Ps 134
Ps 134
Ps 134.1
alleluia laudate nomen Domini laudate servi Dominum
Ps 134.2
qui statis in domo Domini in atriis domus Dei nostri
Ps 134.3
laudate Dominum quoniam bonus Dominus cantate nomini eius quoniam decens
Ps 134.4
quia Iacob elegit sibi Dominus Israhel in peculium suum
Ps 134.5
quia ego scio quod magnus Dominus et Dominus noster prae omnibus diis
Ps 134.6
omnia quae voluit Dominus fecit in caelo et in terra in mari et in cunctis abyssis
Ps 134.7
levans nubes de summitatibus terrae fulgura in pluviam fecit educens ventos de thesauris suis
Ps 134.8
qui percussit primitiva Aegypti ab homine usque ad pecus
Ps 134.9
misit signa et portenta in medio tui Aegypte in Pharao et in cunctos servos eius
Ps 134.10
qui percussit gentes multas et occidit reges fortes
Ps 134.11
Seon regem Amorreorum et Og regem Basan et omnia regna Chanaan
Ps 134.12
et dedit terram eorum hereditatem hereditatem Israhel populo suo
Ps 134.13
Domine nomen tuum in aeternum Domine memoriale tuum in generatione et generatione
Ps 134.14
quia iudicabit Dominus populum suum et in servos suos erit placabilis
Ps 134.15
idola gentium argentum et aurum opera manuum hominum
Ps 134.16
os habent et non loquentur oculos habent et non videbunt
Ps 134.17
aures habent et non audient sed nec spiritus in ore eorum
Ps 134.18
similes illis fiant qui faciunt ea omnis qui confidit in eis
Ps 134.19
domus Israhel benedicite Domino domus Aaron benedicite Domino
Ps 134.20
domus Levi benedicite Domino timentes Dominum benedicite Domino
Ps 134.21
benedictus Dominus ex Sion qui habitat in Hierusalem alleluia
