מַשְׂכִּיל לְאָסָף הַאֲזִינָה עַמִּי
תּוֺרָתִי הַטּוּ אָזְנְכֶם לְאִמְרֵי־פִי׃
אֶפְתְּחָה בְמָשָׁל פִּי אַבִּיעָה חִידוֺת
מִנִּי־קֶדֶם׃
אֲשֶׁר שָׁמַעְנוּ וַנֵּדָעֵם וַאֲבוֺתֵינוּ
סִפְּרוּ־לָנוּ׃
לֹא נְכַחֵד מִבְּנֵיהֶם לְדוֺר אַחֲרוֺן
מְסַפְּרִים תְּהִלּוֺת יְהוָה וֶעֱזוּזֺו
וְנִפְלְאוֺתָיו אֲשֶׁר עָשָׂה׃
וַיָּקֶם עֵדוּת בְּיַעֲקֹב וְתוֺרָה
שָׂם בְּיִשְׂרָאֵל אֲשֶׁר צִוָּה אֶת־אֲבוֺתֵינוּ
לְהוֺדִיעָם לִבְנֵיהֶם׃
לְמַעַן יֵדְעוּ דּוֺר אַחֲרוֺן בָּנִים
יִוָּלֵדוּ יָקֻמוּ וִיסַפְּרוּ לִבְנֵיהֶם׃
וְיָשִׂימוּ בֵאלֹהִים כִּסְלָם וְלֹא
יִשְׁכְּחוּ מַעַלְלֵי־אֵל וּמִצְוֺתָיו
יִנְצֹרוּ׃
וְלֹא יִהְיוּ כַּאֲבוֺתָם דּוֺר סוֺרֵר
וּמֹרֶה דּוֺר לֹא־הֵכִין לִבּוֺ
וְלֹא־נֶאֶמְנָה אֶת־אֵל רוּחוֺ׃
בְּנֵי־אֶפְרַיִם נֺושְׁקֵי רוֺמֵי־קָשֶׁת
הָפְכוּ בְּיֺום קְרָב׃
לֹא שָׁמְרוּ בְּרִית אֱלֹהִים וּבְתוֺרָתוֺ
מֵאֲנוּ לָלֶכֶת׃
וַיִּשְׁכְּחוּ עֲלִילוֺתָיו וְנִפְלְאוֺתָיו
אֲשֶׁר הֶרְאָם׃
נֶגֶד אֲבוֺתָם עָשָׂה פֶלֶא בְּאֶרֶץ
מִצְרַיִם שְׂדֵה־צֹעַן׃
בָּקַע יָם וַיַּעֲבִירֵם וַיַּצֶּב־מַיִם
כְּמוֺ־נֵד׃
וַיַּנְחֵם בֶּעָנָן יֺומָם וְכָל־הַלַּיְלָה
בְּאוֺר אֵשׁ׃
יְבַקַּע צֻרִים בַּמִּדְבָּר וַיַּשְׁקְ
כִּתְהֹמוֺת רַבָּה׃
וַיֺּוצִא נֺוזְלִים מִסָּלַע וַיֺּורֶד
כַּנְּהָרוֺת מָיִם׃
וַיֺּוסִיפוּ עוֺד לַחֲטֹא־לוֺ לַמְרוֺת
עֶלְיֺון בַּצִּיָּה׃
וַיְנַסּוּ־אֵל בִּלְבָבָם לִשְׁאָל־אֹכֶל
לְנַפְשָׁם׃
וַיְדַבְּרוּ בֵּאלֹהִים אָמְרוּ הֲיוּכַל
אֵל לַעֲרֹך שֻׁלְחָן בַּמִּדְבָּר׃
הֵן הִכָּה־צוּר וַיָּזוּבוּ מַיִם
וּנְחָלִים יִשְׁטֹפוּ הֲגַמ־לֶחֶם
יוּכַל תֵּת אִמ־יָכִין שְׁאֵר לְעַמּוֺ׃
לָכֵן שָׁמַע יְהוָה וַיִּתְעַבָּר וְאֵשׁ
נִשְּׂקָה בְיַעֲקֹב וְגַמ־אַף עָלָה
בְיִשְׂרָאֵל׃
כִּי לֹא הֶאֱמִינוּ בֵּאלֹהִים וְלֹא
