Ps 54
Ps 54
Ps 54.1
victori in psalmis eruditi David
Ps 54.2
exaudi Deus orationem meam et ne dispicias deprecationem meam
Ps 54.3
adtende mihi et exaudi me humiliatus sum in meditatione mea et conturbatus
Ps 54.4
a voce inimici a facie persequentis impii quoniam proiecerunt super me iniquitatem et in furore adversabantur mihi
Ps 54.5
cor meum doluit in vitalibus meis et terrores mortis ceciderunt super me
Ps 54.6
timor et tremor venit super me et operuit me caligo
Ps 54.7
et dixi quis dabit mihi pinnas columbae ut volem et requiescam
Ps 54.8
ut procul abeam et commorer in deserto semper
Ps 54.9
festinabo ut salver ab spiritu tempestatis et turbinis
Ps 54.10
praecipita Domine divide linguas eorum quoniam vidi iniquitatem et contradictionem in civitate
Ps 54.11
die et nocte circumeuntes muros eius scelus et dolorem in medio eius
Ps 54.12
insidiae in vitalibus eius et non recedet de plateis eius damnum et fraudulentia
Ps 54.13
non enim inimicus exprobravit mihi ut sustineam neque is qui me oderat super me magnificatus est ut abscondar ab eo
Ps 54.14
sed tu homo unianimis meus dux meus et notus meus
Ps 54.15
qui simul habuimus dulce secretum in domo Dei ambulavimus in terrore
Ps 54.16
veniat mors super eos descendant in infernum viventes quia nequitiae in congregatione eorum et in medio eorum
Ps 54.17
ego ad Deum clamabo et Dominus salvabit me
Ps 54.18
vespere et mane et meridie eloquar et resonabo et exaudiet vocem meam
Ps 54.19
redimet in pace animam meam ab adpropinquantibus mihi multi enim fuerunt adversum me
Ps 54.20
exaudiet Deus et humiliabit eos qui iudex est ab initio semper non enim mutantur neque timent Deum
Ps 54.21
extendit manum suam ad pacifica sua contaminabit pactum suum
Ps 54.22
nitidius butyro os eius pugnat autem cor illius molliores sermones eius oleo cum sint lanceae
Ps 54.23
proice super Dominum caritatem tuam et ipse enutriet te non dabit in aeternum fluctuationem iusto
Ps 54.24
tu autem Deus deduces eos in puteum interitus viri sanguinum et dolosi non dimidiabunt dies suos ego autem fiduciam habeo tui
Arcanum Newspapers
See what the newspapers have said about this subject in the last 250 years!
Show me
