Mt 22

Teljes szövegű keresés

Mt 22
Mt 22.1
et respondens Iesus dixit iterum in parabolis eis dicens
Mt 22.2
simile factum est regnum caelorum homini regi qui fecit nuptias filio suo
Mt 22.3
et misit servos suos vocare invitatos ad nuptias et nolebant venire
Mt 22.4
iterum misit alios servos dicens dicite invitatis ecce prandium meum paravi tauri mei et altilia occisa et omnia parata venite ad nuptias
Mt 22.5
illi autem neglexerunt et abierunt alius in villam suam alius vero ad negotiationem suam
Mt 22.6
reliqui vero tenuerunt servos eius et contumelia adfectos occiderunt
Mt 22.7
rex autem cum audisset iratus est et missis exercitibus suis perdidit homicidas illos et civitatem illorum succendit
Mt 22.8
tunc ait servis suis nuptiae quidem paratae sunt sed qui invitati erant non fuerunt digni
Mt 22.9
ite ergo ad exitus viarum et quoscumque inveneritis vocate ad nuptias
Mt 22.10
et egressi servi eius in vias congregaverunt omnes quos invenerunt malos et bonos et impletae sunt nuptiae discumbentium
Mt 22.11
intravit autem rex ut videret discumbentes et vidit ibi hominem non vestitum veste nuptiali
Mt 22.12
et ait illi amice quomodo huc intrasti non habens vestem nuptialem at ille obmutuit
Mt 22.13
tunc dixit rex ministris ligatis pedibus eius et manibus mittite eum in tenebras exteriores ibi erit fletus et stridor dentium
Mt 22.14
multi autem sunt vocati pauci vero electi
Mt 22.15
tunc abeuntes Pharisaei consilium inierunt ut caperent eum in sermone
Mt 22.16
et mittunt ei discipulos suos cum Herodianis dicentes magister scimus quia verax es et viam Dei in veritate doces et non est tibi cura de aliquo non enim respicis personam hominum
Mt 22.17
dic ergo nobis quid tibi videatur licet censum dare Caesari an non
Mt 22.18
cognita autem Iesus nequitia eorum ait quid me temptatis hypocritae
Mt 22.19
ostendite mihi nomisma census at illi obtulerunt ei denarium
Mt 22.20
et ait illis Iesus cuius est imago haec et suprascriptio
Mt 22.21
dicunt ei Caesaris tunc ait illis reddite ergo quae sunt Caesaris Caesari et quae sunt Dei Deo
Mt 22.22
et audientes mirati sunt et relicto eo abierunt
Mt 22.23
in illo die accesserunt ad eum Sadducaei qui dicunt non esse resurrectionem et interrogaverunt eum
Mt 22.24
dicentes magister Moses dixit si quis mortuus fuerit non habens filium ut ducat frater eius uxorem illius et suscitet semen fratri suo
Mt 22.25
erant autem apud nos septem fratres et primus uxore ducta defunctus est et non habens semen reliquit uxorem suam fratri suo
Mt 22.26
similiter secundus et tertius usque ad septimum
Mt 22.27
novissime autem omnium et mulier defuncta est
Mt 22.28
in resurrectione ergo cuius erit de septem uxor omnes enim habuerunt eam
Mt 22.29
respondens autem Iesus ait illis erratis nescientes scripturas neque virtutem Dei
Mt 22.30
in resurrectione enim neque nubent neque nubentur sed sunt sicut angeli Dei in caelo
Mt 22.31
de resurrectione autem mortuorum non legistis quod dictum est a Deo dicente vobis
Mt 22.32
ego sum Deus Abraham et Deus Isaac et Deus Iacob non est Deus mortuorum sed viventium
Mt 22.33
et audientes turbae mirabantur in doctrina eius
Mt 22.34
Pharisaei autem audientes quod silentium inposuisset Sadducaeis convenerunt in unum
Mt 22.35
et interrogavit eum unus ex eis legis doctor temptans eum
Mt 22.36
magister quod est mandatum magnum in lege
Mt 22.37
ait illi Iesus diliges Dominum Deum tuum ex toto corde tuo et in tota anima tua et in tota mente tua
Mt 22.38
hoc est maximum et primum mandatum
Mt 22.39
secundum autem simile est huic diliges proximum tuum sicut te ipsum
Mt 22.40
in his duobus mandatis universa lex pendet et prophetae
Mt 22.41
congregatis autem Pharisaeis interrogavit eos Iesus
Mt 22.42
dicens quid vobis videtur de Christo cuius filius est dicunt ei David
Mt 22.43
ait illis quomodo ergo David in spiritu vocat eum Dominum dicens
Mt 22.44
dixit Dominus Domino meo sede a dextris meis donec ponam inimicos tuos scabillum pedum tuorum
Mt 22.45
si ergo David vocat eum Dominum quomodo filius eius est
Mt 22.46
et nemo poterat respondere ei verbum neque ausus fuit quisquam ex illa die eum amplius interrogare

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages