Ps 26
Ps 26
Ps 26.1
David Dominus lux mea et salutare meum quem timebo Dominus fortitudo vitae meae quem formidabo
Ps 26.2
cum adpropinquarent mihi maligni ut comederent carnem meam hostes mei et inimici mei ipsi inpigerunt et ceciderunt
Ps 26.3
si steterint adversus me castra non timebit cor meum si surrexerit contra me bellum in hoc ego confidam
Ps 26.4
unum petivi a Domino hoc requiram ut habitem in domo Domini omnibus diebus vitae meae ut videam pulchritudinem Domini et adtendam templum eius
Ps 26.5
abscondet enim me in umbra sua in die pessima abscondet me in secreto tabernaculi sui
Ps 26.6
in petra exaltabit me nunc quoque exaltabit caput meum super inimicos meos qui sunt in circuitu meo et immolabo in tabernaculo eius hostias iubili cantabo et psallam Domino
Ps 26.7
audi Domine vocem meam invocantis miserere mei et exaudi me
Ps 26.8
tibi dixit cor meum quaesivit vultus meus faciem tuam Domine et requiram
Ps 26.9
ne abscondas faciem tuam a me ne declines in furore tuo a servo tuo auxilium meum fuisti ne derelinquas me et ne dimittas me Deus salvator meus
Ps 26.10
pater enim meus et mater mea dereliquerunt me Dominus autem collegit me
Ps 26.11
ostende mihi Domine viam tuam et deduc me in semita recta propter insidiatores meos
Ps 26.12
ne tradas me Domine animae tribulantium me quoniam surrexerunt contra me testes falsi et apertum mendacium
Ps 26.13
ego autem credo quod videam bona Domini in terra viventium
Ps 26.14
expecta Dominum confortare et roboretur cor tuum et sustine Dominum
Arcanum Newspapers
See what the newspapers have said about this subject in the last 250 years!
Show me
