1Mach 10

Teljes szövegű keresés

1Mach 10
1Mach 10.1
et anno centesimo sexagesimo ascendit Alexander Antiochi filius qui cognominatus est Nobilis et occupavit Ptolomaidam et receperunt eum et regnavit illic
1Mach 10.2
et audivit Demetrius rex et congregavit exercitum valde copiosum et exivit obviam illi in proelium
1Mach 10.3
et misit Demetrius ad Ionathan epistulam verbis pacificis ut magnificaret eum
1Mach 10.4
dixit enim anticipemus pacem facere cum eo priusquam faciat cum Alexandro adversus nos
1Mach 10.5
recordabitur enim omnium quae fecimus in eum et in fratrem eius et in gentem eius
1Mach 10.6
et dedit ei potestatem congregandi exercitum et fabricare arma et esse ipsum socium eius et obsides qui erant in arce iussit tradi ei
1Mach 10.7
et venit Ionathas in Hierusalem et legit epistulas in auditu omnis populi et eorum qui in arce erant
1Mach 10.8
et timuerunt timore magno quoniam audierunt quod dedit ei rex in potestatem congregandi exercitum
1Mach 10.9
et traditi sunt Ionathae obsides et reddidit eos parentibus suis
1Mach 10.10
et habitavit Ionathas in Hierusalem et coepit aedificare et innovare civitatem
1Mach 10.11
et dixit facientibus opera ut struerent muros et montem Sion in circuitu lapidibus quadratis ad munitionem et ita fecerunt
1Mach 10.12
et fugerunt alienigenae qui erant in munitionibus quas aedificaverat Bacchides
1Mach 10.13
et reliquit unusquisque locum suum et abiit in terram suam
1Mach 10.14
tantum in Bethsuram remanserant aliqui ex his qui reliquerant legem et praecepta Dei erat enim haec eis ad refugium
1Mach 10.15
et audivit Alexander rex promissa quae promisit Demetrius Ionathae et narraverunt ei proelia et virtutes quas ipse fecit et fratres eius et labores quos laboraverunt
1Mach 10.16
et ait numquid inveniemus aliquem virum talem et nunc faciemus eum amicum et socium nostrum
1Mach 10.17
et scripsit epistulam et misit ei secundum haec verba dicens
1Mach 10.18
rex Alexander fratri Ionathae salutem
1Mach 10.19
audivimus de te quod vir potens viribus et aptus es ut sis amicus noster
1Mach 10.20
et nunc constituimus te hodie summum sacerdotem gentis tuae et ut amicus regis voceris et misit ei purpuram et coronam auream ut quae nostra sunt sentias et conserves amicitias ad nos
1Mach 10.21
et induit se Ionathas stolam sanctam septimo mense anno centesimo sexagesimo in die sollemni scenophegiae et congregavit exercitum et fecit arma copiosa
1Mach 10.22
et audivit Demetrius verba ista et contristatus est et ait
1Mach 10.23
quid hoc fecimus quod praeoccupavit nos Alexander adprehendere amicitiam Iudaeorum ad munimen sui
1Mach 10.24
scribam et ego illi verba deprecatoria et dignitates et dona ut sit mecum in adiutorio
1Mach 10.25
et scripsit in haec verba rex Demetrius genti Iudaeorum salutem
1Mach 10.26
quoniam servastis ad nos pactum et mansistis in amicitia nostra et non accessistis ad inimicos nostros audivimus et gavisi sumus
1Mach 10.27
et nunc perseverate adhuc conservare ad nos fidem et retribuemus vobis bona pro his quae fecistis nobiscum
1Mach 10.28
et remittemus vobis praestationes multas et dabimus vobis donationes
1Mach 10.29
et nunc absolvo vos et omnes Iudaeos a tributis et pretia salis indulgeo et coronas remitto et tertias seminis
1Mach 10.30
et dimidiam partem fructus ligni
1Mach 10.31
quod est portionis meae relinquo vobis ex hodierno et deinceps ne accipiatur a terra Iuda et a tribus civitatibus quae additae sunt illi ex Samaria et Galilea ex hodierna die et in totum tempus
1Mach 10.32
et Hierusalem sit sancta et libera cum finibus suis et decimae et tributa ipsius sint
1Mach 10.33
remitto etiam potestatem arcis quae est in Hierusalem et do eam summo sacerdoti et constituat in ea viros quoscumque ipse elegerit qui custodiant eam
1Mach 10.34
