Sap 2
Sap 2
Sap 2.1
dixerunt enim apud se cogitantes non recte exiguum et cum taedio est tempus vitae nostrae et non est refrigerium in fine hominis et non est qui agnitus sit reversus ab inferis
Sap 2.2
quia ex nihilo nati sumus et post hoc erimus tamquam non fuerimus quoniam fumus afflatus est in naribus nostris et sermo scintillae ad commovendum cor nostrum
Sap 2.3
quia extincta cinis erit corpus et spiritus diffundetur tamquam mollis aer et transiet vita nostra tamquam vestigium nubis et sicut nebula dissolvetur quae fugata est a radiis solis et a calore illius adgravata
Sap 2.4
et nomen nostrum oblivionem accipiet per tempus et nemo memoriam habebit operum nostrorum
Sap 2.5
umbrae enim transitus est tempus nostrum et non est reversio finis nostri quoniam consignata est et nemo revertetur
Sap 2.6
venite ergo et fruamur bonis quae sunt et utamur creaturam tamquam in iuventute celeriter
Sap 2.7
vino pretioso et unguentis nos impleamus et non praetereat nos flos temporis
Sap 2.8
coronemus nos rosis antequam marcescant nullum pratum sit quod non pertranseat luxuria nostra
Sap 2.9
ubique relinquamus signa laetitiae quoniam haec est pars nostra et haec est sors
Sap 2.10
opprimamus pauperem iustum et non parcamus viduae nec veterani revereamur canos multi temporis
Sap 2.11
sit autem fortitudo nostra lex iniustitiae quod infirmum est enim inutile invenitur
Sap 2.12
circumveniamus ergo iustum quoniam inutilis est nobis et contrarius est operibus nostris et inproperat nobis peccata legis et diffamat in nos peccata disciplinae nostrae
Sap 2.13
promittit scientiam Dei se habere et filium Dei se nominat
Sap 2.14
factus est nobis in traductionem cogitationum nostrarum
Sap 2.15
gravis est nobis etiam ad videndum quoniam dissimilis est aliis vita illius et inmutatae sunt viae eius
Sap 2.16
tamquam nugaces aestimati sumus ab illo et abstinet se a viis nostris tamquam ab inmunditiis et praefert novissima iustorum et gloriatur patrem Deum se habere
Sap 2.17
videamus ergo si sermones illius veri sunt et temptemus quae ventura sunt illi et sciemus quae erunt novissima illius
Sap 2.18
si enim est verus filius Dei suscipiet illum et liberabit eum de manu contrariorum
Sap 2.19
contumelia et tormento interrogemus eum ut sciamus reverentiam illius et probemus patientiam ipsius
Sap 2.20
morte turpissima condemnemus illum erit enim ei respectus ex sermonibus illius
Sap 2.21
haec cogitaverunt et erraverunt excaecavit enim illos malitia eorum
Sap 2.22
et nescierunt sacramenta Dei neque mercedem speraverunt iustitiae nec iudicaverunt honorem animarum sanctarum
Sap 2.23
quoniam Deus creavit hominem inexterminabilem et ad imaginem suae similitudinis fecit illum
Sap 2.24
invidia autem diaboli mors introivit in orbem terrarum
Sap 2.25
imitantur autem illum qui sunt ex parte illius
