1Mach 5

Teljes szövegű keresés

1Mach 5
1Mach 5.1
et factum est ut audierunt gentes in circuitu quia aedificatum est altare et sancta sicut prius et iratae sunt valde
1Mach 5.2
et cogitabant tollere genus Iacob qui erant inter eos et coeperunt occidere de populo et persequi
1Mach 5.3
et debellabat Iudas filios Esau in Idumea et eos qui erant in Acrabattene quia circumsedebant Israhelitas et percussit eos plaga magna
1Mach 5.4
et recordatus est malitiam filiorum Bean qui erant populo in laqueum et in scandalum insidiantes in via
1Mach 5.5
et conclusi sunt ab eo in turribus et adplicuit ad eos et anathematizavit eos et incendit turres eorum igni cum omnibus qui in eis erant
1Mach 5.6
et transiit ad filios Ammon et invenit manum fortem et populum copiosum et Timotheum ducem ipsorum
1Mach 5.7
et commisit cum eis proelia multa et contriti sunt in conspectu eorum et percussit eos
1Mach 5.8
et cepit Iazer civitatem et filias eius et reversus est in Iudaeam
1Mach 5.9
et congregatae sunt gentes quae sunt in Galaad adversus Israhelitas qui erant in finibus eorum ut tollerent eos et fugerunt in Datheman munitionem
1Mach 5.10
et miserunt litteras ad Iudam et fratres eius dicentes congregatae sunt adversum nos gentes per circuitum ut auferant nos
1Mach 5.11
et parant venire et occupare munitionem in quam confugimus et Timotheus est dux exercitus eorum
1Mach 5.12
nunc ergo veni eripe nos de manibus eorum quia cecidit multitudo de nobis
1Mach 5.13
et omnes fratres nostri qui erant in locis Tubi interfecti sunt et captivas abduxerunt uxores eorum et natos et spolia et peremerunt illic ferme mille viros
1Mach 5.14
et adhuc epistulae legebantur et ecce alii nuntii venerunt de Galilea conscissis tunicis nuntiantes secundum verba haec
1Mach 5.15
dicentes convenisse adversum se a Ptolomaida et Tyro et Sidone et omni Galilea alienigenas ut nos consumant
1Mach 5.16
ut audivit autem Iudas et populus sermones istos convenit ecclesia magna cogitare quid facerent fratribus suis qui in tribulatione erant et expugnabantur ab eis
1Mach 5.17
dixitque Iudas Simoni fratri suo elige tibi viros et vade et libera fratres tuos in Galilea ego enim et frater meus Ionathas ibimus in Galaditin
1Mach 5.18
et reliquit Iosepphum filium Zacchariae et Azariam duces populi cum residuo exercitu in Iudaeam ad custodiendum
1Mach 5.19
et praecepit illi dicens praeesto populo huic et nolite bellum committere adversus gentes donec revertamur
1Mach 5.20
et dati sunt Simoni viri tria milia ut iret in Galileam Iudae autem octo milia in Galaditin
1Mach 5.21
et abiit Simon in Galileam et commisit proelia multa cum gentibus et contritae sunt gentes a facie eius et persecutus est eos usque ad portam
1Mach 5.22
Ptolomaidis et ceciderunt de gentibus fere tria milia virorum et accepit spolia eorum
1Mach 5.23
et sumpsit eos qui erant in Galilea et in Arbatis cum uxoribus et natis et omnibus quae erant illis et adduxit in Iudaeam cum laetitia magna
1Mach 5.24
et Iudas Macchabeus et Ionathas et fratres eius transierunt Iordanem et abierunt viam trium dierum per desertum
1Mach 5.25
et occurrerunt eis Nabuthei et susceperunt eos pacifice et narraverunt eis omnia quae acciderunt fratribus in Galaditide
1Mach 5.26
et quia multi ex eis conprehensi sunt in Basara et Bosor et in Alimis et in Casfor et Macet et Carnain hae omnes civitates munitae et magnae
1Mach 5.27
sed et in ceteris civitatibus Galaditidis tenentur conprehensi et in crastinum constituerunt admovere exercitum civitatibus his et conprehendere et tollere eos in una die
1Mach 5.28
et convertit Iudas et exercitus eius viam in desertum Bosor repente et occupavit civitatem et occidit omnem masculum in ore gladii et accepit omnia spolia eorum et succendit eam igni
1Mach 5.29
et surrexerunt inde nocte et ibant usque ad munitionem
1Mach 5.30
et factum est diluculo cum adlevassent oculos suos ecce populus multus cuius non erat numerus portantes scalas et machinas ut conprehenderent munitionem et expugnarent eos
1Mach 5.31
et vidit Iudas quia coepit bellum et clamor belli ascendit in caelum sicut tuba et clamor magnus de civitate
1Mach 5.32
et exercitui dixit pugnate hodie pro fratribus vestris
1Mach 5.33
et venit tribus ordinibus post eos et exclamaverunt tubis et clamaverunt in oratione
1Mach 5.34
et cognoverunt castra Timothei quia Macchabeus est et refugerunt a facie eius et percusserunt eos plaga magna et ceciderunt ex eis in illa die fere octo milia virorum
1Mach 5.35
et divertit Iudas in Maspha et expugnavit et cepit eam et occidit omnem masculum eius et sumpsit spolia eius et succendit eam igni
1Mach 5.36
inde perrexit et cepit Casbon et Maged et Bosor et reliquas civitates Galaditidis
1Mach 5.37
post haec autem verba congregavit Timotheus exercitum alium et castra posuit contra Rafon trans torrentem
1Mach 5.38
et misit Iudas speculari exercitum et renuntiaverunt ei dicentes quia convenerunt ad eum omnes gentes quae in circuitu nostro sunt exercitus multus nimis
1Mach 5.39
et Arabas conduxit in auxilium et castra posuerunt trans torrentem parati venire ad te in proelium et abiit Iudas obviam illis
1Mach 5.40
et ait Timotheus principibus exercitus sui cum adpropiaverit Iudas et exercitus eius ad torrentem aquae si transierit ad nos prior non poterimus sustinere eum quia potens poterit adversum nos
1Mach 5.41
si vero timuerit transire et posuerit castra extra flumen transfretemus ad eos et poterimus adversus illum
1Mach 5.42
ut autem adpropinquavit Iudas ad torrentem aquae statuit scribas populi secus torrentem et mandavit eis dicens neminem hominum reliqueritis sed veniant omnes in proelium
1Mach 5.43
et transfretavit ad illos prior et omnis populus post eum et contritae sunt ante faciem eorum omnes gentes et proiecerunt arma sua et fugerunt ad fanum quod est in Carnain
1Mach 5.44
et occupavit ipsam civitatem et fanum succendit igni cum omnibus qui erant in ipso et oppressa est Carnain et non potuit sustinere contra faciem Iudae
1Mach 5.45
et congregavit Iudas universos Israhelitas qui erant in Galaditiden a minimo usque ad maximum et uxores eorum et natos et exercitum magnum valde ut venirent in terram Iudae
1Mach 5.46
et venerunt usque Efron et haec civitas magna in ingressu posita munita valde et non erat declinare ab ea dextra vel sinistra sed per mediam iter erat
1Mach 5.47
et incluserunt se qui erant in civitate et obstruxerunt portas lapidibus et misit ad eos Iudas verbis pacificis
1Mach 5.48
dicens transeamus per terram vestram ut eamus in terram nostram et nemo vobis nocebit tantum pedibus transibimus et nolebant eis aperire
1Mach 5.49
et praecepit Iudas praedicare in castris ut adplicarent unusquisque in quo erat loco
1Mach 5.50
et adplicuerunt viri virtutis et obpugnavit civitatem illam tota die et tota nocte et tradita est civitas in manu eius
1Mach 5.51
et peremerunt omnem masculum in ore gladii et eradicavit eam et accepit spolia eius et transiit per totam civitatem super interfectos
1Mach 5.52
et transgressi sunt Iordanem in campo magno contra Bethsan
1Mach 5.53
et erat Iudas congregans extremos et exhortabatur populum per totam viam donec venerunt in terram Iuda
1Mach 5.54
et ascenderunt in montem Sion cum laetitia et gaudio et obtulerunt holocausta quod nemo ex eis cecidisset donec reverterentur in pace
1Mach 5.55
et in diebus quibus erat Iudas et Ionathas in terra Galaad et Simeon frater eius in Galilea contra faciem Ptolomaidis
1Mach 5.56
audivit Iosepphus Zacchariae filius et Azarias princeps virtutis res bene gestas et proelia quae facta sunt
1Mach 5.57
et dixit faciamus et ipsi nobis nomen et eamus pugnare adversum gentes quae in circuitu nostro sunt
1Mach 5.58
et praecepit his qui erant in exercitu suo et abierunt Iamniam
1Mach 5.59
et exivit Gorgias de civitate et viri eius obviam illi in pugnam
1Mach 5.60
et fugati sunt Iosepphus et Azarias usque in fines Iudae et ceciderunt illa die de populo Israhel ad duo milia viri et facta est fuga magna in populo
1Mach 5.61
quia non audierunt Iudam et fratres eius existimantes se fortiter facturos
1Mach 5.62
ipsi autem non erant de semine virorum illorum per quos salus facta est in Israhel
1Mach 5.63
et viri Iuda magnificati sunt valde in conspectu omnis Israhel et gentium omnium ubi audiebatur nomen eorum
1Mach 5.64
et convenerunt ad eos fausta adclamantes
1Mach 5.65
et exivit Iudas et fratres eius et expugnabant filios Esau in terra quae ad austrum est et percussit Chebron et filias eius et muros eius et turres succendit in circuitu
1Mach 5.66
et movit castra ut iret in terra alienigenarum et perambulabat Samariam
1Mach 5.67
in illa die ceciderunt sacerdotes in bello dum vult fortiter facere dum sine consilio exiit in proelium
1Mach 5.68
et declinavit Iudas in Azotum in terra alienigenarum et vidit aras eorum et spolia deorum ipsorum succendit igni et cepit spolia civitatum et regressus est in terram Iuda

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages