Sap 12

Teljes szövegű keresés

Sap 12
Sap 12.1
bonus enim spiritus tuus est in omnibus
Sap 12.2
propter quod hos qui exerrant partibus corripis et de quibus peccant admonens adloqueris ut relicta malitia credant in te Domine
Sap 12.3
et illos enim antiquos inhabitatores sanctae tuae terrae odiens
Sap 12.4
quoniam odibilia tibi opera faciebant per medicamina et sacrificia iniusta
Sap 12.5
et filiorum necatores sine misericordia et comestores viscerum hominum devorationem et sanguinis a medio sacramento tuo
Sap 12.6
et auctores parentes animarum inauxiliatarum voluisti perdere per manus parentum nostrorum
Sap 12.7
ut dignam perciperent peregrinationem puerorum Dei quae tibi omnium carior est terra
Sap 12.8
sed et his tamquam hominibus pepercisti et misisti antecessores exercitus tui vespas ut illos paulatim exterminarent
Sap 12.9
non quia inpotens eras in bello subicere impios iustis aut bestiis saevis aut verbo duro simul exterminare
Sap 12.10
sed partibus iudicans dabas locum paenitentiae non ignorans quoniam nequa est natio illorum et naturalis malitia ipsorum et quoniam non poterat mutari cogitatio illorum in perpetuum
Sap 12.11
semen enim erat maledictum ab initio nec timens aliquem veniam dabas peccatis illorum
Sap 12.12
quis enim dicet tibi quid fecisti aut quis stabit contra iudicium tuum aut quis in conspectum tuum veniet vindex iniquorum hominum aut quis tibi inputabit si nationes perierint quas tu fecisti
Sap 12.13
nec enim est alius Deus quam tu cuius cura est de omnibus ut ostendas quoniam non iniuste iudicasti
Sap 12.14
neque rex neque tyrannus in conspectu tuo inquirent de his quos perdidisti
Sap 12.15
cum sis ergo iustus iuste omnia disponis ipsum quoque qui non debet puniri condemnas exterum aestimas a tua virtute
Sap 12.16
virtus enim tua iustitiae initium est et ob hoc quod omnium Dominus es omnibus te parcere facis
Sap 12.17
virtutem enim ostendis tu qui non crederis esse in virtute consummatus et hos qui sciunt audaciam traducis
Sap 12.18
tu autem dominator virtutis cum tranquillitate iudicas et cum magna reverentia disponis nos subest enim tibi cum voles posse
Sap 12.19
docuisti autem populum tuum per talia opera quoniam oportet iustum esse et humanum et bonae spei fecisti filios tuos quoniam das locum in peccatis paenitentiae
Sap 12.20
si enim inimicos servorum tuorum et debitos morti cum tanta cruciasti adtentione et liberasti dans tempus et locum per quae possint mutari a malitia
Sap 12.21
cum quanta diligentia iudicasti filios tuos quorum parentibus iuramenta et conventiones dedisti bonarum promissionum
Sap 12.22
cum ergo nobis disciplinam das inimicos nostros multipliciter flagellas ut bonitatem tuam cogitemus iudicantes et cum de nobis iudicatur speremus misericordiam
Sap 12.23
unde et illis qui in vita sua insensate et iniuste vixerunt per haec quae coluerunt dedisti summa tormenta
Sap 12.24
etenim in erroris via diutius erraverunt deos aestimantes haec quae in animalibus sunt supervacua infantum insensatorum more viventes
Sap 12.25
propter hoc tamquam pueris insensatis iudicium in derisum dedisti
Sap 12.26
qui autem ludibriis increpationis non correpti sunt dignum Dei iudicium experti sunt
Sap 12.27
in his enim quae patiebantur moleste ferebant in quibus patientes indignabantur per haec quos putabant deos in ipsis cum exterminarentur videntes illum quem olim negabant se nosse Deum verum agnoverunt propter quod et finis condemnationis illis veniet

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages