Eccl 24

Full text search

Eccl 24
Eccl 24.1
sapientiae laus sapientia laudabit animam suam et in Deo honorabitur et in medio populi sui gloriabitur
Eccl 24.2
et in ecclesiis Altissimi aperiet os suum et in conspectu virtutis illius gloriabitur
Eccl 24.3
in medio populo exaltabitur et in plenitudine sancta admirabitur
Eccl 24.4
in multitudine electorum habebit laudem et inter benedictos benedicetur dicens
Eccl 24.5
ego ex ore Altissimi prodivi primogenita ante omnem creaturam
Eccl 24.6
ego in caelis feci ut oriretur lumen indeficiens et sicut nebula texi omnem terram
Eccl 24.7
ego in altis habitavi et thronus meus in columna nubis
Eccl 24.8
gyrum caeli circuivi sola et in profundum abyssi penetravi et in fluctibus maris ambulavi
Eccl 24.9
et in omni terra steti et in omni populo
Eccl 24.10
et in omni gente primatum habui
Eccl 24.11
et omnium excellentium et humilium corda virtute calcavi et in his omnibus requiem quaesivi et in hereditate eius morabor
Eccl 24.12
tunc praecepit et dixit mihi creator omnium et qui creavit me requievit in tabernaculo meo
Eccl 24.13
et dixit mihi in Iacob inhabita et in Israhel hereditare et in electis meis ede radices
Eccl 24.14
ab initio ante saeculum creata sum et usque ad futurum saeculum non desinam et in habitatione sancta coram ipso ministravi
Eccl 24.15
et sic in Sion firmata sum et in civitate sanctificata similiter requievi et in Hierusalem potestas mea
Eccl 24.16
et radicavi in populo honorificato et in parte Dei mei hereditas illius et in plenitudine sanctorum detentio mea
Eccl 24.17
quasi cedrus exaltata sum in Libano et quasi cypressus in monte Sion
Eccl 24.18
et quasi palma exaltata sum in Cades et quasi plantatio rosae in Hiericho
Eccl 24.19
quasi oliva speciosa in campis et quasi platanus exaltata sum iuxta aquam in plateis
Eccl 24.20
sicut cinnamomum et aspaltum aromatizans odorem dedi quasi murra electa dedi suavitatem odoris
Eccl 24.21
et quasi storax et galbanus et ungula et gutta et quasi libanus non incisus vaporavi habitationem meam et quasi balsamum non mixtum odor meus
Eccl 24.22
ego quasi terebinthus extendi ramos meos et rami mei honoris et gratiae
Eccl 24.23
ego quasi vitis fructificavi suavitatem odoris et flores mei fructus honoris et honestatis
Eccl 24.24
ego mater pulchrae dilectionis et timoris et agnitionis et sanctae spei
Eccl 24.25
in me gratia omnis vitae et veritatis in me omnis spes vitae et virtutis
Eccl 24.26
transite ad me omnes qui concupiscitis me et a generationibus meis implemini
Eccl 24.27
spiritus enim meus super melle dulcis et hereditas mea super mel et favum
Eccl 24.28
memoria mea in generatione saeculorum
Eccl 24.29
qui edunt me adhuc esurient et qui bibunt me adhuc sitient
Eccl 24.30
qui audit me non confundetur et qui operantur in me non peccabunt
Eccl 24.31
qui elucidant me vitam aeternam habebunt
Eccl 24.32
haec omnia liber vitae testamentum Altissimi et agnitio veritatis
Eccl 24.33
legem mandavit Moses in praeceptis iustitiarum et hereditatem domui Iacob et Israhel promissionis
Eccl 24.34
posuit David puero suo excitare regem ex ipso fortissimum in throno honoris sedentem in sempiternum
Eccl 24.35
qui implet quasi Phison sapientiam et sicut Tigris in diebus novorum
Eccl 24.36
qui adimplet quasi Eufrates sensum qui multiplicat quasi Iordanis in tempore messis
Eccl 24.37
qui mittit disciplinam sicut lucem et adsistens quasi Geon in die vindemiae
Eccl 24.38
qui perficit primus scire ipsam et infirmior non investigavit eam
Eccl 24.39
a mari enim abundavit cogitatio eius et consilium illius abysso magna
Eccl 24.40
ego sapientia effudi flumina
Eccl 24.41
ego quasi tramis aquae inmensae de fluvio ego quasi fluvius Doryx et sicut aquaeductus exivi a paradiso
Eccl 24.42
dixi rigabo meum hortum plantationum et inebriabo pratus mei fructum
Eccl 24.43
et ecce facta est mihi tramis abundans et fluvius meus propinquavit ad mare
Eccl 24.44
quoniam doctrinam quasi antelucanum inlumino omnibus et enarrabo illam usque in longinquo
Eccl 24.45
penetrabo inferiores partes terrae et inspiciam omnes dormientes et inluminabo sperantes in Deo
Eccl 24.46
adhuc doctrinam quasi prophetiam effundam et relinquam illam quaerentibus sapientiam et non desinam in progenies illorum usque in aevum sanctum
Eccl 24.47
videte quoniam non soli mihi laboravi sed omnibus exquirentibus veritatem

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages