Ps 113
Ps 113
Ps 113.1
cum egrederetur Israhel de Aegypto domus Iacob de populo barbaro
Ps 113.2
factus est Iudas in sanctificatione eius Israhel potestas eius
Ps 113.3
mare vidit et fugit Iordanis conversus est retrorsum
Ps 113.4
montes subsilierunt quasi arietes colles quasi filii gregis
Ps 113.5
quid tibi est mare quia fugisti Iordanis quia conversus es retrorsum
Ps 113.6
montes sussultastis quasi arietes colles quasi filii gregis
Ps 113.7
a facie Domini contremesce terra a facie Dei Iacob
Ps 113.8
qui convertit petram in paludes aquarum silicem in fontes aquarum
Ps 113.9
non nobis Domine non nobis sed nomini tuo da gloriam
Ps 113.10
propter misericordiam tuam et veritatem tuam ne dicant gentes ubi est Deus eorum
Ps 113.11
Deus autem noster in caelo universa quae voluit fecit
Ps 113.12
idola gentium argentum et aurum opus manuum hominum
Ps 113.13
os habent et non loquentur oculos habent et non videbunt
Ps 113.14
aures habent et non audient nasum habent et non odorabuntur
Ps 113.15
manus habent et non palpabunt pedes habent et non ambulabunt nec sonabunt in gutture suo
Ps 113.16
similes illis fiant qui faciunt ea omnis qui confidit in eis
Ps 113.17
Israhel confidet in Domino auxiliator et protector eorum est
Ps 113.18
domus Aaron confidet in Domino auxiliator et protector eorum est
Ps 113.19
timentes Dominum confident in Domino auxiliator et protector eorum est
Ps 113.20
Dominus recordatus nostri benedicet benedicet domui Israhel benedicet domui Aaron
Ps 113.21
benedicet timentibus Dominum parvis et magnis
Ps 113.22
addat Dominus super vos super vos et super filios vestros
Ps 113.23
benedicti vos Domino qui fecit caelos et terram
Ps 113.24
caelum caelorum Domino terram autem dedit filiis hominum
Ps 113.25
non mortui laudabunt Dominum nec omnes qui descendunt in silentium
Ps 113.26
sed nos benedicimus Domino amodo et usque in aeternum alleluia
