Ps 78 | Biblia (Vulgata editionis)

Ps 78

Ps 78.1

canticum Asaph Deus venerunt gentes in hereditatem tuam polluerunt templum sanctum tuum posuerunt Hierusalem in acervis lapidum

Ps 78.2

dederunt cadavera servorum tuorum escam volatilibus caeli carnes sanctorum tuorum bestiis terrae

Ps 78.3

effuderunt sanguinem eorum quasi aquam in circuitu Hierusalem et non erat qui sepeliret

Ps 78.4

facti sumus obprobrium vicinis nostris subsannatio et derisio his qui in circuitu nostro sunt

Ps 78.5

usquequo Domine irasceris in finem ardebit quasi ignis zelus tuus

Ps 78.6

effunde furorem tuum super gentes quae non cognoverunt te et super regna quae nomen tuum non invocaverunt

Ps 78.7

quia comederunt Iacob et decorem eius desolaverunt

Ps 78.8

ne recorderis iniquitatum nostrarum veterum cito occupent nos misericordiae tuae quia adtenuati sumus nimis

Ps 78.9

auxiliare nobis Deus Iesus noster propter gloriam nominis tui et libera nos et propitiare peccatis nostris propter nomen tuum

Ps 78.10

quare dicunt gentes ubi est Deus eorum nota fiat in gentibus ante oculos nostros ultio sanguinis servorum tuorum qui effusus est

Ps 78.11

ingrediatur coram te gemitus vinctorum in magnitudine brachii tui relinque filios interitus

Ps 78.12

et redde vicinis nostris septuplum in sinu eorum obprobrium suum quo exprobraverunt tibi Domine

Ps 78.13

nos enim populus tuus et grex pascuae tuae confitebimur tibi in sempiternum in generatione et generatione narrabimus laudes tuas

See what the newspapers have said about this subject in the last 250 years!