Lev 11

Teljes szövegű keresés

Lev 11
Lev 11.1
locutus est Dominus ad Mosen et Aaron dicens
Lev 11.2
dicite filiis Israhel haec sunt animalia quae comedere debetis de cunctis animantibus terrae
Lev 11.3
omne quod habet divisam ungulam et ruminat in pecoribus comedetis
Lev 11.4
quicquid autem ruminat quidem et habet ungulam sed non dividit eam sicut camelus et cetera non comedetis illud et inter inmunda reputabitis
Lev 11.5
chyrogryllius qui ruminat ungulamque non dividit inmundus est
Lev 11.6
lepus quoque nam et ipse ruminat sed ungulam non dividit
Lev 11.7
et sus qui cum ungulam dividat non ruminat
Lev 11.8
horum carnibus non vescemini nec cadavera contingetis quia inmunda sunt vobis
Lev 11.9
haec sunt quae gignuntur in aquis et vesci licitum est omne quod habet pinnulas et squamas tam in mari quam in fluminibus et stagnis comedetis
Lev 11.10
quicquid autem pinnulas et squamas non habet eorum quae in aquis moventur et vivunt abominabile vobis
Lev 11.11
et execrandum erit carnes eorum non comedetis et morticina vitabitis
Lev 11.12
cuncta quae non habent pinnulas et squamas in aquis polluta erunt
Lev 11.13
haec sunt quae de avibus comedere non debetis et vitanda sunt vobis aquilam et grypem et alietum
Lev 11.14
milvum ac vulturem iuxta genus suum
Lev 11.15
et omne corvini generis in similitudinem suam
Lev 11.16
strutionem et noctuam et larum et accipitrem iuxta genus suum
Lev 11.17
bubonem et mergulum et ibin
Lev 11.18
cycnum et onocrotalum et porphirionem
Lev 11.19
erodionem et charadrion iuxta genus suum opupam quoque et vespertilionem
Lev 11.20
omne de volucribus quod graditur super quattuor pedes abominabile erit vobis
Lev 11.21
quicquid autem ambulat quidem super quattuor pedes sed habet longiora retro crura per quae salit super terram
Lev 11.22
comedere debetis ut est brucus in genere suo et attacus atque ophiomachus ac lucusta singula iuxta genus suum
Lev 11.23
quicquid autem ex volucribus quattuor tantum habet pedes execrabile erit vobis
Lev 11.24
et quicumque morticina eorum tetigerit polluetur et erit inmundus usque ad vesperum
Lev 11.25
et si necesse fuerit ut portet quippiam horum mortuum lavabit vestimenta sua et inmundus erit usque ad solis occasum
Lev 11.26
omne animal quod habet quidem ungulam sed non dividit eam nec ruminat inmundum erit et quicquid tetigerit illud contaminabitur
Lev 11.27
quod ambulat super manus ex cunctis animantibus quae incedunt quadrupedia inmundum erit qui tetigerit morticina eorum polluetur usque ad vesperum
Lev 11.28
et qui portaverit huiuscemodi cadavera lavabit vestimenta sua et inmundus erit usque ad vesperum quia omnia haec inmunda sunt vobis
Lev 11.29
hoc quoque inter polluta reputabitur de his quae moventur in terra mustela et mus et corcodillus singula iuxta genus suum
Lev 11.30
migale et cameleon et stelio ac lacerta et talpa
Lev 11.31
omnia haec inmunda sunt qui tetigerit morticina eorum inmundus erit usque ad vesperum
Lev 11.32
et super quod ceciderit quicquam de morticinis eorum polluetur tam vas ligneum et vestimentum quam pelles et cilicia et in quocumque fit opus tinguentur aqua et polluta erunt usque ad vesperum et sic postea mundabuntur
Lev 11.33
vas autem fictile in quo horum quicquam intro ceciderit polluetur et idcirco frangendum est
Lev 11.34
omnis cibus quem comeditis si fusa fuerit super eum aqua inmundus erit et omne liquens quod bibitur de universo vase inmundum erit
Lev 11.35
et quicquid de morticinis istiusmodi ceciderit super illud inmundum erit sive clibani sive cytropodes destruentur et inmundi erunt
Lev 11.36
fontes vero et cisternae et omnis aquarum congregatio munda erit qui morticinum eorum tetigerit polluetur
Lev 11.37
si ceciderint super sementem non polluent eam
Lev 11.38
sin autem quispiam aqua sementem perfuderit et postea morticinis tacta fuerit ilico polluetur
Lev 11.39
si mortuum fuerit animal quod licet vobis comedere qui cadaver eius tetigerit inmundus erit usque ad vesperum
Lev 11.40
et qui comederit ex eo quippiam sive portaverit lavabit vestimenta sua et inmundus erit usque ad vesperum
Lev 11.41
omne quod reptat super terram abominabile erit nec adsumetur in cibum
Lev 11.42
quicquid super pectus quadrupes graditur et multos habet pedes sive per humum trahitur non comedetis quia abominabile est
Lev 11.43
nolite contaminare animas vestras nec tangatis quicquam eorum ne inmundi sitis
Lev 11.44
ego enim sum Dominus Deus vester sancti estote quoniam et ego sanctus sum ne polluatis animas vestras in omni reptili quod movetur super terram
Lev 11.45
ego sum Dominus qui eduxi vos de terra Aegypti ut essem vobis in Deum sancti eritis quia et ego sanctus sum
Lev 11.46
ista est lex animantium et volucrum et omnis animae viventis quae movetur in aqua et reptat in terra
Lev 11.47
ut differentias noveritis mundi et inmundi et sciatis quid comedere et quid respuere debeatis

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages