Ps 32

Full text search

Ps 32
Ps 32.1
לְדָוִד מַשְׂכִּיל אַשְׁרֵי נְשׂוּי־פֶּשַׁע
כְּסוּי חֲטָאָה׃
Ps 32.2
אַשְׁרֵי אָדָם לֹא יַחְשֹׁב יְהוָה
לוֺ עָוֺן וְאֵין בְּרוּחוֺ רְמִיָּה׃
Ps 32.3
כִּי־הֶחֱרַשְׁתִּי בָּלוּ עֲצָמָי בְּשַׁאֲגָתִי
כָּל־הַיֺּום׃
Ps 32.4
כִּי יֺומָם וָלַיְלָה תִּכְבַּד עָלַי
יָדֶךָ נֶהְפַּך לְשַׁדִּי בְּחַרְבֹנֵי
קַיִץ סֶלָה׃
Ps 32.5
חַטָּאתִי אוֺדִיעֲךָ וַעֲוֺנִי לֹא־כִסִּיתִי
אָמַרְתִּי אוֺדֶה עֲלֵי פְשָׁעַי לַיהוָה
וְאַתָּה נָשָׂאתָ עֲוֺן חַטָּאתִי סֶלָה׃
Ps 32.6
עַל־זֺאת יִתְפַּלֵּל כָּל־חָסִיד
אֵלֶיךָ לְעֵת מְצֹא רַק לְשֵׁטֶף
מַיִם רַבִּים אֵלָיו לֹא יַגִּיעוּ׃
Ps 32.7
אַתָּה סֵתֶר לִי מִצַּר תִּצְּרֵנִי
רָנֵּי פַלֵּט תְּסוֺבְבֵנִי סֶלָה׃
Ps 32.8
אַשְׂכִּילְךָ וְאוֺרְךָ בְּדֶרֶכְ־זוּ
תֵלֵך אִיעֲצָה עָלֶיךָ עֵינִי׃
Ps 32.9
אַל־תִּהְיוּ כְּסוּס כְּפֶרֶד אֵין
הָבִין בְּמֶתֶג־וָרֶסֶן עֶדְיֺו
לִבְלוֺם בַּל קְרֹב אֵלֶיךָ׃
Ps 32.10
רַבִּים מַכְאוֺבִים לָרָשָׁע וְהַבּוֺטֵחַ
בַּיהוָה חֶסֶד יְסוֺבְבֶנּוּ׃
Ps 32.11
שִׂמְחוּ בַיהוָה וְגִילוּ צַדִּיקִים
וְהַרְנִינוּ כָּל־יִשְׁרֵי־לֵב׃

 

 

Ziarele Arcanum
Ziarele Arcanum

Vezi ce au spus ziarele din ultimii 250 de ani despre acest subiect!

Arată-mi

Arcanum logo

Arcanum se ocupă cu digitalizarea în masă, cu arhivarea și cu publicarea materialelor tipărite.

Despre noi Contact Apariții în presă

Languages