזֺּאת
וּבְנִיתִים וְלֹא אֶהֱרֹס וּנְטַעְתִּים
וְלֹא אֶתּוֺשׁ׃
Jer 24.7
וְנָתַתִּי לָהֶם לֵב לָדַעַת אֹתִי
כִּי אֲנִי יְהוָה וְהָיוּ־לִי לְעָם
וְאָנֺכִי אֶהְיֶה לָהֶם לֵאלֹהִים
כִּי־יָשֻׁבוּ אֵלַי בְּכָל־לִבָּם׃ס
Jer 24.8
וְכַתְּאֵנִים הָרָעוֺת אֲשֶׁר לֹא־תֵאָכַלְנָה
מֵרֹעַ כִּי־כֹה אָמַר יְהוָה כֵּן
אֶתֵּן אֶת־צִדְקִיָּהוּ מֶלֶכְ־יְהוּדָה
וְאֶת־שָׂרָיו וְאֵת שְׁרִית יְרוּשָׁלִַם
הַנִּשְׁאָרִים בָּאָרֶץ הַזֺּאת וְהַיֺּשְׁבִים
בְּאֶרֶץ מִצְרָיִם׃
Jer 24.9
וּנְתַתִּים 1 לִזְוָעָה 2 לְזַעֲוָה לְרָעָה
לְכֹל מַמְלְכוֺת הָאָרֶץ לְחֶרְפָּה
וּלְמָשָׁל לִשְׁנִינָה וְלִקְלָלָה
בְּכָל־הַמְּקֹמוֺת אֲשֶׁר־אַדִּיחֵם
שָׁם׃
Jer 24.10
וְשִׁלַּחְתִּי בָם אֶת־הַחֶרֶב אֶת־הָרָעָב
וְאֶת־הַדָּבֶר עַד־תֻּמָּם מֵעַל הָאֲדָמָה
אֲשֶׁר־נָתַתִּי לָהֶם וְלַאֲבוֺתֵיהֶם׃
ף

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages