1Mach 1
1Mach 1
1Mach 1.1
et factum est postquam percussit Alexander Philippi Macedo qui primus regnavit in Graecia egressus de terra Cetthim Darium regem Persarum et Medorum
1Mach 1.2
constituit proelia multa et omnium obtinuit munitiones et interfecit reges terrae
1Mach 1.3
et pertransiit usque ad fines terrae et accepit spolia multitudinis gentium et siluit terra in conspectu eius
1Mach 1.4
et congregavit virtutem exercituum fortem nimis et exaltatum est et elevatum cor eius
1Mach 1.5
et obtinuit regiones gentium et tyrannos et facti sunt illi in tributum
1Mach 1.6
et post haec decidit in lectum et cognovit quia moritur
1Mach 1.7
et vocavit pueros suos nobiles qui secum erant nutriti a iuventute et divisit illis regnum suum cum adhuc viveret
1Mach 1.8
et regnavit Alexander annis duodecim et mortuus est
1Mach 1.9
et obtinuerunt pueri eius regnum unusquisque in loco suo
1Mach 1.10
et inposuerunt sibi omnes diademata post mortem eius et filii eorum post eos annis multis et multiplicata sunt mala in terra
1Mach 1.11
et exiit ex eis radix peccatrix Antiochus Inlustris filius Antiochi regis qui fuerat Romae obses et regnavit in anno centesimo tricesimo et septimo regni Graecorum
1Mach 1.12
in diebus illis exierunt ex Israhel filii iniqui et suaserunt multis dicentes eamus et disponamus testamentum cum gentibus quae circa nos sunt quia ex quo recessimus ab eis invenerunt nos multa mala
1Mach 1.13
et bonus visus est sermo in oculis eorum
1Mach 1.14
et destinaverunt aliqui de populo et abierunt ad regem et dedit illis potestatem ut facerent iustitiam gentium
1Mach 1.15
et aedificaverunt gymnasium in Hierosolymis secundum leges nationum
1Mach 1.16
et fecerunt sibi praeputia et recesserunt a testamento sancto et iuncti sunt nationibus et venundati sunt ut facerent malum
1Mach 1.17
et paratum est regnum in conspectu Antiochi et coepit regnare in terra Aegypti ut regnaret super duo regna
1Mach 1.18
et intravit in Aegyptum in multitudine gravi in curribus et elefantis et equitibus et copiosa navium multitudine
1Mach 1.19
et constituit bellum adversus Ptolomeum regem Aegypti et veritus est Ptolomeus a facie eius et fugit et ceciderunt vulnerati multi
1Mach 1.20
et conprehendit civitates munitas in terra Aegypti et accepit spolia terrae Aegypti
1Mach 1.21
et convertit Antiochus postquam percussit Aegyptum in centesimo et quadragesimo et tertio anno et ascendit ad Israhel
1Mach 1.22
et ascendit Hierosolymis in multitudine gravi
1Mach 1.23
et intravit in sanctificationem cum superbia et accepit altare aureum et candelabrum luminis et universa vasa eius et mensam propositionis et libatoria et fialas et mortariola aurea et velum et coronas et ornamentum aureum quod in facie templi erat et comminuit omnia
1Mach 1.24
et accepit argentum et aurum et vasa concupiscibilia et accepit thesauros occultos quos invenit et sublatis omnibus abiit in terram suam
1Mach 1.25
et fecit caedem hominum et locutus est superbia magna
1Mach 1.26
et factus est planctus magnus in Israhel et in omni loco eorum
1Mach 1.27
et ingemuerunt principes et seniores virgines et iuvenes infirmati sunt et speciositas mulierum inmutata est
1Mach 1.28
omnis maritus sumpsit lamentum quae sedebant in toro maritali lugebant
1Mach 1.29
et commota est terra super habitantes in ea et universa domus Iacob induit confusionem
1Mach 1.30
et post duos annos dierum misit rex principem tributorum in civitates Iuda et venit Hierusalem cum turba magna
1Mach 1.31
et locutus est ad eos verba pacifica in dolo et crediderunt ei
1Mach 1.32
et inruit super civitatem repente et percussit eam plaga et perdidit populum multum ex Israhel
1Mach 1.33
et accepit spolia civitatis et succendit eam igni et destruxit domos eius et muros eius in circuitu
1Mach 1.34
et captivas duxerunt mulieres et natos et pecora possederunt
1Mach 1.35
et aedificaverunt civitatem David muro magno et firmo et turribus firmis et facta est illis in arcem
1Mach 1.36
et posuerunt illic gentem peccatorum viros iniquos et convaluerunt in ea et posuerunt arma et escas et congregaverunt spolia Hierusalem
1Mach 1.37
et reposuerunt illic et facti sunt in laqueum magnum
1Mach 1.38
et factum est hoc ad insidias sanctificationi et in diabolum malum in Israhel
1Mach 1.39
et effuderunt sanguinem innocentem per circuitum sanctificationis et contaminaverunt sanctificationem
1Mach 1.40
et fugerunt habitatores Hierusalem propter eos et facta est habitatio exterorum et facta est extera semini suo et nati eius reliquerunt eam
1Mach 1.41
sanctificatio eius desolata est sicut solitudo dies festi eius conversi sunt in luctum sabbata eius in obprobrium honores eius in nihilum
1Mach 1.42
secundum gloriam eius multiplicata est ignominia eius et sublimitas eius conversa est in luctum
1Mach 1.43
et scripsit rex Antiochus omni regno suo ut esset omnis populus unus et reliquerunt unusquisque legem suam
1Mach 1.44
et consenserunt omnes gentes secundum verbum regis Antiochi
1Mach 1.45
et multi ex Israhel consenserunt ei et sacrificaverunt idolis et coinquinaverunt sabbatum
1Mach 1.46
et misit rex Antiochus libros per manus nuntiorum in Hierusalem et in omnes civitates Iudae ut sequerentur legem gentium terrae
1Mach 1.47
et prohiberent holocausta et sacrificia et placationes fieri in templo Dei
1Mach 1.48
et prohiberent celebrari sabbatum et dies sollemnes
1Mach 1.49
et coinquinari sancta et sanctum populum Israhel
1Mach 1.50
et iussit aedificari aras et templa et idola et immolari carnes suillas et pecora communia
1Mach 1.51
et relinquere filios suos incircumcisos et coinquinari animas eorum in omnibus inmundis et abominationibus ita ut obliviscerentur legem et inmutarent omnes iustificationes Dei
1Mach 1.52
et quicumque non fecisset secundum verbum regis Antiochi moreretur
1Mach 1.53
secundum omnia verba haec scripsit omni regno suo et praeposuit principes populo qui haec fieri cogerent
1Mach 1.54
et iusserunt civitatibus Iudae sacrificare
1Mach 1.55
et congregati sunt multi de populo ad eos qui dereliquerant legem Domini et fecerunt mala super terram
1Mach 1.56
et effugaverunt populum Israhel in abditis et in absconditis fugitivorum locis
1Mach 1.57
die quintadecima mensis casleu quinto et quadragesimo anno aedificavit rex Antiochus abominandum idolum desolationis super altare Dei et per universas civitates Iudae in circuitu aedificaverunt aras
1Mach 1.58
et ante ianuas domorum et in plateis incendebant tura et sacrificabant
1Mach 1.59
et libros legis Dei conbuserunt igni scindentes eos
1Mach 1.60
et apud quemcumque inveniebantur libri testamenti Domini et quicumque observabant legem Domini secundum edictum regis trucidabant eum
1Mach 1.61
in virtute sua faciebant haec populo Israhel qui inveniebantur in omni mense in civitatibus
1Mach 1.62
et quinta et vicesima die mensis sacrificabant super aram quae erat contra altare
1Mach 1.63
et mulieres quae circumcidebant filios suos trucidabantur secundum iussum regis Antiochi
1Mach 1.64
et suspendebant pueros a cervicibus per universas domos eorum et eos qui circumciderunt eos trucidabant
1Mach 1.65
et multi de populo Israhel definierunt apud se ut non manducarent inmunda et elegerunt magis mori quam cibis coinquinari inmundis
1Mach 1.66
et noluerunt infringere legem Dei sanctam et trucidati sunt
1Mach 1.67
et facta est ira magna super populum valde
