IX. Ottavio Baldigara jelentése Kanizsa állapotáról, 1583. júl. 12.
IX.
Ottavio Baldigara jelentése Kanizsa állapotáról,
1583. júl. 12.508
Ottavio Baldigara jelentése Kanizsa állapotáról,
1583. júl. 12.508
508 ÖStA KA HKR Akt. 1583 July No. 83. Exp. fol. 2–4, az eredeti olasz nyelvű szöveg német fordítása.
Gnedig Herrn
Souil das gePew Zu Canischa anlangt, wäre meins gehorsamen erachtens aller miglicher vleiß fürZuwenden, damit dise Vessten Zu Pesserer versicherung gebracht, vnd anfangs das, was etba [etwa?] aingefallen vnd offen steet, oder wo es sonst am nottwendigisten ist, außPessert, vnd mit geringsten vncossten erPaut, Also auch den Markht daselbst versichert, vnd alles, das so man anfangt, völlig erhöbt vnd außgemacht werde.
Weill auch diser Zeitt daselbst kheine Schanz knecht verhandten, wäre mein guetachten, das so woll die hungerischen als die Teutschen haubtleit, yedes tags ain anZaal knecht, souill Jn dieselben vmb das taglichen arbaiten khundten, verordneten, die khundtn vmb ein bestimbten lohn Jr außgeZaigte arbeit, Weill solches Zu Jr vnd der Jrige versicherung gereichen thuet, verrichten. Zu dergleichen arbeit khundten sich auch der hussarn knecht vnd andere, so arbaiten wellen, welches Jren dan khein schadt ist, brauchen lassen. Weill daselbst Zwaj fändl 110Teutschen vnd hungerischen knecht vnderhalten werden, vermaine Jch, das täglich 200 derselben arbaiten khundten, dem Obrissten vnd haubleiten aber muesste, das sy solches ins werh richten vnd anordnen sollen, beuolchen werden.
Die guet PawZeit soll man nicht verstreihen lassen, sonder weill genugsames Pawgeldt verhandten, soll man 100 schanz oder Teicht khnecht, wo man die am gelegen ist, bekhumen khan, auffnamen, denen man dan den ganZen windter arbait genug geben khan. Die arbait soll denselben nach der maß oder schicht vmb ain solches gelldt, das weder Jnen, noch Jrer Kayserlicher Majestät khein schad sej, vnd nicht, wie anfangs beschehen, das ainer des tags, den graben Zuraumen auff aine g[u]lden oder Taller khumen ist, weill es doch genueg, das ainer der tags 15, 20, 25, oder gar 30 hungerische denar nach gelegenheit der arbait vnd Zeitt gewirdt, alles aines Pawmaister erkhandtnus vnd wolmainen nach ins werch geriht vnd andingt werden.
Wan die Vessten vnd der Markht geschlossen vnd die nottwendigsten arbeit volbracht, sollen alsdan die Zwo Pastein erhöcht vnd mit erdt angeschitt, die Cortina gegen den Markht gemacht, vnd die Prustwöhrn mit Peuschen vnd lämigen gueten erdt, welche Zu ainer khaZen vnd furnebsten der ganZen vesten versicherung diennen khan, auffgefuhrt werden. Den graben daran soll man auch Jm Augusto vnd September, wan die wasser khlein sein, souil miglich, ertieffen vnd erweitern, vnd also nach vnd nach, wo es am mainsten vonnötten, das gepew vortseZen.
Jch bin aber nicht der mainung, das man von gemairwerh was soll anfachen, ehe vnd Zuuor alles von erdt auffgefuhrt sej. Jst gleich woll guet, das man laß Ziegel Prennen vnd dieselben Zu erPawng der heußer in der Vessten Zu fewrstätten vnd Rauchfangen vmbs geldt verkhauffte, dan bißhero sein etlich 100000 Ziegl gleichwoll gePrendt, aber Zu Jrer Majestät schaden, durch meniglich vertragen worden, Jm Markht aber soll man ausser der fewrstatt vnd Rauhfang von gemair nichts Pawen lassen.
Ottauio Baldigara
Baldigara gut bedenken per Canisa psent 12. July 83.
tran?st. transp Cito factum
Humilissimo parer di Ottauio Baldigara per el presente sopra fabricha di Canisa.
