Eccl 51
Eccl 51
Eccl 51.1
oratio Iesu filii Sirach confitebor tibi Domine rex et conlaudabo te Deum salvatorem meum
Eccl 51.2
confiteor nomini tuo quoniam adiutor et protector factus es mihi
Eccl 51.3
et liberasti corpus meum a perditione a laqueo linguae iniquae et a labiis operantium mendacium et in conspectu adstantium factus es mihi adiutor
Eccl 51.4
et liberasti me secundum multitudinem misericordiae nominis tui a rugientibus paratis ad escam
Eccl 51.5
de manibus quaerentium animam meam et de portis tribulationis quae circumdederunt me
Eccl 51.6
a pressura flammae quae circumdedit me et in medio ignis non sum aestuatus
Eccl 51.7
de altitudine ventris inferi et a lingua coinquinata et verbo mendacii a rege iniquo et lingua iniusta
Eccl 51.8
laudavit usque ad mortem anima mea Dominum
Eccl 51.9
et vita mea adpropinquans erat infero deorsum
Eccl 51.10
circumdederunt me undique et non erat qui adiuvaret respiciens eram ad adiutorium meum et non erat
Eccl 51.11
memoratus sum misericordiae tuae Domine et operationis tuae quae a saeculo sunt
Eccl 51.12
quoniam erues sustinentes te et liberas eos de manibus gentium
Eccl 51.13
exaltasti super terram habitationem meam et pro morte defluenti deprecatus sum
Eccl 51.14
invocavi Dominum patrem Domini mei ut non derelinquat me in die tribulationis meae et in tempore superborum sine adiutorio
Eccl 51.15
laudabo nomen tuum adsidue et conlaudabo illum in confessione exaudita est oratio mea
Eccl 51.16
liberasti me de perditione et eripuisti me de tempore iniquo
Eccl 51.17
propterea confitebor et laudem dicam tibi et benedicam nomen Domini
Eccl 51.18
cum adhuc iunior sum priusquam oberrem quaesivi sapientiam palam in oratione mea
Eccl 51.19
ante tempus postulabam pro illa et usque in novissimis inquiram eam defloriet tamquam praecox uva
Eccl 51.20
laetatum est cor meum in ea ambulavit pes meus iter rectum a iuventute mea investigabam eam
Eccl 51.21
inclinavi modice aurem meam et excepi illam
Eccl 51.22
multam inveni in me ipso sapientiam multum profeci in ea
Eccl 51.23
dans mihi sapientiam dabo gloriam
Eccl 51.24
consiliatus sum enim ut facerem illam zelatus sum bonum et non confundor
Eccl 51.25
conluctata est anima mea in illa et in faciendo eam confirmatus sum
Eccl 51.26
manus meas extendi in altum et insapientia eius luxi
Eccl 51.27
animam meam direxi ad illam et in agnitione inveni eam
Eccl 51.28
possedi cum ipsis cor ab initio propter hoc non derelinquar
Eccl 51.29
venter meus conturbatus est quaerendo illam propterea possidebo bonam possessionem
Eccl 51.30
dedit enim mihi Dominus linguam mercedem meam et in ipsa laudabo eum
Eccl 51.31
adpropiate ad me indocti et congregate vos in domum disciplinae
Eccl 51.32
quid adhuc retardatis et quid dicitis in his animae vestrae sitiunt vehementer
Eccl 51.33
aperui os meum et locutus sum conparate vobis sine argento
Eccl 51.34
et collum vestrum subicite sub iugo et suscipiat anima vestra disciplinam in proximo est enim invenire eam
Eccl 51.35
videte oculis vestris quoniam modice laboravi et inveni mihi multam requiem
Eccl 51.36
adsumite disciplinam in multo numero argenti et copiosum aurum possidete in ea
Eccl 51.37
laetetur anima vestra in misericordia eius et non confundemini in laude ipsius
Eccl 51.38
operamini opus vestrum ante tempus et dabit vobis mercedem vestram in tempore suo
![Arcanum Újságok](https://maps-static-cdn.arcanum.com/media/uploads/promo/adt-hu.jpg)