et omnem animam Iudaeorum quae captiva est a terra Iuda in omni regno meo relinquo liberam gratis ut omnes a tributis resolvantur etiam pecorum suorum
1Mach 10.35
et omnes dies sollemnes et sabbata et neomeniae et dies decreti et tres dies ante diem sollemnem et tres post diem sollemnem sint omnes inmunitatis et remissionis omnibus Iudaeis qui sunt in regno meo
1Mach 10.36
et nemo potestatem agere aliquid habeat et movere negotii adversus aliquem eorum in omni causa
1Mach 10.37
et ut adscribantur ex Iudaeis in exercitu regis ad triginta milia virorum et dabuntur illis copiae ut oportet omnibus exercitibus regis et ex ipsis ordinabuntur qui sint in munitionibus regis magni
1Mach 10.38
et ex his constituentur supra negotia regni quae aguntur ex fide et principes sint ex eis et ambulent legibus suis sicut praecepit rex in terra Iuda
1Mach 10.39
et tres civitates quae additae sunt Iudaeae ex regione Samariae cum Iudaea reputentur ut sint sub uno et non oboediant aliae potestati nisi summi sacerdotis
1Mach 10.40
Ptolomaidam et confines eius quas dedi donum sanctis qui sunt in Hierusalem ad necessarios sumptus sanctorum
1Mach 10.41
et ego singulis annis dabo quindecim milia siclorum argenti de rationibus regis quae me contingunt
1Mach 10.42
et omne quod reliquum fuit quod non reddiderant qui super negotia erant annis prioribus ex hoc dabunt in opera domus
1Mach 10.43
et super haec quinque milia siclorum argenti quae accipiebant de sanctorum ratione per singulos annos et haec ad sacerdotes pertineant qui ministerio funguntur
1Mach 10.44
et quicumque fugerint in templum quod est in Hierosolymis et in omnibus finibus eius obnoxios regi in omni negotio dimittatis et universa quae sunt eis in regno meo libera habeant
1Mach 10.45
et ad aedificanda vel restauranda opera sanctorum sumptus dabuntur de ratione regis
1Mach 10.46
et ad extruendos muros Hierusalem et communiendos in circuitu sumptus dabuntur de ratione regis et ad construendos muros in Iudaea
1Mach 10.47
ut audivit autem Ionathas et populus sermones istos non crediderunt eis nec receperunt eos quia recordati sunt malitiae magnae quam fecerat in Israhel et tribulaverat eos valde
1Mach 10.48
et conplacuit eis in Alexandrum quia ipse fuerat eis princeps sermonum pacis et ipsi auxilium ferebant omnibus diebus
1Mach 10.49
et congregavit Alexander rex exercitum magnum et admovit castra ad Demetrium
1Mach 10.50
et commiserunt proelium reges et fugit exercitus Alexandri et insecutus est eum Demetrius et incubuit super eos
1Mach 10.51
et invaluit proelium nimis donec occidit sol et cecidit Demetrius in illa die
1Mach 10.52
et misit Alexander ad Ptolomeum regem Aegypti legatos secundum haec verba dicens
1Mach 10.53
quoniam ingressus sum in regnum meum et sedi in sede patrum meorum et obtinui principatum et contrivi Demetrium et possedi regionem nostram
1Mach 10.54
et commisi cum eo pugnam et contritus est ipse et castra eius a nobis et sedimus in sede regni eius
1Mach 10.55
et nunc statuamus ad invicem amicitiam et da mihi filiam tuam uxorem et ero gener tuus et ipsi dignitatem
1Mach 10.56
et respondit Ptolomeus rex dicens felix dies in qua reversus es ad terram patrum tuorum et sedisti in sede regni eorum
1Mach 10.57
et nunc faciam tibi quae scripsisti sed occurre Ptolomaidae ut videamus nos invicem et spondeam tibi sicut dixisti
1Mach 10.58
et exiit Ptolomeus de Aegypto ipse et Cleopatra filia eius et venit Ptolomaidae anno centesimo sexagesimo secundo
1Mach 10.59
et occurrit ei Alexander rex et dedit ei Cleopatram filiam suam et fecit nuptias eius Ptolomaidae sicut reges in magna gloria
1Mach 10.60
et scripsit rex Alexander Ionathae ut veniret obviam sibi
1Mach 10.61
et abiit cum gloria Ptolomaidem et occurrit ibi duobus regibus et dedit illis argentum multum et aurum et dona et invenit gratiam in conspectu eorum
1Mach 10.62
et convenerunt adversus eum viri pestilentes ex Israhel viri iniqui interpellantes adversus eum et non intendit ad eos rex
1Mach 10.63
et iussit expoliari Ionathan vestimentis suis et induit eum purpura et ita fecerunt et conlocavit eum rex sedere secum
1Mach 10.64
dixitque principibus exite cum eo in medio civitatis et praedicate ut nemo interpellet adversus eum de ullo negotio nec quisquam ei molestus sit de ulla ratione
1Mach 10.65
et factum est ut viderunt qui interpellabant gloriam eius quae praedicabatur et opertum eum purpura fugerunt omnes
1Mach 10.66
et magnificavit eum rex et scripsit eum inter primos amicos et posuit eum ducem et participem principatus
1Mach 10.67
et reversus est Ionathan in Hierusalem cum pace et laetitia
1Mach 10.68
in anno centesimo sexagesimo quinto venit Demetrius filius Demetrii a Creta in terram patrum suorum
1Mach 10.69
et audivit Alexander rex et contristatus est valde et reversus est Antiochiam
1Mach 10.70
et constituit Demetrius Apollonium qui praeerat Coelesyriae et congregavit exercitum magnum et accessit ad Iamniam et misit ad Ionathan summum sacerdotem
1Mach 10.71
dicens tu solus resistis nobis ego autem factus sum in derisum et in obprobrium propterea quia tu potestatem exerces in montibus
1Mach 10.72
nunc ergo si confidis in virtutibus tuis descende ad nos in campum et conparemus illic invicem quia mecum est virtus bellorum
1Mach 10.73
interroga et disce qui sim ego et ceteri qui auxilio sunt mihi qui et dicunt quia non potest stare pes vester ante faciem nostram quia bis in fugam conversi sunt patres tui in terra sua
1Mach 10.74
et nunc quomodo poteris sustinere equitatum exercitum tantum in campo ubi non est lapis neque saxum neque locus fugiendi
1Mach 10.75
ut audivit autem Ionathas sermones Apollonii motus est animo et elegit decem milia virorum et exiit ab Hierusalem et concurrit ei Simon frater eius in adiutorium
1Mach 10.76
et adplicuerunt castra in Ioppen et exclusit eum a civitate quia custodia Apollonii Ioppe erat et obpugnavit eam
1Mach 10.77
et exterriti qui erant intra civitatem aperuerunt ei et obtinuit Ionathas Ioppen
1Mach 10.78
et audivit Apollonius et admovit tria milia equitum et exercitum multum
1Mach 10.79
et abiit Azotum tamquam iter faciens et statim exiit in campum eo quod haberet multitudinem equitum et confideret in eis et insecutus est eum Ionathas in Azotum et proelium commiserunt
1Mach 10.80
et reliquit Apollonius in castris mille equites post eos occulte
1Mach 10.81
et cognovit Ionathas quoniam sunt insidiae post se et circuierunt castra eius a mane usque ad vesperam
1Mach 10.82
populus autem stabat sicut praecepit Ionathas et laboraverunt equi eorum
1Mach 10.83
et eiecit Simon exercitum suum et commisit contra legionem equites enim fatigati erant et contriti sunt ab eo et fugerunt
1Mach 10.84
et qui dispersi sunt in campum fugerunt in Azotum et intraverunt in Bethdagon idolum suum ut se liberarent
1Mach 10.85
et succendit Ionathas Azotum et civitates quae erant in circuitu eius et accepit spolia eorum et templum Dagon et eos qui fugerunt in illud succendit igni
1Mach 10.86
et fuerunt qui ceciderunt gladio cum his qui succensi sunt fere octo milia virorum
1Mach 10.87
et movit inde Ionathas castra et adplicuit ea Ascalona et exierunt de civitate obviam illi in magna gloria
1Mach 10.88
et reversus est Ionathas in Hierusalem cum suis habentibus spolia multa
1Mach 10.89
et factum est ut audivit Alexander rex sermones istos addidit adhuc glorificare Ionathan
1Mach 10.90
et misit ei fibulam auream sicuti est consuetudo dari cognatis regum et dedit ei Accaron et omnes fines eius in possessionem

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages