Ps 5
Ps 5
Ps 5.1
in finem pro ea quae hereditatem consequitur psalmus David
Ps 5.2
verba mea auribus percipe Domine intellege clamorem meum
Ps 5.3
intende voci orationis meae rex meus et Deus meus
Ps 5.4
quoniam ad te orabo Domine mane exaudies vocem meam
Ps 5.5
mane adstabo tibi et videbo quoniam non deus volens iniquitatem tu es
Ps 5.6
neque habitabit iuxta te malignus neque permanebunt iniusti ante oculos tuos
Ps 5.7
odisti omnes qui operantur iniquitatem perdes %omnes; qui loquuntur mendacium virum sanguinum et dolosum abominabitur Dominus
Ps 5.8
ego autem in multitudine misericordiae tuae introibo in domum tuam adorabo ad templum sanctum tuum in timore tuo
Ps 5.9
Domine deduc me in iustitia tua propter inimicos meos dirige in conspectu meo viam tuam
Ps 5.10
quoniam non est in ore eorum veritas cor eorum vanum est
Ps 5.11
sepulchrum patens est guttur eorum linguis suis dolose agebant iudica illos Deus decidant a cogitationibus suis secundum multitudinem impietatum eorum expelle eos quoniam inritaverunt te Domine
Ps 5.12
et laetentur omnes qui sperant in te in aeternum exultabunt et habitabis in eis et gloriabuntur in te omnes qui diligunt nomen tuum
Ps 5.13
quoniam tu benedices iusto Domine ut scuto bonae voluntatis coronasti nos