בָטְחוּ בִּישׁוּעָתוֺ׃
וַיְצַו שְׁחָקִים מִמָּעַל וְדַלְתֵי
שָׁמַיִם פָּתָח׃
וַיַּמְטֵר עֲלֵיהֶם מָן לֶאֱכֹל וּדְגַנ־שָׁמַיִם
נָתַן לָמוֺ׃
לֶחֶם אַבִּירִים אָכַל אִישׁ צֵידָה
שָׁלַח לָהֶם לָשֹׂבַע׃
יַסַּע קָדִים בַּשָּׁמָיִם וַיְנַהֵג
בְּעֻזֺּו תֵימָן׃
וַיַּמְטֵר עֲלֵיהֶם כֶּעָפָר שְׁאֵר
וּכְחוֺל יַמִּים עוֺף כָּנָף׃
וַיַּפֵּל בְּקֶרֶב מַחֲנֵהוּ סָבִיב
לְמִשְׁכְּנֺתָיו׃
וַיֺּאכְלוּ וַיִּשְׂבְּעוּ מְאֹד וְתַאֲוָתָם
יָבִא לָהֶם׃
לֹא־זָרוּ מִתַּאֲוָתָם עוֺד אָכְלָם
בְּפִיהֶם׃
וְאַף אֱלֹהִים עָלָה בָהֶם וַיַּהֲרֹג
בְּמִשְׁמַנֵּיהֶם וּבַחוּרֵי יִשְׂרָאֵל
הִכְרִיעַ׃
בְּכָל־זֺאת חָטְאוּ־עוֺד וְלֹא־הֶאֱמִינוּ
בְּנִפְלְאוֺתָיו׃
וַיְכַל־בַּהֶבֶל יְמֵיהֶם וּשְׁנֺותָם
בַּבֶּהָלָה׃
אִמ־הֲרָגָם וּדְרָשׁוּהוּ וְשָׁבוּ
וְשִׁחֲרוּ־אֵל׃
וַיִּזְכְּרוּ כִּי־אֱלֹהִים צוּרָם
וְאֵל עֶלְיֺון גֺּאֲלָם׃
וַיְפַתּוּהוּ בְּפִיהֶם וּבִלְשׁוֺנָם
יְכַזְּבוּ־לוֺ׃
וְלִבָּם לֹא־נָכוֺן עִמּוֺ וְלֹא
נֶאֶמְנוּ בִּבְרִיתוֺ׃
וְהוּא רַחוּם יְכַפֵּר עָוֺן וְלֹא־יַשְׁחִית
וְהִרְבָּה לְהָשִׁיב אַפּוֺ וְלֹא־יָעִיר
כָּל־חֲמָתוֺ׃
וַיִּזְכֹּר כִּי־בָשָׂר הֵמָּה רוּחַ
הוֺלֵך וְלֹא יָשׁוּב׃
כַּמָּה יַמְרוּהוּ בַמִּדְבָּר יַעֲצִיבוּהוּ
בִּישִׁימוֺן׃
וַיָּשׁוּבוּ וַיְנַסּוּ אֵל וּקְדוֺשׁ
יִשְׂרָאֵל הִתְווּ׃
לֹא־זָכְרוּ אֶת־יָדוֺ יֺום אֲשֶׁר־פָּדָם
מִנִּי־צָר׃
אֲשֶׁר־שָׂם בְּמִצְרַיִם אֹתוֺתָיו
וּמוֺפְתָיו בִּשְׂדֵה־צֹעַן׃
וַיַּהֲפֹך לְדָם יְאֹרֵיהֶם וְנֺזְלֵיהֶם
בַּל־יִשְׁתָּיוּן׃
יְשַׁלַּח בָּהֶם עָרֹב וַיֺּאכְלֵם וּצְפַרְדֵּעַ
וַתַּשְׁחִיתֵם׃
וַיִּתֵּן לֶחָסִיל יְבוּלָם וִיגִיעָם
לָאַרְבֶּה׃
יַהֲרֹג בַּבָּרָד גַּפְנָם וְשִׁקְמוֺתָם
בַּחֲנָמַל׃
וַיַּסְגֵּר לַבָּרָד בְּעִירָם וּמִקְנֵיהֶם
לָרְשָׁפִים׃
יְשַׁלַּח־בָּם חֲרוֺן אַפּוֺ עֶבְרָה
וָזַעַם וְצָרָה מִשְׁלַחַת מַלְאֲכֵי
רָעִים׃
יְפַלֵּס נָתִיב לְאַפּוֺ לֹא־חָשַׂך
מִמָּוֶת נַפְשָׁם וְחַיָּתָם לַדֶּבֶר
הִסְגִּיר׃
וַיַּך כָּל־בְּכוֺר בְּמִצְרָיִם רֵאשִׁית
אוֺנִים בְּאָהֳלֵי־חָם׃
וַיַּסַּע כַּצֹּאן עַמּוֺ וַיְנַהֲגֵם
כַּעֵדֶר בַּמִּדְבָּר׃
וַיַּנְחֵם לָבֶטַח וְלֹא פָחָדוּ וְאֶת־אוֺיְבֵיהֶם
כִּסָּה הַיָּם׃
וַיְבִיאֵם אֶל־גְּבוּל קָדְשׁוֺ
הַר־זֶה קָנְתָה יְמִינֺו׃
וַיְגָרֶשׁ מִפְּנֵיהֶם גֺּויִם וַיַּפִּילֵם
בְּחֶבֶל נַחֲלָה וַיַּשְׁכֵּן בְּאָהֳלֵיהֶם
שִׁבְטֵי יִשְׂרָאֵל׃
וַיְנַסּוּ וַיַּמְרוּ אֶת־אֱלֹהִים
עֶלְיֺון וְעֵדוֺתָיו לֹא שָׁמָרוּ׃
וַיִּסֹּגוּ וַיִּבְגְּדוּ כַּאֲבוֺתָם נֶהְפְּכוּ
כְּקֶשֶׁת רְמִיָּה׃
וַיַּכְעִיסוּהוּ בְּבָמוֺתָם וּבִפְסִילֵיהֶם
יַקְנִיאוּהוּ׃
שָׁמַע אֱלֹהִים וַיִּתְעַבָּר וַיִּמְאַס
מְאֹד בְּיִשְׂרָאֵל׃
וַיִּטֹּשׁ מִשְׁכַּן שִׁלוֺ אֹהֶל שִׁכֵּן
בָּאָדָם׃
וַיִּתֵּן לַשְּׁבִי עֻזֺּו וְתִפְאַרְתּוֺ
בְיַד־צָר׃
וַיַּסְגֵּר לַחֶרֶב עַמּוֺ וּבְנַחֲלָתוֺ
הִתְעַבָּר׃
בַּחוּרָיו אָכְלָה־אֵשׁ וּבְתוּלֹתָיו
לֹא הוּלָּלוּ׃
כֹּהֲנָיו בַּחֶרֶב נָפָלוּ וְאַלְמְנֺתָיו
לֹא תִבְכֶּינָה׃
וַיִּקַץ כְּיָשֵׁן אֲדֹנָי כְּגִבּוֺר
מִתְרוֺנֵן מִיָּיִן׃
וַיַּכְ־צָרָיו אָחוֺר חֶרְפַּת עוֺלָם
נָתַן לָמוֺ׃
וַיִּמְאַס בְּאֹהֶל יֺוסֵף וּבְשֵׁבֶט
אֶפְרַיִם לֹא בָחָר׃
וַיִּבְחַר אֶת־שֵׁבֶט יְהוּדָה אֶת־הַר
צִיֺּון אֲשֶׁר אָהֵב׃
וַיִּבֶן כְּמוֺ־רָמִים מִקְדָּשׁוֺ כְּאֶרֶץ
יְסָדָהּ לְעוֺלָם׃
וַיִּבְחַר בְּדָוִד עַבְדּוֺ וַיִּקָּחֵהוּ
מִמִּכְלְאֹת צֹאן׃
מֵאַחַר עָלוֺת הֱבִיאוֺ לִרְעוֺת
בְּיַעֲקֹב עַמּוֺ וּבְיִשְׂרָאֵל נַחֲלָתוֺ׃
וַיִּרְעֵם כְּתֹם לְבָבוֺ וּבִתְבוּנֺות
כַּפָּיו יַנְחֵם׃