Ps 33
Ps 33
Ps 33.1
David quando commutavit os suum coram Abimelech et eiecit eum et abiit
Ps 33.2
benedicam Domino in omni tempore semper laus eius in ore meo
Ps 33.3
in Domino laetabitur anima mea audiant mites et laetentur
Ps 33.4
magnificate Dominum mecum et exaltemus nomen eius pariter
Ps 33.5
quaesivi Dominum et exaudivit me et de omnibus angustiis meis liberavit me
Ps 33.6
respicite ad eum et confluite et vultus vestri non confundentur
Ps 33.7
hic pauper clamavit et Dominus exaudivit de omnibus tribulationibus salvabit eum
Ps 33.8
circumdat angelus Domini in gyro timentes eum et eruet eos
Ps 33.9
gustate et videte quoniam bonus Dominus beatus vir qui sperat in eo
Ps 33.10
timete Dominum sancti eius quoniam non est inopia timentibus eum
Ps 33.11
leones indiguerunt et esurierunt quaerentibus autem Dominum non deerit omne bonum
Ps 33.12
venite filii audite me timorem Domini docebo vos
Ps 33.13
quis est vir qui velit vitam diligens dies videre bonos
Ps 33.14
custodi linguam tuam a malo et labia tua ne loquantur dolum
Ps 33.15
recede a malo et fac bonum quaere pacem et persequere eam
Ps 33.16
oculi Domini ad iustos et aures eius ad clamorem eorum
Ps 33.17
vultus Domini super facientes malum ut perdat de terra memoriam eorum
Ps 33.18
clamaverunt et Dominus exaudivit et ex omnibus tribulationibus eorum liberavit eos
Ps 33.19
iuxta est Dominus contritis corde et confractos spiritu salvabit
Ps 33.20
multae tribulationes iusti et ex omnibus illis liberabit eum Dominus
Ps 33.21
custodit omnia ossa eius unum ex eis non confringetur
Ps 33.22
interficiet impium malitia et odientes iustum superabuntur
Ps 33.23
redimet Dominus animam servorum suorum et non peccabunt omnes sperantes in eo
Arcanum Newspapers
See what the newspapers have said about this subject in the last 250 years!
Show me
