Dan 3

Teljes szövegű keresés

Dan 3
Dan 3.1
Nabuchodonosor rex fecit statuam auream altitudine cubitorum sexaginta latitudine cubitorum sex et statuit eam in campo Duram provinciae Babylonis
Dan 3.2
itaque Nabuchodonosor rex misit ad congregandos satrapas magistratus et iudices duces et tyrannos et praefectos omnesque principes regionum ut convenirent ad dedicationem statuae quam erexerat Nabuchodonosor rex
Dan 3.3
tunc congregati sunt satrapae magistratus et iudices duces et tyranni et optimates qui erant in potestatibus constituti et universi principes regionum ut convenirent ad dedicationem statuae quam erexerat Nabuchodonosor rex stabant autem in conspectu statuae quam posuerat Nabuchodonosor
Dan 3.4
et praeco clamabat valenter vobis dicitur populis tribubus et linguis
Dan 3.5
in hora qua audieritis sonitum tubae et fistulae et citharae sambucae et psalterii et symphoniae et universi generis musicorum cadentes adorate statuam auream quam constituit Nabuchodonosor rex
Dan 3.6
si quis autem non prostratus adoraverit eadem hora mittetur in fornacem ignis ardentis
Dan 3.7
post haec igitur statim ut audierunt omnes populi sonitum tubae fistulae et citharae sambucae et psalterii et symphoniae et omnis generis musicorum cadentes omnes populi et tribus et linguae adoraverunt statuam auream quam constituerat Nabuchodonosor rex
Dan 3.8
statimque et in ipso tempore accedentes viri chaldei accusaverunt Iudaeos
Dan 3.9
dixeruntque Nabuchodonosor regi rex in aeternum vive
Dan 3.10
tu rex posuisti decretum ut omnis homo qui audierit sonitum tubae fistulae et citharae sambucae et psalterii et symphoniae et universi generis musicorum prosternat se et adoret statuam auream
Dan 3.11
si quis autem non procidens adoraverit mittatur in fornacem ignis ardentem
Dan 3.12
sunt ergo viri iudaei quos constituisti super opera regionis Babyloniae Sedrac Misac et Abdenago viri isti contempserunt rex decretum tuum deos tuos non colunt et statuam auream quam erexisti non adorant
Dan 3.13
tunc Nabuchodonosor in furore et in ira praecepit ut adducerentur Sedrac Misac et Abdenago qui confestim adducti sunt in conspectu regis
Dan 3.14
pronuntiansque Nabuchodonosor rex ait eis verene Sedrac Misac et Abdenago deos meos non colitis et statuam auream quam constitui non adoratis
Dan 3.15
nunc ergo si estis parati quacumque hora audieritis sonitum tubae fistulae et citharae sambucae psalterii et symphoniae omnisque generis musicorum prosternite vos et adorate statuam quam feci quod si non adoraveritis eadem hora mittemini in fornacem ignis ardentem et quis est Deus qui eripiat vos de manu mea
Dan 3.16
respondentes Sedrac Misac et Abdenago dixerunt regi Nabuchodonosor non oportet nos de hac re respondere tibi
Dan 3.17
ecce enim Deus noster quem colimus potest eripere nos de camino ignis ardentis et de manibus tuis rex liberare
Dan 3.18
quod si noluerit notum tibi sit rex quia deos tuos non colimus et statuam auream quam erexisti non adoramus
Dan 3.19
tunc Nabuchodonosor repletus est furore et aspectus faciei illius inmutatus est super Sedrac Misac et Abdenago et praecepit ut succenderetur fornax septuplum quam succendi consuerat
Dan 3.20
et viris fortissimis de exercitu suo iussit ut ligatis pedibus Sedrac Misac et Abdenago mitterent eos in fornacem ignis ardentem
Dan 3.21
et confestim viri illi vincti cum bracis suis et tiaris et calciamentis et vestibus missi sunt in medium fornacis ignis ardentis
Dan 3.22
nam iussio regis urguebat fornax autem succensa erat nimis porro viros illos qui miserant Sedrac Misac et Abdenago interfecit flamma ignis
Dan 3.23
viri autem hii id est tres Sedrac Misac et Abdenago ceciderunt in medio camini ignis ardentis conligati
Dan 3.24
et ambulabant in medio flammae laudantes Deum et benedicentes Domino
Dan 3.25
stans autem Azarias oravit sic aperiensque os suum in medio ignis ait
Dan 3.26
benedictus es Domine Deus patrum nostrorum et laudabilis et gloriosum nomen tuum in saecula
Dan 3.27
quia iustus es in omnibus quae fecisti nobis et universa opera tua vera et viae tuae rectae et omnia iudicia tua vera
Dan 3.28
iudicia enim vera fecisti iuxta omnia quae induxisti super nos et super civitatem sanctam patrum nostrorum Hierusalem quia in veritate et in iudicio induxisti omnia haec propter peccata nostra
Dan 3.29
peccavimus enim et inique egimus recedentes a te et deliquimus in omnibus
Dan 3.30
et praecepta tua non audivimus nec observavimus nec fecimus sicut praeceperas nobis ut bene nobis esset
Dan 3.31
omnia ergo quae induxisti super nos et universa quae fecisti nobis vero iudicio fecisti
Dan 3.32
et tradidisti nos in manibus inimicorum iniquorum et pessimorum praevaricatorumque et regi iniusto et pessimo ultra omnem terram
Dan 3.33
et nunc non possumus aperire os confusio et obprobrium facti sumus servis tuis et his qui colunt te
Dan 3.34
ne quaesumus tradas nos in perpetuum propter nomen tuum et ne dissipes testamentum tuum
Dan 3.35
neque auferas misericordiam tuam a nobis propter Abraham dilectum tuum et Isaac servum tuum et Israhel sanctum tuum
Dan 3.36
quibus locutus es pollicens quod multiplicares semen eorum sicut stellas caeli et sicut harenam quae est in litore maris
Dan 3.37
quia Domine inminuti sumus plus quam omnes gentes sumusque humiles in universa terra hodie propter peccata nostra
Dan 3.38
et non est in tempore hoc princeps et propheta et dux neque holocaustum neque sacrificium neque oblatio neque incensum neque locus primitiarum coram te
Dan 3.39
ut possimus invenire misericordiam sed in anima contrita et spiritu humilitatis suscipiamur
Dan 3.40
sicut in holocaustum arietum et taurorum et sicut in milibus agnorum pinguium sic fiat sacrificium nostrum in conspectu tuo hodie ut placeat tibi quoniam non est confusio confidentibus in te
Dan 3.41
et nunc sequimur in toto corde et timemus te et quaerimus faciem tuam
Dan 3.42
ne confundas nos sed fac nobiscum iuxta mansuetudinem tuam et secundum multitudinem misericordiae tuae
Dan 3.43
et erue nos in mirabilibus tuis et da gloriam nomini tuo Domine
Dan 3.44
et confundantur omnes qui ostendunt servis tuis mala confundantur in omni potentia et robur eorum conteratur
Dan 3.45
sciant quia tu Domine Deus solus et gloriosus super orbem terrarum
Dan 3.46
et non cessabant qui inmiserant eos ministri regis succendere fornacem naptha et stuppa et pice et malleolis
Dan 3.47
et effundebatur flamma super fornacem cubitis quadraginta novem
Dan 3.48
et erupit et incendit quos repperit iuxta fornacem de Chaldeis
Dan 3.49
angelus autem descendit cum Azaria et sociis eius in fornacem et excussit flammam ignis de fornace
Dan 3.50
et fecit medium fornacis quasi ventum roris flantem et non tetigit eos omnino ignis neque contristavit nec quicquam molestiae intulit
Dan 3.51
tunc hii tres quasi ex uno ore laudabant et glorificabant et benedicebant Deo in fornace dicentes
Dan 3.52
benedictus es Domine Deus patrum nostrorum et laudabilis et superexaltatus in saecula et benedictum nomen gloriae tuae sanctum et laudabile et superexaltatum in omnibus saeculis
Dan 3.53
benedictus es in templo sancto gloriae tuae et superlaudabilis et supergloriosus in saecula
Dan 3.54
benedictus es in throno regni tui et superlaudabilis et superexaltatus in saecula
Dan 3.55
benedictus es qui intueris abyssos et sedes super cherubin et laudabilis et superexaltatus in saecula
Dan 3.56
benedictus es in firmamento caeli et laudabilis et gloriosus in saecula
Dan 3.57
benedicite omnia opera Domini Domino laudate et superexaltate eum in saecula
Dan 3.58
benedicite angeli Domino laudate et superexaltate eum in saecula
Dan 3.59
benedicite caeli Domino laudate et superexaltate eum in saecula
Dan 3.60
benedicite aquae omnes quae super caelos sunt Domino laudate et superexaltate eum in saecula
Dan 3.61
benedicite omnes virtutes Domini Domino laudate et superexaltate eum in saecula
Dan 3.62
benedicite sol et luna Domino laudate et superexaltate eum in saecula
Dan 3.63
benedicite stellae caeli Domino laudate et superexaltate eum in saecula
Dan 3.64
benedicite omnis imber et ros Domino laudate et superexaltate eum in saecula
Dan 3.65
benedicite omnis spiritus Domino laudate et superexaltate eum in saecula
Dan 3.66
benedicite ignis et aestus Domino laudate et superexaltate eum in saecula
Dan 3.67
benedicite frigus et aestus Domino laudate et superexaltate eum in saecula
Dan 3.68
benedicite rores et pruina Domino laudate et superexaltate eum in saecula
Dan 3.69
benedicite gelu et frigus Domino laudate et superexaltate eum in saecula
Dan 3.70
benedicite glacies et nives Domino laudate et superexaltate eum in saecula
Dan 3.71
benedicite noctes et dies Domino laudate et superexaltate eum in saecula
Dan 3.72
benedicite lux et tenebrae Domino laudate et superexaltate eum in saecula
Dan 3.73
benedicite fulgura et nubes Domino laudate et superexaltate eum in saecula
Dan 3.74
benedicat terra Dominum laudet et superexaltet eum in saecula
Dan 3.75
benedicite montes et colles Domino laudate et superexaltate eum in saecula
Dan 3.76
benedicite universa germinantia in terra Domino laudate et superexaltate eum in saecula
Dan 3.77
benedicite fontes Domino laudate et superexaltate eum in saecula
Dan 3.78
benedicite maria et flumina Domino laudate et superexaltate eum in saecula
Dan 3.79
benedicite cete et omnia quae moventur in aquis Domino laudate et superexaltate eum in saecula
Dan 3.80
benedicite omnes volucres caeli Domino laudate et superexaltate eum in saecula
Dan 3.81
benedicite omnes bestiae et pecora Domino laudate et superexaltate eum in saecula
Dan 3.82
benedicite filii hominum Domino laudate et superexaltate eum in saecula
Dan 3.83
benedic Israhel Domino laudate et superexaltate eum in saecula
Dan 3.84
benedicite sacerdotes Domini Domino laudate et superexaltate eum in saecula
Dan 3.85
benedicite servi Domini Domino laudate et superexaltate eum in saecula
Dan 3.86
benedicite spiritus et animae iustorum Domino laudate et superexaltate eum in saecula
Dan 3.87
benedicite sancti et humiles corde Domino laudate et superexaltate eum in saecula
Dan 3.88
benedicite Anania Azaria et Misahel Domino laudate et superexaltate eum in saecula quia eruit nos de inferno et salvos fecit de manu mortis et liberavit de medio ardentis flammae et de medio ignis eruit nos
Dan 3.89
confitemini Domino quoniam bonus quoniam in saeculum misericordia eius
Dan 3.90
benedicite omnes religiosi Domino Deo deorum laudate et confitemini quia in omnia saecula misericordia eius
Dan 3.91
tunc Nabuchodonosor rex obstipuit et surrexit propere et ait optimatibus suis nonne tres viros misimus in medio ignis conpeditos qui respondentes dixerunt regi vere rex
Dan 3.92
respondit et ait ecce ego video viros quattuor solutos et ambulantes in medio ignis et nihil corruptionis in eis est et species quarti similis filio Dei
Dan 3.93
tunc accessit Nabuchodonosor ad ostium fornacis ignis ardentis et ait Sedrac Misac et Abdenago servi Dei excelsi egredimini et venite statimque egressi sunt Sedrac Misac et Abdenago de medio ignis
Dan 3.94
et congregati satrapae magistratus et iudices et potentes regis contemplabantur viros illos quoniam nihil potestatis habuisset ignis in corporibus eorum et capillus capitis eorum non esset adustus et sarabara eorum non fuissent inmutata et odor ignis non transisset per eos
Dan 3.95
et erumpens Nabuchodonosor ait benedictus Deus eorum Sedrac videlicet Misac et Abdenago qui misit angelum suum et eruit servos suos quia crediderunt in eo et verbum regis inmutaverunt et tradiderunt corpora sua ne servirent et ne adorarent omnem deum excepto Deo suo
Dan 3.96
a me ergo positum est hoc decretum ut omnis populus et tribus et lingua quaecumque locuta fuerit blasphemiam contra Deum Sedrac Misac et Abdenago dispereat et domus eius vastetur neque enim est Deus alius qui possit ita salvare
Dan 3.97
tunc rex promovit Sedrac Misac et Abdenago in provincia Babylonis
Dan 3.98
Nabuchodonosor rex omnibus populis gentibus et linguis quae habitant in universa terra pax vobis multiplicetur
Dan 3.99
signa et mirabilia fecit apud me Deus excelsus placuit ergo mihi praedicare
Dan 3.100
signa eius quia magna sunt et mirabilia eius quia fortia et regnum eius regnum sempiternum et potestas eius in generationem et generationem

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages