Lc 2

Teljes szövegű keresés

Lc 2
Lc 2.1
factum est autem in diebus illis exiit edictum a Caesare Augusto ut describeretur universus orbis
Lc 2.2
haec descriptio prima facta est praeside Syriae Cyrino
Lc 2.3
et ibant omnes ut profiterentur singuli in suam civitatem
Lc 2.4
ascendit autem et Ioseph a Galilaea de civitate Nazareth in Iudaeam civitatem David quae vocatur Bethleem eo quod esset de domo et familia David
Lc 2.5
ut profiteretur cum Maria desponsata sibi uxore praegnate
Lc 2.6
factum est autem cum essent ibi impleti sunt dies ut pareret
Lc 2.7
et peperit filium suum primogenitum et pannis eum involvit et reclinavit eum in praesepio quia non erat eis locus in diversorio
Lc 2.8
et pastores erant in regione eadem vigilantes et custodientes vigilias noctis supra gregem suum
Lc 2.9
et ecce angelus Domini stetit iuxta illos et claritas Dei circumfulsit illos et timuerunt timore magno
Lc 2.10
et dixit illis angelus nolite timere ecce enim evangelizo vobis gaudium magnum quod erit omni populo
Lc 2.11
quia natus est vobis hodie salvator qui est Christus Dominus in civitate David
Lc 2.12
et hoc vobis signum invenietis infantem pannis involutum et positum in praesepio
Lc 2.13
et subito facta est cum angelo multitudo militiae caelestis laudantium Deum et dicentium
Lc 2.14
gloria in altissimis Deo et in terra pax in hominibus bonae voluntatis
Lc 2.15
et factum est ut discesserunt ab eis angeli in caelum pastores loquebantur ad invicem transeamus usque Bethleem et videamus hoc verbum quod factum est quod fecit Dominus et ostendit nobis
Lc 2.16
et venerunt festinantes et invenerunt Mariam et Ioseph et infantem positum in praesepio
Lc 2.17
videntes autem cognoverunt de verbo quod dictum erat illis de puero hoc
Lc 2.18
et omnes qui audierunt mirati sunt et de his quae dicta erant a pastoribus ad ipsos
Lc 2.19
Maria autem conservabat omnia verba haec conferens in corde suo
Lc 2.20
et reversi sunt pastores glorificantes et laudantes Deum in omnibus quae audierant et viderant sicut dictum est ad illos
Lc 2.21
et postquam consummati sunt dies octo ut circumcideretur vocatum est nomen eius Iesus quod vocatum est ab angelo priusquam in utero conciperetur
Lc 2.22
et postquam impleti sunt dies purgationis eius secundum legem Mosi tulerunt illum in Hierusalem ut sisterent eum Domino
Lc 2.23
sicut scriptum est in lege Domini quia omne masculinum adaperiens vulvam sanctum Domino vocabitur
Lc 2.24
et ut darent hostiam secundum quod dictum est in lege Domini par turturum aut duos pullos columbarum
Lc 2.25
et ecce homo erat in Hierusalem cui nomen Symeon et homo iste iustus et timoratus expectans consolationem Israhel et Spiritus Sanctus erat in eo
Lc 2.26
et responsum acceperat ab Spiritu Sancto non visurum se mortem nisi prius videret Christum Domini
Lc 2.27
et venit in Spiritu in templum et cum inducerent puerum Iesum parentes eius ut facerent secundum consuetudinem legis pro eo
Lc 2.28
et ipse accepit eum in ulnas suas et benedixit Deum et dixit
Lc 2.29
nunc dimittis servum tuum Domine secundum verbum tuum in pace
Lc 2.30
quia viderunt oculi mei salutare tuum
Lc 2.31
quod parasti ante faciem omnium populorum
Lc 2.32
lumen ad revelationem gentium et gloriam plebis tuae Israhel
Lc 2.33
et erat pater eius et mater mirantes super his quae dicebantur de illo
Lc 2.34
et benedixit illis Symeon et dixit ad Mariam matrem eius ecce positus est hic in ruinam et resurrectionem multorum in Israhel et in signum cui contradicetur
Lc 2.35
et tuam ipsius animam pertransiet gladius ut revelentur ex multis cordibus cogitationes
Lc 2.36
et erat Anna prophetissa filia Phanuhel de tribu Aser haec processerat in diebus multis et vixerat cum viro suo annis septem a virginitate sua
Lc 2.37
et haec vidua usque ad annos octoginta quattuor quae non discedebat de templo ieiuniis et obsecrationibus serviens nocte ac die
Lc 2.38
et haec ipsa hora superveniens confitebatur Domino et loquebatur de illo omnibus qui expectabant redemptionem Hierusalem
Lc 2.39
et ut perfecerunt omnia secundum legem Domini reversi sunt in Galilaeam in civitatem suam Nazareth
Lc 2.40
puer autem crescebat et confortabatur plenus sapientia et gratia Dei erat in illo
Lc 2.41
et ibant parentes eius per omnes annos in Hierusalem in die sollemni paschae
Lc 2.42
et cum factus esset annorum duodecim ascendentibus illis in Hierosolymam secundum consuetudinem diei festi
Lc 2.43
consummatisque diebus cum redirent remansit puer Iesus in Hierusalem et non cognoverunt parentes eius
Lc 2.44
existimantes autem illum esse in comitatu venerunt iter diei et requirebant eum inter cognatos et notos
Lc 2.45
et non invenientes regressi sunt in Hierusalem requirentes eum
Lc 2.46
et factum est post triduum invenerunt illum in templo sedentem in medio doctorum audientem illos et interrogantem
Lc 2.47
stupebant autem omnes qui eum audiebant super prudentia et responsis eius
Lc 2.48
et videntes admirati sunt et dixit mater eius ad illum fili quid fecisti nobis sic ecce pater tuus et ego dolentes quaerebamus te
Lc 2.49
et ait ad illos quid est quod me quaerebatis nesciebatis quia in his quae Patris mei sunt oportet me esse
Lc 2.50
et ipsi non intellexerunt verbum quod locutus est ad illos
Lc 2.51
et descendit cum eis et venit Nazareth et erat subditus illis et mater eius conservabat omnia verba haec in corde suo
Lc 2.52
et Iesus proficiebat sapientia aetate et gratia apud Deum et homines

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages