Eccl 33

Teljes szövegű keresés

Eccl 33
Eccl 33.1
timenti Dominum non occurrent mala sed in temptatione Deus illum conservat et liberabit a malis
Eccl 33.2
sapiens non odit mandata et iustitias et non inludetur quasi in procella navis
Eccl 33.3
homo sensatus credit legi Dei et lex illi fidelis
Eccl 33.4
qui interrogationem manifestat parabit verbum et sic deprecatus exaudietur et conservabit disciplinam et tunc respondebit
Eccl 33.5
praecordia fatui quasi rota carri et quasi axis versatilis cogitatus illius
Eccl 33.6
equus admissarius sicut amicus subsannator sub omni suprasedenti hinnit
Eccl 33.7
quare dies diem superat et iterum lux lucem et annus annum a sole
Eccl 33.8
a Domini scientia separati sunt facto sole et praeceptum custodiente
Eccl 33.9
et inmutavit tempora et dies festos ipsorum et in illis dies festos celebraverunt ad horam
Eccl 33.10
ex ipsis exaltavit et magnificavit Deus et ex ipsis posuit in numerum dierum et homines omnes de solo et ex terra unde creatus est Adam
Eccl 33.11
in multitudine disciplinae Domini separavit eos et inmutavit vias eorum
Eccl 33.12
et ex ipsis benedixit et exaltavit et ex ipsis sanctificavit et ad se adplicavit et ex ipsis maledixit et humiliavit et convertit illos a separatione ipsorum
Eccl 33.13
quasi lutum figuli in manus ipsius plasmare illud et disponere
Eccl 33.14
omnes viae eius secundum dispositionem eius sic homo in manu illius qui se fecit reddet illis secundum iudicium suum
Eccl 33.15
contra malum bonum est et contra mortem vita sic et contra virum iustum peccator et sic intuere in omnia opera Altissimi duo duo unum contra unum
Eccl 33.16
et ego novissimus vigilavi et quasi qui colligit acinos post vindemiatores
Eccl 33.17
in benedictione Dei et ipse speravi et quasi qui vindemiat replevi torcular
Eccl 33.18
respicite quoniam non soli mihi laboravi sed omnibus exquirentibus disciplinam
Eccl 33.19
audite me magnati et omnes populi et rectores ecclesiae auribus percipite
Eccl 33.20
filio et mulieri fratri et amico non des potestatem super te in vita tua non dederis alio possessionem tuam ne forte paeniteat te et depreceris pro illis
Eccl 33.21
dum adhuc superes et adspiras non inmutabit te omnis caro
Eccl 33.22
melius est enim ut filii tui te rogent quam te respicere in manus filiorum tuorum
Eccl 33.23
in omnibus operibus tuis praecellens esto
Eccl 33.24
ne dederis maculam in gloriam tuam in die consummationis dierum vitae tuae et in tempore exitus tui distribue hereditatem tuam
Eccl 33.25
cibaria et virga et onus asino panis et disciplina et opus servo
Eccl 33.26
operatur in disciplina et quaerit requiescere laxa manus illi et quaerit libertatem
Eccl 33.27
iugum et lorum curvant collum durum et servum inclinant operationes adsiduae
Eccl 33.28
servo malivolo tortura et conpedes mitte illum in operatione ne vacet
Eccl 33.29
multam enim malitiam docuit otiositas
Eccl 33.30
in opera constitue eum sic enim condecet illi quod si non obaudierit grava illum conpedibus et non amplifices super omnem carnem verum sine iudicio nihil facias grave
Eccl 33.31
si est tibi servus sit tibi quasi anima tua quasi fratrem sic eum tracta quoniam in sanguine animae parasti eum
Eccl 33.32
si laeseris illum iniuste
Eccl 33.33
et extollens discesserit quem quaeres et in qua via quaeras illum nescis

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages